ماماندار بۇگىن سورەدەن شىعاتىن الەم چەمپيوناتىنا قاتىساتىن كوستا-ريكا قۇراماسىنىڭ 22 جاسار وسى جارتىلاي قورعاۋشىسىن تۋرنيردە اشىلاتىن جاڭالىقتاردىڭ ءبىرى بولادى دەپ كۇتىپ وتىر. كوماندانىڭ ورتالىق قورعاۋ شەبىندە تۇراتىن ونىڭ تولىق اتى-ءجونى ەلتسين انتونيو تەحەدا ۆالۆەردە كورىنەدى.
فۋتبولشى ءوز ەسىمىن رەسەيدىڭ ءبىرىنشى پرەزيدەنتى بوريس ەلتسيننىڭ قۇرمەتىنە العان ەكەن. 1992 جىلى 17 ناۋرىزدا تۋعان بالاقايعا اناسى بۇل اتتى رەسەي باسشىسىنا رازى بولعاندىقتان بەرىپتى. ال فۋتبولعا دەگەن قۇمارلىق وعان اكەسى يوسيمار تەحەدا ارقىلى دارىعان. جاسى 14-كە كەلگەندە, ەلتسين وزدەرى تۇراتىن ليمون دەگەن قالاشىقتان كوستا-ريكا استاناسىنداعى ۋنيۆەرسيتەتكە وقۋعا تۇسۋگە اتتانىپتى. سوندا بارعاسىن, فۋتبولشى رەتىندە جاتتىعۋىن دا كۇشەيتە تۇسكەن.
كەيىن كاسىپقوي فۋتبولعا ءبىرجولا بەت بۇرعان ەلتسين كوستا-ريكاداعى ەڭ مىقتى كوماندالاردىڭ ءبىرى – «دەپورتيۆو ساپريسساعا» قابىلدانادى. سودان بەرى وسى ۇجىمنىڭ ساپىندا وينايدى. ال ەلدىڭ باس كومانداسىنىڭ جاتتىقتىرۋشىلارى وعان 2009 جىلى نيگەريادا وتكەن جاسوسپىرىمدەر اراسىنداعى الەم چەمپيوناتىندا ءوز ەلىنىڭ قۇراماسى قۇرامىندا ويناپ جۇرگەن كەزىندە نازار اۋدارادى. ارادا ەكى جىل وتكەننەن كەيىن ەلتسين ەلدىڭ ەرەسەكتەر اراسىنداعى قۇراماسى ساپىندا العاشقى ويىنىن وتكىزدى. وسىدان باستاپ ول شەبەرلىگىن ۇدايى وسىرۋمەن كەلەدى. 2014 جىلى ەلتسين تەحەدا ءوز ەلى قۇراماسىنىڭ الەم چەمپيوناتىنىڭ فينالدىق تۋرنيرىنە جولداما الۋىن قامتاماسىز ەتە ءبىلدى. ول كوستا-ريكانىڭ مەكسيكامەن وتكەن شەشۋشى ماتچىندا جەڭىسكە جەتۋىنە ۇلكەن ۇلەس قوستى.
ءبىر قىزىعى, بۇل چەمپيوناتقا قاتىسۋشى كوماندالار قاتارىندا مۇنداي «ساياسي» ەسىمدى فۋتبولشىلار جەتكىلىكتى كورىنەدى. ايتالىق, كولۋمبيا جاساعى ساپىندا دا ءبىر ەلتسين ءجۇر. ونىڭ اتى-ءجونى – ەلتسين كارو. وسى ەلدە تەگى «ستالين» اتالاتىن فۋتبولشى دا بار. ول موتتا ستالين بولىپ تابىلادى. بۇدان ءارى ەكۆادوردا ەكى بىردەي لەنين – پوروشا جانە دە حەسۋس تىركەلگەن. سول سياقتى ەكى قۇرامانى اقش-تىڭ سوڭعى ەكى پرەزيدەنتىمەن فاميليالاس ويىنشىلار تولىقتىرعان. ولاردىڭ ءبىرى – كولۋمبيالىق فلوران وباما بولسا, ەكىنشىسى اقش كومانداسى قۇرامىنداعى ەۆان بۋش ەكەن.
جاھاندىق جارىستا ءوز ەلدەرى قۇرامالارى ساپىنان ورىن تابىلماعاسىن, وزگە مەملەكەتتەردىڭ نامىستارىن قورعاۋعا بەكەم بەل بايلاپ كەلگەن فۋتبولشىلار دا ءبىراز بولىپ شىقتى. ولاردىڭ سانى ارتىق-كەمى جوق 10 سپورتشى بولىپ وتىر. ماسەلەن, ريو-دە-جانەيرونىڭ تۋماسى, 16 جاسىنان برازيليا فۋتبول كلۋبتارىندا ويناي باستاعان, دۋدۋ اتتى لاقاپ ەسىمى بار ەدۋاردو دا سيلۆا قازىر حورۆاتيا قۇراماسىنىڭ بەلدى مۇشەسى بولىپ وتىر. بۇل ەلدىڭ تاعى ءبىر تۋماسى – جورجە ساممير دە بۇگىندە وسى شارشى تاڭبالى جەيدەسى بار ەلدىڭ قۇراماسى ساپىندا وينايدى. مۇنىڭ ەسەسىنە, حورۆات جەرىنىڭ داريو ۆيدوشيچ ەسىمدى تۋماسى الىستاعى اۆستراليا ءۇشىن جان بەرىسەتىن شايقاستارعا قاتىسادى. برازيليانىڭ تاعى ءبىر ورەنى – ديەگو كوستا وسى جولى يسپانيا كومانداسى ساپىندا الاڭعا شىقسا, ونىڭ كەلەسى وتانداسى تياگو موتتا يتاليانىڭ جالاۋىن جەلبىرەتەدى. سول سياقتى كانادالىق دجوناتان دە گۋزمان گوللانديانىڭ بارابانىن قاقسا, تۇرىك جەرىنىڭ ءتول پەرزەنتى ادنان يانۋزاي بەلگيانىڭ قۇرامىندا ءجۇر. بۇدان قالدى, گانا جەرىندە كىندىك قانى تامعان ماريو بالوتەللي ءبىرازدان بەرى يتاليانىڭ بەلدى ويىنشىسى اتانىپ كەلەدى.
دامير قوجامقۇل.