الماتى اكىمدىگى اۋىر كوممۋنالدىق اپات تۋرالى حابارلادى. مىڭباەۆ كوشەسىندەگى سۋ قۇبىرىنان اقاۋ شىقتى. تۇنگى 3:40-تان باستاپ سولتۇستىك باعىتتا ورنالاسقان ىرگەلەس كوشەلەردى, نەگىزىنەن اۋەزوۆ كوشەسىن سۋعا باستى, دەپ حابارلايدى Egemen.kz.
كوممۋنالدىق ينفراقۇرىلىمدى دامىتۋ باسقارماسى حابارلاعانداي, «الماتى تازالىق» جولداعى كوكتايعاقتى جويۋ ءۇشىن جولدار مەن تروتۋارلاردى ارنايى ماتەريالدارمەن سەبۋدى ۇيىمداستىرعان.
اكىمدىك اپات سالدارىن بۇگىن جويۋعا ۋادە بەردى.
«سۋ توگىلگەن جەرلەردە كوكتايعاق پايدا بولۋىنا بايلانىستى جۇرگىزۋشىلەردى جىلدامدىقتى تومەندەتۋگە, اۆتوموبيلدەر اراسىنداعى قاشىقتىقتى ارتتىرۋعا جانە سۋ باسقان ۋچاسكەلەردە اباي بولۋعا شاقىرامىز. كورسەتىلگەن ۋچاسكەلەردى اينالىپ ءوتۋ ءۇشىن قوزعالىس باعىتىن قۇرۋدى ۇسىنامىز. جاياۋ جۇرگىنشىلەردەن تروتۋارلاردا جۇرگەندە ساق بولۋدى سۇرايمىز», دەلىنگەن حابارلامادا.