مەكتەپ ءبىتىرۋشى تۇلەكتەردىڭ دە, اتا-انالارى مەن ۇستازدارىنىڭ دا تىنىشىن العان ۇلتتىق بىرىڭعاي تەستىلەۋ ناۋقانى اياقتالدى. بيىل ۇبت-دان وڭتۇستىكتىڭ مەرەيى جوعارى بولدى. سەبەبى, 6 ماۋسىمدا وسى ءوڭىردىڭ ەكى بىردەي ءبىلىمدى جاسى 125 بالل جيناپ, الماتىمەن يىق قاعىستىرىپ, رەسپۋبليكا بويىنشا كوش باسىنان كورىندى.
ەڭ جوعارى كورسەتكىشكە يە بولعان ۇلپان ەرجانوۆا ورداباسى اۋدانىنداعى ع.مۇراتباەۆ اتىنداعى ورتا مەكتەپتىڭ, ال شاحزودا احمەتجانوۆا شىمكەنتتەگى ز.كوسمودەميانسكايا اتىنداعى جالپى ورتا مەكتەپتىڭ تۇلەگى. ال, 8 ماۋسىمدا ماقتاارال اۋدانىنىڭ ب.مومىش ۇلى اتىنداعى مەكتەپ-گيمنازياسىنىڭ ءۇش بىردەي وقۋشىسى 123 بالل جينادى. ولار – ءاسيا ايكەنجە, نۇرلان ەرتاەۆ جانە نۇرلان نوكەربەك. وسى ءبىلىم ۇياسىنان 27 «التىن بەلگى» يەگەرىنىڭ شىعۋىن دا ماقتانىشپەن ايتۋعا بولادى.
وتكەن جىلى وبلىستاعى مەكتەپ بىتىرۋشىلەردىڭ ورتا بالى 72,5-ءتى قۇراسا, بيىل 74,5-كە جەتىپ وتىر. بىلتىر ءوڭىرىمىز بويىنشا 337 تۇلەك «التىن بەلگىنى» يەلەنسە, بيىل بۇل كورسەتكىش 430-عا جەتىپ, 93-كە ارتتى. جالپى, ۇستىمىزدەگى وقۋ جىلىندا «التىن بەلگىگە» ۇمىتكەر 1131 وقۋشىنىڭ 38 پايىزى عانا سەنىمدى اقتادى. 102 «التىن بەلگى» وبلىستاعى «دارىن» مەكتەپتەرىنىڭ بىتىرۋشىلەرىنە بۇيىردى.
مەكتەپ ءبىتىرۋشى تۇلەكتەردىڭ بيىلعى كورسەتكىشى كوڭىل كونشىتەدى. ماسەلەن, بيىل 2370 وقۋشى 100 بالدان جوعارى جيناپ, وتكەن جىلمەن سالىستىرعاندا 119-عا ارتقان. بىلتىر جالعىز وقۋشى 125 بالل جيناسا, بيىل ول 2-گە جەتتى. سونداي-اق, 11 تۇلەك 123 بالدان يەمدەندى. ونىڭ 6-ۋى شىمكەنتتەن, 3-ءۋى ماقتاارالدان, قالعان 2-ءۋى ارىس قالاسى مەن ورداباسىدان. وبلىس بويىنشا ورتا بالى 88,6-عا جەتكەن كەنتاۋ قالاسىنىڭ تۇلەكتەرى كوش باستاسا, تۇركىستان 81,6 جانە شىمكەنت 80,1 بالمەن ءبىلىم دەڭگەيىنىڭ قانداي ەكەنىن كورسەتتى.
ءۇمىتحان التاەۆا.
وڭتۇستىك قازاقستان وبلىسى.