وتكەن جىلى اسكەرگە قانشا ادام شاقىرتۋ العان؟

«وتكەن جىلى 35 مىڭعا جۋىق ازامات اسكەرگە شاقىرتۋ العان. ءبىرىنشى كەزەكتە شەكاراشىلار, سودان كەيىن قارۋلى كۇشتەر, مەملەكەتتىك كۇزەت قىزمەتى مەن ۇلتتىق گۆارديا شاقىرىلدى. وزدەرىڭىز بىلەتىندەي, كوكتەمدە ناۋرىز ايىنان باستاپ ماۋسىم ايىنا دەيىن شاقىرتۋ ناۋقانى بولدى. ال كۇزگى ناۋقان 1 قىركۇيەكتەن 31 جەلتوقسانعا دەيىن وتكىزىلدى. ناتيجەسىندە, شەكارا قىزمەتىنە - 6 مىڭ, ۇلتتىق ۇلانعا - 13 مىڭ, قارۋلى كۇشتەرگە - 14 مىڭنان استام, مەملەكەتتىك كۇزەت قىزمەتىنە - 100-دەن استام, توتەنشە جاعدايلار قىزمەتىنە - 300-دەن استام ادام شاقىرىلدى», دەدى قر قك باس شتابىنىڭ ۇيىمداستىرۋ-جۇمىلدىرۋ دەپارتامەنتى باستىعىنىڭ ورىنباسارى ازامات دۋسيموۆ بريفينگ بارىسىندا.

ونىڭ ايتۋىنشا, 2021 جىلعا قاراعاندا 2022 جىلى شاقىرتۋ العانداردىڭ سانى ءبىرشاما كوبەيگەن.

«2021 جىلمەن سالىستىرعاندا ءوسىم بار. اسكەرگە شاقىرتىلعانداردىڭ سانى 2000-عا كوبەيگەن. بۇل شەكارا اسكەرلەرىنە, قارۋلى كۇشتەر مەن مەملەكەتتىك كۇزەت قىزمەتىنە قاتىستى. اسكەرگە شاقىرتۋ - مەملەكەت باسشىسىنىڭ تاپسىرماسىنا سايكەس وتكىزىلەتىن جوسپارلى ءىس-شارا. كەلەسى شاقىرۋ ناۋقانى ناۋرىز ايىندا باستالادى», دەدى ازامات دۋسيموۆ.

ايتولعان ءجۇنىسحان,

ل.ن.گۋميلەۆ اتىنداعى ەۇۋ ستۋدەنتى