شوعىرلاندىرىلعان بىرلەسكەن كومپانياعا بىرىگەدى

«قاشاعان» جوباسىنىڭ يگەرۋ وپەراتسيالارىنان ءوندىرۋ كەزەڭىنە ىلگەرىلەۋى كونسورتسيۋمنىڭ سولتۇستىك كاسپي بويىنشا ءونىمى ءبولىسۋ كەلىسىمى اياسىندا رەسۋرس­­تاردى ودان ءارى يگەرە بەرۋگە ازىرلەۋ ماقساتىندا وپەراتور مەن اگەنتتەردىڭ بۇدان بىلايعى ينتەگراتسياسى مەن قىزمەتتەرىن بىرلەستىرۋگە مۇمكىندىك بەرەدى. بۇل مۇمكىندىكتى مەيلىنشە ءتيىمدى پايدالانۋ ءۇشىن كونسورتسيۋم ۇلەسكەرلەرى اعىمداعى وپەراتسيالىق ۇلگىدەن بىرتە-بىرتە بىرىڭعاي شوعىرلاندىرىلعان بىرلەسكەن كومپانياعا ءوتۋ جونىندە كەلىستى. وسىعان وراي, نكوك كومپانياسى تومەندەگىدەي ارنايى مالىمدەمە تاراتىپ وتىر. «بىرىڭعاي شوعىرلاندىرىلعان بىرلەسكەن كومپانيا نكوك جانە يگەرۋ, بۇرعىلاۋ جانە پايدالانۋ جۇمىستارىنا بەكىتىلگەن اگەنتتەر تاراپىنان قالانعان بەرىك نەگىزدەرگە سۇيەنە وتىرىپ قۇرىلادى. جاڭا كومپانيا كونسورتسيۋم مۇشەلەرى ازىرلەگەن قولدانىستاعى قۇرالدار مەن پروتسەستەردى قامتيتىن بىرىڭعاي كورپوراتيۆتىك باسقارۋ جۇيەسى اياسىندا جۇمىس ىستەيتىن بولادى. بىرىڭعاي شوعىرلاندىرىلعان بىرلەسكەن كومپانيا «North Caspian Operating Company» (NCOC) دەپ اتالادى دەپ كۇتىلۋدە». وپەراتور كومپانيانىڭ ءمالىم­دەمەسىندە ايتىلعانداي, ينتەگراتسيا مەن بىرىگۋدى ۇستىمىزدەگى جىلى باستاۋ جوسپارلانۋدا. بىرىڭعاي وپەراتسيالىق كومپانيانى قۇرۋعا باعىتتالعان جۇمىستار قۇبىردى جوندەۋگە قاتىستى جۇمىستارعا, نە بولماسا ءوندىرىستى جاڭعىرتۋعا ازىرلىك جۇمىستارىنا, سونىمەن بىرگە, «قاشاعان» كەن ورنىن يگەرۋدىڭ ءبىرىنشى كەزەڭىندە قالعان جۇمىستاردى اياقتاۋ بويىنشا جۇمىستارىنا اسەر ەتپەيدى. ورىن العان وزگەرىستەر تۋرالى رەسمي مالىمدەمە جاسالعانعا دەيىن اعىمداعى باسشىلىقپەن قولدانىستاعى وپەراتسيالىق ۇلگى پايدالانىلاتىن بولادى. بىرىڭعاي وپەراتسيالىق كومپانياعا قاراستى پەرسونالدىڭ باسىم بولىگى اتىراۋ قالاسىندا جۇمىس ىستەيدى. مەملەكەتتىك قىزمەتتەگى رەسمي تۇلعالارمەن قارىم-قاتىناس ورناتۋعا جاۋاپتى قىزمەتكەرلەر استانادا ورنالاسادى. جاڭا ۇلگىگە جوسپارلى تۇردە وتكەننەن كەيىن سولتۇستىك كاسپي بويىنشا ءونىمدى ءبولىسۋ جونىندەگى كەلىسىمگە سايكەس مەنشىك قۇرىلىمىندا وزگەرىستەر بولادى دەپ كۇتىلمەيدى. جاقىندا, جوبا وپەراتورى – نكوك-تىڭ باسقارۋشى ديرەكتورى لاۋازىمىنا «ەكسونموبيل» كومپانياسىندا جۇمىس جاساعان ستەفان دە مايو تاعايىندالدى. جولداسبەك شوپەعۇل,  «ەگەمەن قازاقستان». اتىراۋ وبلىسى.