پەرۋدە نارازىلىقتارعا بايلانىستى 15 قاڭتاردان باستاپ ەلدىڭ كەيبىر ايماقتارىندا, سونىڭ ىشىندە ەل استاناسى ليمادا توتەنشە جاعداي جاريالاندى, دەپ حابارلايدى Egemen.kz.
كۋسكو, كالياو, ليما جانە پۋنو ايماقتارىندا 30 كۇندىك مەرزىمگە توتەنشە جاعداي ەنگىزىلدى.
ىشكى ءتارتىپتى پەرۋ ۇلتتىق پوليتسياسى مەن قارۋلى كۇشتەر قامتاماسىز ەتەدى.
وڭتۇستىك امەريكا ەلىنىڭ كوپتەگەن قالالارىندا ءوتىپ جاتقان ۇكىمەتكە قارسى مىڭداعان شەرۋلەرگە قاتىسۋشىلار پرەزيدەنت دينا بولۋارتەنىڭ وتستاۆكاعا كەتۋىن, كونگرەسستى تاراتۋدى جانە مەرزىمىنەن بۇرىن سايلاۋ وتكىزۋدى تالاپ ەتىپ وتىر.
جەرگىلىكتى باق-تىڭ حابارلاۋىنشا, پەرۋدە 2022 جىلدىڭ 11 جەلتوقسانىنان بەرى ءوتىپ جاتقان نارازىلىق شەرۋلەرىنىڭ قۇرباندارى سانى - 48, جارالانعاندار سانى 700-دەن اسقان.