وقيعا كۋاگەرلەرى ساعات 13:00-دە پوليتسياعا حابارلاسىپ, قالداياقوۆ كوشەسىندەگى ءۇيدىڭ 15-ءشى قاباتىندا ەر ادامنىڭ تەرەزەدەن اياعىن سالبىراتىپ, سەكىرۋگە تىرىسىپ جاتقانى تۋرالى جەتكىزگەن, دەپ حابارلايدى Egemen.kz.
وقيعا ورنىنا استانا قالاسى پوليتسيا دەپارتامەنتىنىڭ پاترۋلدىك پوليتسيا پولكىنىڭ جاساعى دەرەۋ جىبەرىلگەن. اعا لەيتەنانت ايبەك دۇيسەنوۆ پەن كاپيتان مۇراتبەك وماربەكوۆ تەز ارادا جوعارى قاباتقا كوتەرىلىپ, ەسىكتەردى قاعا باستاعان. جىگىت وتىرعان تەرەزە ورنالاسقان پاتەردىڭ ەسىگىن قىز اشىپ, بولىپ جاتقان جاعداي تۋرالى پوليتسەيلەردەن ەستىگەن. جاعدايدى ۇققان ءتارتىپ ساقشىلارى پاتەرگە جۇگىرىپ كىرگەن جانە جىگىتتىڭ قوزعالعان ءساتىن پايدالانىپ, تەرەزەنى اشا سالىسىمەن ونى ىشكە قاراي تارتىپ العان. 17 جاستاعى جىگىتتى مۇنداي ءىس-ارەكەتكە نە يتەرمەلەگەنى انىقتالىپ جاتىر.
پسيحولوگتار جىگىتپەن پروفيلاكتيكالىق جۇمىس جۇرگىزىپ, ونى زاڭدى وكىلىنە تابىستادى.