قازاقستان شاڭعىشىسى دانيل ۆاسيلەۆ 2023 جىلى اقش-تىڭ لەيك-پلەسيد قالاسىندا وتكەن قىسقى ۋنيۆەرسيادانىڭ التىن مەدالىن جەڭىپ الدى, دەپ حابارلايدى Egemen.kz Sports.kz-كە سىلتەمە جاساپ.
دانيل ۆاسيلەۆ قالىپتى شاڭعىمەن سەكىرۋ سپورت تۇرىنەن جەڭىسكە جەتتى. ءبىرىنشى تالپىنىستا ول 127,2 ۇپايمەن ءبىرىنشى ورىن السا, سوڭعى اينالىمدا ەكىنشى (130,1) بولىپ مارەگە جەتتى. ەكى ءتاسىلدىڭ قوسىندىسىندا قازاقستان سپورتشىسى اۆستريالىق ماكسيميلليان لينحەردى (251,4) جانە تيمون پاسكال كاحوفەردى (248,8) باسىپ وزىپ, ۇزدىك ناتيجە كورسەتتى (257,3).
قازاقستاننىڭ باسقا سپورتشىلارى كەلەسىدەي ناتيجە كورسەتتى: سەرگەي تكاچەنكو – جەتىنشى (220,9), نيكيتا دەۆياتكين – توعىزىنشى (216,2), سۆياتوسلاۆ نازارەنكو – 20 (147,3), ماعجان امانگەلدى ۇلى – 21 (144,5).
ۆاسيلەۆ جەڭىپ العان مەدال قازاقستان ءۇشىن بيىلعى ۋنيۆەرسياداداعى ەكىنشى مەدال بولدى. بۇعان دەيىن «التىندى» بياتلونشى ۆاديم كۋرالەس جەڭىپ العان ەدى.