ادامزات اقىل-ويىنىڭ تاماشا تابىستارىنىڭ ءبىرى – بۇكىلالەمدىك جەتىستىكتەر كورمەسىن ۇيىمداستىرۋدىڭ 160 جىلدان استام تاريحىندا ورتالىق ازيا ايماعى, ءتىپتى, تمد ەلدەرىنىڭ ەشقايسىسىندا دا حالىقارالىق كورمە تۋى جەلبىرەپ كورگەن ەمەس. كەشە پاريج قالاسىندا قازاقستاننىڭ باس قالاسى استانا – ەكسپو-2017 بۇكىلالەمدىك كورمەسىنىڭ استاناسى رەتىندە رەسمي جانە تۇپكىلىكتى تۇردە تانىلىپ, حالىقارالىق كورمەلەر بيۋروسى ۇيىمىنىڭ تۋى قازاقستانعا سالتاناتتى تۇردە تابىس ەتىلدى. وركەنيەت شوعىرىندا شوقتىعى بيىك قازاقستاننىڭ جانە ەلوردامىز استانانىڭ حالىقارالىق ساحناداعى مەرەيى تاعى دا شارىقتادى.
كەشە, ياعني, 11 ماۋسىمدا پاريجدە حالىقارالىق كورمەلەر بيۋروسى باس اسسامبلەياسىنىڭ 155-ءشى سەسسياسى ءوز جۇمىسىن باستاعان ەدى. قالىپتاسقان ءداستۇر بويىنشا وسى سەسسيادا «استانا-ەكسپو-2017» بۇكىلالەمدىك كورمەسىن رەسمي تۇردە تانۋ جانە حالىقارالىق كورمەلەر بيۋروسى ۇيىمىنىڭ تۋىن 2017 جىلى وسى جاھاندىق شارانى وتكىزەتىن ەل – قازاقستانعا سالتاناتتى تۇردە تاپسىرۋ شاراسى بولىپ ءوتتى. ءسويتىپ, باتىس پەن شىعىس وركەنيەتىن جالعاستىرعان التىن كوپىر اتانعان ارۋ استانادا حالىقارالىق كورمەلەر بيۋروسىنىڭ تۋى جەلبىرەيتىن بولدى.
حالىقارالىق كورمەلەر بيۋروسى باس اسسامبلەياسىنىڭ 155-سەسسياسىنىڭ جۇمىسىنا ەلىمىزدىڭ سىرتقى ىستەر ءمينيسترى ەرلان ىدىرىسوۆ باستاعان قازاقستاندىق اۋقىمدى دەلەگاتسيا قاتىستى. دەلەگاتسيا قۇرامىندا ەكسپو-2017 حالىقارالىق مامانداندىرىلعان كورمەسىنىڭ كوميسسارى – سىرتقى ىستەر ءمينيسترىنىڭ ءبىرىنشى ورىنباسارى ءراپىل جوشىباەۆ, «استانا-ەكسپو-2017» ۇلتتىق كومپانياسى» اكتسيونەرلىك قوعامىنىڭ باسقارما توراعاسى تالعات ەرمەگياەۆ جانە ەلىمىزدەگى الەمدىك كورمەنى وتكىزۋگە جاۋاپتى ۇكىمەتتىڭ لاۋازىمدى تۇلعالارى قاتىستى. حالىقارالىق كورمەلەر بيۋروسى باس اسسامبلەياسىنىڭ سەسسياسىنا وسى ۇيىمعا مۇشە 160 مەملەكەتتىڭ دەلەگاتسيالارى تۇگەلدەي دەرلىك كەلدى.
حالىقارالىق كورمەلەر بيۋروسى باس اسسامبلەياسىنىڭ 155-سەسسياسىندا العاشقى بولىپ قازاقستان تاراپىنان سىرتقى ىستەر ءمينيسترى ەرلان ىدىرىسوۆ ءسوز سويلەپ, سەسسياعا قاتىسۋشىلارعا ارنالعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قۇتتىقتاۋ حاتىن وقىپ بەردى.
«قۇرمەتتى باس حاتشى مىرزا!
قۇرمەتتى اسسامبلەياعا قاتىسۋشىلار!
قازاقستان رەسپۋبليكاسى استانادا ەكسپو-2017 حالىقارالىق مامانداندىرىلعان كورمەسىن وتكىزۋ قۇرمەتىنە يە بولدى.
كورمە تمد كەڭىستىگىندە ءبىرىنشى رەت وتكىزىلەدى جانە الەمدىك ەنەرگەتيكا سالاسىنداعى تالقىلاۋلار مەن يننوۆاتسيالاردى تانىستىرۋعا ارنالعان الاڭعا اينالاتىن بولادى.
استانا قالاسىنداعى ەكسپو-2017 بالاما ەنەرگيا كوزدەرىن ازىرلەۋگە جانە پايدالانۋعا ايتارلىقتاي ۇلەس قوسۋعا شاقىراتىنى, ۇزدىك الەمدىك تەحنولوگيالاردى تانىستىرۋعا مۇمكىندىك بەرەتىنى جانە ەنەرگەتيكالىق ءتيىمدى باعدارلامالاردى ىلگەرىلەتۋگە جاردەم كورسەتەتىنى ءسوزسىز.
ءبىز بىرگە نەعۇرلىم ەكولوگيالىق جانە قاۋىپسىز قورشاعان ورتا قۇرۋ جولىندا جاڭا شەشىمدەر ىزدەۋ ءۇشىن بۇكىلالەمدىك قوعامداستىقتىڭ كۇش-جىگەرىن جۇمىلدىراتىن بولامىز.
ءبىزدىڭ تاڭداعان «بولاشاق ەنەرگياسى» تاقىرىبى بۇكىل ادامزات ءۇشىن اسا وزەكتى بولىپ تابىلادى. قازاقستان – جاسىل ەكونوميكانى ەنگىزۋدىڭ بەلسەندى جاقتاۋشىسى.
وسىعان وراي, ءبىز 2012 جىلى بىرىككەن ۇلتتار ۇيىمىنىڭ ورنىقتى دامۋ جونىندەگى كونفەرەنتسياسىمەن ماقۇلدانعان ءححى عاسىرداعى جاھاندىق ەنەرگيا-ەكولوگيالىق ورنىقتى دامۋ ستراتەگياسىن جانە «جاسىل كوپىر» سەرىكتەستىك باعدارلاماسىن ۇسىندىق.
استاناداعى كورمە جارقىن حالىقارالىق وقيعالاردىڭ ءبىرى بولاتىنىنا, بالاما جانە جاڭارتىلاتىن ەنەرگيا كوزدەرىن ودان ءارى قولدانۋعا جانە دامىتۋعا سەرپىن بەرەتىنىنە سەنىمدىمىن.
ءبىز ەكسپو-2017-ءنى ەڭ جوعارى دەڭگەيدە وتكىزۋ ءۇشىن بار كۇش-جىگەرىمىزدى سالامىز.
بارلىق قاتىسۋشىلارعا تابىستى جۇمىس پەن جەتىستىكتەر تىلەيمىن!» دەپ اتاپ كورسەتىلگەن ەلباسى قۇتتىقتاۋىندا.
سەسسيا جۇمىسىنىڭ بارىسىندا «استانا-ەكسپو-2017» كورمەسى رەسمي تۇردە تانىلدى. وسىعان بايلانىستى, حالىقارالىق كورمەلەر بيۋروسى باس اسسامبلەياسىنىڭ پرەزيدەنتى فەرديناند ناگي مەن باس حاتشىسى ۆيسەنتە لوسسەرتالەس قازاقستان رەسپۋبليكاسى دەلەگاتسياسىنىڭ جەتەكشىسى, سىرتقى ىستەر ءمينيسترى ەرلان ىدىرىسوۆقا حكب تۋىن سالتاناتتى تۇردە تابىس ەتتى.
حالىقارالىق كورمەلەر بيۋروسىنىڭ 155-سەسسياسى اياسىندا «استانا-ەكسپو-2017» ۇك» اق باسقارما توراعاسى تالعات ەرمەگياەۆ فرانتسيانىڭ بىرنەشە كومپانيالارىنىڭ باسشىلارىمەن كەزدەستى. فرانتسيانىڭ ۇلتتىق كومپانيالارى «ەكسپو-2017» حالىقارالىق مامانداندىرىلعان كورمەسىنىڭ دايىندىعى مەن وتكىزۋ جۇمىستارىنا اتسالىسۋعا ىنتالىلىق تانىتىپ وتىر. كەزدەسۋدە «Morpho» كومپانياسىنىڭ ورتالىق ازيا بويىنشا كوممەرتسيالىق ديرەكتورى فرانسۋا روتەنبۋرگەردىڭ ايتۋىنشا, بۇل كومپانيا حالىقارالىق كورمە كەزىندە قاۋىپسىزدىكتى ساقتاۋ ماسەلەلەرى بويىنشا ساپالى قىزمەت كورسەتۋگە مۇددەلى. «Morpho» كومپانياسى بۇل سالاعا ماماندانعان, ونىڭ جاھاندىق شارالار كەزىندە قىزمەت كورسەتۋ جونىندەگى تاجىريبەسى ۇلكەن. ماسەلەن, لوندون وليمپياداسى كەزىندە قاۋىپسىزدىكتى وسى كومپانيا قامتاماسىز ەتكەن بولاتىن. كەزدەسۋدە, سونىمەن بىرگە, گاز, ەنەرگەتيكا, ينجەنەرلىك-كوممۋنالدىق جۇيەلەر, اۋىزسۋمەن قامتۋ, تۇرمىستىق قالدىقتاردى يگەرۋ جانە باسقا سالالار بويىنشا ماماندانعان كومپانيالاردىڭ جەتەكشىلەرىمەن كەلىسسوزدەر جۇرگىزىلدى.
حالىقارالىق كورمەلەر بيۋروسىنىڭ 155-سەسسياسىنىڭ جۇمىسى اشىلار قارساڭدا G-Global جانە ەكسپو-2017 جوبالارىن الەمگە ناسيحاتتاۋ ماقساتىمەن ساياحاتتاپ جۇرگەن قازاقستاندىق «كەرۋەن» موتوشەرۋىنە قاتىسۋشىلار پاريجگە كەلىپ جەتتى. VII استانا ەكونوميكالىق فورۋمى ءوتىپ جاتقاندا ەلوردادان شىققان قازاقستاندىق بايكەرلەر توبى 8000 شاقىرىمعا جۋىق جول ءجۇرىپ, ەلىمىز ەكسپو-2017 تۋىن رەسمي تۇردە قابىلدايتىن ۋاقىتتا فرانتسيا استاناسىنا كەلدى.
قازاقستاندىق التى بايكەر ەلىمىزدەن شىعىپ, رەسەي, فينليانديا, دانيا, نورۆەگيا, شۆەتسيا, گەرمانيا, بەلگيا جەرلەرىنەن وتكەن. ولار جول بويى كەزدەسكەن جۇرتتى ەلىمىزدىڭ تاريحىمەن, مادەنيەتىمەن تانىستىرىپ, ەكونوميكالىق جەتىستىكتەرىمىز بەن ءىرى جوبالارىمىزدى ناسيحاتتادى.
موتوشەرۋ – «عالىمداردىڭ ەۋرازيالىق ەكونوميكالىق كلۋبى» قاۋىمداستىعى, «استانا-ەكسپو-2017» ۇك» اق, سىرتقى ىستەر مينيسترلىگى, قازاق گەوگرافيالىق قوعامى جانە «رومپەترول» كاسىپورنى بىرلەسىپ قولعا العان جوبا. استانا ەكونوميكالىق فورۋمى كەزىندە باستالعان ساياحات ەكسپO-2017 تۋى قازاقستانعا تاپسىرىلاتىن ۋاقىتتا پاريجدە بولسا, شىلدەنىڭ 6-سى – استانا كۇنى ەلگە ورالماق. وعان دەيىن شۆەيتساريا, يتاليا, رۋمىنيا, تۇركيا, گرۋزيا جانە رەسەي اۋماعىنداعى 10 مىڭ شاقىرىمدىق جول بار.
– بىزدىڭشە, موتوتسيكلمەن ساياحاتتاۋدا كوشپەندىلەردىڭ رۋحى بار. ويتكەنى, زامان, تەحنيكا وزگەرگەنىمەن, رۋح قالادى. سوندىقتان ءبىز جىلىنا ءبىر رەت ساياحات ۇيىمداستىرىپ تۇرامىز. بۇعان دەيىن ورتالىق ازيا ەلدەرىنە ساياحات جاسادىق. ول كەزدە ادامنىڭ اياعى تيمەگەن تابيعي-تاريحي ورىنداردى ارالاساق, بۇل جولى باستى تاقىرىبىمىز – حاي-تەك. ەڭ اۋقىمدى ساياحاتىمىز – وسى, – دەيدى تاجىريبەلى بايكەر ءارى مۋزىكانت دياز بايسەيىتوۆ.
ءسويتىپ, پاريج قالاسىندا حكب باس اسسامبلەياسىنىڭ 155-سەسسياسىنىڭ جۇمىسى بارىسىندا «استانا-ەكسپو-2017» كورمەسى رەسمي تۇردە تانىلىپ, قازاقستانعا كورمە تۋى تابىس ەتىلدى. ەندى ەلوردامىزدا وتەتىن جاھاندىق كورمەگە حالىقارالىق قاتىسۋشىلاردى تارتۋ جانە «استانا-ەكسپو-2017»-ءنى جاھاندىق اۋقىمدا ناسيحاتتاۋ شارالارى بارىنشا بەلسەندى جۇرگىزىلەتىن بولادى. استانا قالاسى بۇكىلالەمدىك جەتىستىكتەر كورمەسىن وتكىزۋ ورتالىعى رەتىندەگى ءوز جۇمىسىن زاڭدى تۇردە باستادى. ىسكە ءسات!
جىلقىباي جاعىپار ۇلى,
«ەگەمەن قازاقستان».