تۇندە الماتى قالاسىنداعى «جايلى» تۇرعىن ءۇي كەشەنىنىڭ اۋماعىندا جىلۋ جەلىسى ىستەن شىقتى, دەپ حابارلايدى Egemen.kz.
جەلىدە جەر استىنان سۋدىڭ اعىپ جاتقانى بەينەلەنگەن ۆيدەو پايدا بولدى.
الماتى جىلۋ ەنەرگەتيكالىق كەشەنى مەن تكش كاسىپورىندارىنىڭ رەسمي وكىلى يان گيرين المالى اۋدانىندا سايران كولىنىڭ جانىندا ورنالاسقان «جايلى» تۇرعىن ءۇي كەشەنىنىڭ اۋماعىندا جىلۋ جەلىسىنىڭ ىستەن شىققانى تۋرالى حابارلادى.
«اپات ورنىنا شۇعىل تۇردە «الماتى جىلۋ جەلىلەرى» جشس بريگاداسى شىقتى. ول 2003 جىلى پايدالانۋعا بەرىلگەن تاراتۋ قۇبىرى ۋچاسكەلەرىنىڭ بىرىندەگى اقاۋدىڭ سالدارىن جويدى. بۇل تۇرعىن ءۇي كەشەنىنە جاتادى. تاڭعى ساعات 8-گە دەيىن كەشەن تۇرعىندارىنا جىلۋ مەن ىستىق سۋ بەرۋ تولىق كولەمدە قالپىنا كەلتىرىلدى. زارداپ شەككەندەر مەن قانداي دا ءبىر زالال تۋرالى اقپارات تۇسكەن جوق», دەدى يان گيرين.
جاقىندا الماتىدا مىڭباەۆ كوشەسىندە سۋ قۇبىرى بۇزىلىپ, ناتيجەسىندە بىرنەشە كوشە سۋ استىندا قالعان ەدى.