* قازاقستاندا ەنەرگەتيكالىق حارتيا ۇدەرىسىن دامىتۋدىڭ نەگىزگى باعىتتارىن انىقتايتىن قۇجات دايىندالادى. بۇل تۋرالى مالىمدەگەن مۇناي جانە گاز ءمينيسترى ۇزاقباي قارابالين بيىلعى 26-27 قاراشا كۇندەرى وتەتىن حارتيا كونفەرەنتسياسى سەسسياسى قورىتىندىسىندا ازىرلەنەتىن استانا قالاسىنىڭ 2015-2019 جىلدارعا ارنالعان «جول كارتاسىنىڭ» ستراتەگيالىق نەگىزگى باعىتتاردى انىقتايتىن قۇجات بولۋى مۇمكىن ەكەنىن ايتتى.
* نازارباەۆ ۋنيۆەرسيتەتىنىڭ اينالاسىندا عىلىمي-زەرتتەۋ جانە كورپوراتيۆتىك ورتالىقتار بەلدەۋى قۇرىلادى. پرەمەر-ءمينيستردىڭ ورىنباسارى گۇلشارا ابدىقالىقوۆانىڭ ايتۋىنشا, اتالمىش وقۋ ورنىندا جاڭارتىلمالى ەنەرگەتيكا, قورشاعان ورتا, كومپيۋتەرلىك تەحنولوگيالار, بيوحيميا, روبوتوتەحنيكا, فيزيكا باعىتتارى بويىنشا 45 عىلىمي جوبا جۇزەگە اسىرىلادى.
* شىعىس قازاقستاندا دەنساۋلىق ساقتاۋ قىزمەتكەرلەرىنە ءتول مەرەكەلەرى قارساڭىندا 58 جەڭىل اۆتوموبيل تاپسىرىلدى. سەمەي قالاسىنداعى ورتالىق الاڭدا وتكەن بۇل راسىمدە دارىگەرلەرگە كولىك كىلتتەرىن تابىس ەتكەن وبلىس اكىمى بەردىبەك ساپارباەۆ بۇعان قوسا تاعى 6 مەديتسينا قىزمەتكەرىنىڭ «قولجەتىمدى باسپانا» باعدارلاماسى بويىنشا پاتەرلى بولعانىن جاريا ەتتى.
* اقمولالىق ونەرتاپقىش بيووتىن مەن تىڭايتقىش وندىرە باستادى. وبلىستىڭ ساندىقتاۋ اۋدانىنداعى شاڭتوبە كەنتىندە ورنالاسقان «ۆەگا» جشس ديرەكتورىنىڭ ورىنباسارى يۆان چەسوۆيكين بۇلاردى سيىردىڭ قيىن وڭدەۋ ارقىلى جاساپ جاتىر.
* قاراعاندى وبلىسىندا قۇبىر شىعاراتىن زاۋىتتىڭ ىسكە قوسىلار شاعى جاقىن. ونىڭ قۇرىلىسىنا گەرمانيالىق ينۆەستورلار 1,5 ملرد. تەڭگەدەن استام قاراجات سالدى. جىلۋ جۇيەسى مەن مۇناي وندىرۋدە كادەگە جارايتىن قۇبىرلاردىڭ كەپىلدىك مەرزىمى ۇزاق ءارى ساپاسى جوعارى. جاڭا زاۋىت ارنايى ەكونوميكالىق ايماقتا ورنالاسقان.
* شىمكەنتتە 8 مىڭ ورىندىق جاڭا مەشىت بوي كوتەرەدى. كەشە وڭتۇستىك قازاقستان وبلىسىنىڭ اكىمى اسقار مىرزاحمەتوۆ پەن ءوڭىردىڭ زيالى قاۋىم وكىلدەرى جاڭا قۇتحانانىڭ كاپسۋلاسىن سالۋ راسىمىنە قاتىستى. بارشا مۇسىلمان ءۇشىن قاسيەتتى ورازا ايىنىڭ الدىندا قۇرىلىسى باستالاتىن نىسان 2016 جىلى قاسيەتتى رامازان ايىندا ەل يگىلىگىنە اينالاتىن بولادى.
* قىزىلورداداعى كوللەدجدەر الەمدىك دامۋ بانكىنىڭ گرانتتارىن جەڭىپ الدى. بۇل تۋرالى بايانداعان وبلىستىق ءبىلىم باسقارماسىنىڭ باسشىسى ناۋرىزباي بايقاداموۆ بيىل جاڭادان اشىلاتىن 10 ماماندىققا وبلىستىق بيۋدجەتتەن 106,0 ملن. تەڭگە قارجى ءبولىنىپ وتىرعانىن جەتكىزدى.
* اتىراۋ وبلىسىندا بالالاردىڭ جازعى دەمالىسىنا 128,7 ملن. تەڭگە ءبولىندى. جالپى, بيىل ايماقتىڭ 17 مىڭ مەكتەپ وقۋشىسى جازعى دەمالىستارىن وبلىستان تىس جەرلەردە وتكىزەدى. ولاردىڭ اراسىندا جەتىم بالالاردىڭ ۇلەس سالماعى باسىم.
«قازاقپارات», 24KZ,
اltaynews.kz, Egemen.kz اگەنتتىكتەرىنىڭ سايتتارى دەرەكتەرى بويىنشا دايىندالدى.