قامبالى قارقىن اۋىلىندا تۇراتىن پەتروۆتار وتباسىندا نيكولاي, ەۆگەني جانە ۆيولەتتا ەسىمدى ۇشەم دۇنيەگە كەلدى.
مەڭدىقارا اۋدانىنا قاراستى حاركوۆ اۋىلىندا نيكولاي, ەۆگەني جانە ۆيولەتتا ەسىمدى ۇشەم دۇنيەگە كەلدى. جەرگىلىكتى تۇرعىندار مۇنداي قۋانىشتى وقيعانىڭ اۋدان تاريحىندا وسىدان 45 جىل بۇرىن عانا بولعانىن ايتىپ وتىر.
ۇشەمدى دۇنيەگە اكەلگەن الەنا پەتروۆا وسىمەن 7 بالانىڭ اناسى اتاندى. بۇعان دەيىن شيەتتەي بالا-شاعاسىمەن ەكى بولمەلى تار ۇيدە تۇرىپ كەلگەن پەتروۆتار وتباسىنا جەرگىلىكتى «قارقىن» اگروفيرماسىنىڭ باسشىسى ەركىن بۇقانوۆ اۋىلدان ەڭسەسى بيىك, كەڭ باسپانا تارتۋ ەتىپ, ۇشەمنىڭ اناسى اي سايىن الىپ تۇراتىن 100 مىڭ تەڭگە كولەمىندەگى قارجىلاي كومەك تاعايىندادى.
الەنانىڭ تولعاعى قاڭتاردىڭ سەگىزى كۇنى ۋاقتىلى مەرزىمىنەن 4 اپتا ەرتە باستالعان. شىداتپاي بارا جاتقان سوڭ, ەسى شىققان جولداسى ايەلىن كورشىسىنىڭ كولىگىمەن دەرەۋ اۋداندىق اۋرۋحاناعا جەتكىزەدى.
– بەيتانىس ەر ادام اۋرۋحاناعا كىرگەن بويدا: «قىسىلىپ جاتىر. كومەكتەسىڭدەر!» دەپ ايقاي سالدى. ءبارىمىز اڭتارىلىپ قالدىق. ماسەلەنىڭ ءمانىسىن تۇسىنىسىمەن, جەدەل جۇمىسقا كىرىستىك. تاڭعى ساعات 6-دا ەكى ۇل جانە ءبىر قىز بالا دۇنيە ەسىگىن اشتى, – دەيدى مەڭدىقارا اۋداندىق اۋرۋحاناسىنىڭ باس دارىگەرى رۋداۆا جاكينا.
قۇرساقتا 40 اپتانىڭ اياقتالۋىن كۇتىپ جاتپاي-اق, مىناۋ جارىق دۇنيەنى كورۋگە اسىققان سابيلەردى دارىگەرلەر بىردەن شالا تۋعانداردى شيراتاتىن ارنايى شىنىبەت كيۋۆەزگە جاتقىزىپ, ءبىر تاۋلىك بويى باقىلايدى.
جاعدايلارى تۇراقتى قالىپقا تۇسكەن سابيلەر ءبىر تاۋلىكتەن سوڭ, ساناۆياتسيا ارقىلى قوستاناي قالاسىنداعى وبلىستىق اۋرۋحانانىڭ پەريناتالدىق ورتالىعىنا جەتكىزىلەدى. ەكى ۇل بىردەن جالپى پالاتاعا ورنالاسقانىمەن, قىز بالا ەكى كۇن بويى جانساقتاۋ بولىمىندە جاتقان.
– مەن مەڭدىقارادا دارىگەرلەردىڭ باقىلاۋىندا جاتتىم. ال بالالارىمدى قوستانايعا الىپ كەتتى دەگەندى ەستىگەندە, ءبىراز ايقايعا باسىپ جۇرتتى ابىگەرگە سالدىم. ايتەۋىر مەدبيكەلەر سابىرعا شاقىرىپ, وسىلاي بولۋ كەرەك ەكەنىن ءتۇسىندىرىپ باقتى. بالالارىمدى قولىما الىپ, ومىراۋىما قىسقان سوڭ عانا جانىم تىنىش تاپتى. دارىگەرلەر مەن اكۋشەرلەرگە, مەدبيكەلەرگە مىڭ دا ءبىر راقمەت, – دەيدى ۇشەمنىڭ اناسى الەنا.
پەريناتالدىق ورتالىقتاعى بالالار ءبولىمىنىڭ مەڭگەرۋشىسى يگور بويكونىڭ ايتۋىنشا, ۇشەمدەر قازىر قاجەتتى تەراپيا الىپ جاتىر. جاعدايلارى جاقسى, ءتىپتى, اقىرىنداپ سالماق تا قوسا باستاعان.
– نارەستەلەر, اسىرەسە قىز بالا ءالى دە بولسا ءبىراز شيراي ءتۇسۋى كەرەك. قازىر جاعدايلارى قالىپتى. بىراق نارەستەلەر شالا تۋعاندىقتان ءبىراز ۋاقىت باقىلاۋدا ۇستاپ, ەم جۇرگىزىپ, دارىگەرلىك كۇتىم جاسايتىن بولامىز. ۇشەمنىڭ اناسىنىڭ دەنساۋلىعى دا اقىرىنداپ جاقسارىپ كەلەدى, – دەيدى نارەستەلەردى ەمدەپ جاتقان دارىگەر اسەت وتەگەنوۆ.
قوستاناي وبلىسى