جاقىندا ەۋروپا, ازيا سونىڭ ىشىندە قىتاي, رەسەي, تۇركيا ەلدەرىندە بولدىم. سوڭىندا الماتى, استانا قالالارىنا كەلىپ, قازاق ەلىنىڭ تىنىس-تىرشىلىگىن تاعى ءبىر كورىپ, كوڭىلىم تولىپ, جۇرەگىم تولقىپ, رازىلىق تانىتتىم. ءدال وسى ءساتتەرىمدە ەلباسى نۇرسۇلتان نازارباەۆ «قازاقستان-2050» ستراتەگياسىن قۇپتاعان كوپتەگەن ۇلت وكىلدەرىمەن جولىقتىم. الەمدە بولىپ جاتقان قۇبىلىس, وزگەرىستەرگە قازىر پەندەنىڭ ءبارى قۇلاق اسىپ, ءمان بەرە بەرمەيتىن زامان عوي. ال قازاقستان ازاماتتارى ستراتەگيانى ءبىراۋىزدان قۇپتاپ, ءۇن قوسىپ جاتىر. پرەزيدەنتكە وزدەرىنىڭ ىستىق ىقىلاسىن بىلدىرەدى. كەرىسىنشە, استانادا جولداۋدى ۇلىقتاۋ, ءدارىپتەۋ ءسال-ءپال باياۋ ەكەنى بايقالدى. قازاقستاندى قۋاتتى ەلگە اينالدىرۋ تاريحي شەشىم, دەيدى ءبارى. بيىلعى جولداۋداعى «التىن كۇندى قوندىرىپ قاناتىنا, قازاق ەلى سامعايدى بولاشاققا» دەگەن جولدار مەنىڭ دە وي-ساناما سامعاۋ بەرگەندەي بولدى.
شىندىعىندا, تۇلپار شابىسىمەن شاپقان ەل – باقىت جولىن اشقان ەل, ۇلىلىققا قولى جەتكەن ەل! مۇنى اتاجۇرت حالقىنىڭ تىنىس-تىرشىلىگى, اسەم استاناسىنىڭ سۇلۋلىعى ايقىن كورسەتىپ تۇر.
ۇلى وشپەس ەل بولۋ بۇكىل الەم حالىقتارىنىڭ ارمانى عوي. حالقىنىڭ بەرەكە-بىرلىگى, ءوزارا تاتۋلىعى ارقىلى سول ارمانىنا جەتىپ, الەمگە تانىلعاندار دا, ءوزارا قىرعي-قاباق بولىپ, ءبىرىن-ءبىرى جاقتىرماي ءجۇرىپ, اقىرى توزىپ, جوعالىپ جاتقاندار دا بارشىلىق. جاسىم ەگدەلەنگەن شاعىمدا قازاق ەلى حالقىنىڭ باقىتقا بولەنىپ, ۇلى, ۇلاعاتتى ەل بولعانى, ەلباسىنىڭ اسا كەمەڭگەرلىگىنىڭ ارقاسى دەپ ءبىلەمىن. بۇل – قازاقتىڭ ءبىر ۇلى رەتىندە مەنىڭ دە ءىرى قۋانىشىم. قازاق ەلىم جاساي بەرەتىنىنە جان-جۇرەگىممەن سەنەمىن.
وسى ساپارىمنىڭ تاعى ءبىر قۋانىشتى ءساتىنىڭ ءبىرى, مەنىڭ جەرلەسىم ۇزبەن قۇرمانباي ۇلىنىڭ قازاق حالقىنا, ەلباسىنا ارناپ جازعان ەكى كىتابىمەن تانىسۋىم بولدى. بۇدان ءسال بۇرىن جازعان «ورالعان باقىت, ورىندالعان ارمان» كىتابىن دا وقىعانمىن. ءبىرى باسى, كەلەسىسى سوڭى بولىپ جالعاسقان وسى ەكى كىتاپ, قازاق حالقىنىڭ مىڭ جىلعى اسىل ارمانى, ونىڭ تاۋەلسىزدىگىن العان ساتتەن, بۇگىن ۇلى ەل بولىپ قالىپتاسقانى, حالقىنىڭ بەرەكە جولىنداعى قاھارماندىعى, ەلباسىنىڭ ەرلىگى دەپ تانۋىمىز كەرەك. ۇزبەن كىتاپتارىندا قازاق ەلىنىڭ 22 جىلداعى تابىسىن, حالقىنىڭ ەڭبەگىنىڭ جەمىسىن ناقتى كورسەتكەن. جيىرما جىلدان ءسال اسقان ۋاقىتتا ەكى ءجۇز جىلعا تاتيتىن وركەنگە جەتكەن الەمدەگى تەك قازاقستان ەكەنىن شىندىققا ۇشتاستىرا دالەلدەگەن.
اللاعا شۇكىر, سوناۋ 1990 جىلدىڭ باسىندا قازاق ەلى مەن موڭعوليا اراسىنا تەلەفون, تەلەگراف بايلانىسىن جاساتىپ, اۋە قاتىناسى ءوز شەشىمىن تاپقان ەدى. بايان-ولگەي قازاقتارى «قازاقستان» تەلەارناسىن كورە باستادى. ءتىپتى, سول ۋاقىتتا العاش «قازاق ەلىندە 100 بالانى تەگىن وقىتاتىن بولىپتى» دەگەندە سەنبەگەندەر دە بولعان. سودان بەرى قاراشاڭىراعىمىز دەپ كەلەمىز.
يسلام قابىش ۇلى,
اكادەميك.
موڭعوليا,
ۋلان-باتور.