قاڭتاردىڭ قارلى بورانى مەن قاقاعان ايازى قالاعا دا, اۋىلعا دا وڭاي ءتيىپ جاتقان جوق. اۋا رايىنىڭ قولايسىزدىعىنان سوڭعى اپتادا مەكتەپ وقۋشىلارى ونلاين رەجىمدە وقۋعا كوشتى. اۋىل-اۋىلعا كىرەبەرىس جولداردى قار باسىپ, جول قاتىناسى قيىنداپ كەتتى. ول از بولعانداي, قىرىق گرادۋستىق ايازدا ءىرى ەلدى مەكەندەردەگى جىلۋ, سۋ قۇبىرلارى دا سىر بەرە باستادى.
قۇتقارۋشىلاردا تىنىم جوق
ۇسكىرىك ايازعا قاراماستان ساپارلاپ شىعىپ, ورتا جولدا قالعان جولاۋشىلار دا از ەمەس. قۇتقارۋشىلار سوڭعى كۇندەرى اۆتوكولىگى ىستەن شىعىپ, ساقىلداعان سارى ايازدا ايدالادا قالعان 12 ادامدى كۇرە جولدىڭ بويىندا ورنالاسقان ارنايى جىلىجايلارعا جەتكىزىپ, جاندارىن امان الىپ قالدى. مىسالى, 9 قاڭتاردا اۋليەكولدىك قۇتقارۋشىلار سۇلۋكول اۋىلىنان 40 شاقىرىم قاشىقتا جولدا قالعان 5 ادامدى امان-ەسەن اۋليەكولدەگى ارنايى جىلىجايعا جەتكىزىپ, اس-سۋ بەرىپ, دارىگەرلىك كومەك كورسەتتى. ولار مىنگەن «جيگۋلي» اۆتوكولىگى ىستەن شىققان. ابىروي بولعاندا, جولاۋشىلاردىڭ ءبارى ءدىن امان, اياق-قولىن ۇسىك شالىپ, اۋرۋحاناعا تۇسكەن ەشكىم جوق.
– سول كۇنى قامىستى اۋدانىنداعى تج ءبولىمىنىڭ قىزمەتكەرلەرى تاعى ءبىر قۇتقارۋ شاراسىن وتكىزدى. قامىستى مەن قارابۇتاقتى جالعاپ جاتقان رەسپۋبليكالىق ماڭىزعا يە اۆتوجولدىڭ 36-شى شاقىرىمىندا «مەرسەدەس» اۆتوكولىگى سىنىپ, جولدا قالعانى تۋرالى حابار الدىق. قۇتقارۋشىلار دەرەۋ جولعا شىعىپ, جولاۋشىلاردىڭ كولىگىن جوندەۋگە قولۇشىن بەردى. ساعات 23:00-دە 7 ادامدى ليۆانوۆ اۋىلىنداعى جىلى پۋنكتكە ورنالاستىرىپ, تاماقتاندىردىق. جولدا قالعانداردىڭ ىشىندە 5 بالا بار, – دەيدى وبلىستىق تجد ءباسپاسوز حاتشىسى ءۋاليحان دوسانوۆ.
سول كۇنى 7 جولاۋشىنى جىلى پاناجايعا ورنالاستىرىپ بولا سالا, قۇتقارۋشىلاردىڭ قايتا جولعا شىعۋىنا تۋرا كەلگەن. بۇل جولى قوستاناي – قارابۇتاق باعىتىنداعى اۆتوموبيل جولىنىڭ بويىندا قار قۇرساۋىندا قالعان جۇك كولىگىنەن قوڭىراۋ تۇسكەن. جۇك كولىگىن مىنگەن 2 جولاۋشى دا ليۆانوۆ اۋىلىنا جەتكىزىلەدى.
توتەنشە جاعداي دەپارتامەنتىنىڭ مالىمەتىنشە, بوراندى-ايازدى كۇندەرى جول ۇستىندە قالعان وتىز شاقتى جولاۋشى قۇتقارىلعان. «قۇتقارۋ وپەراتسيالارى ءساتتى ءوتتى. جول ۇستىندە قالعان جولاۋشىلاردىڭ ءبارى امان-ەسەن جىلۋ پۋنكتتەرىنە ورنالاستىرىلدى. ەرتەڭىندە ۇيلەرىنە جەتكىزىلىپ, تۋىستارىمەن قاۋىشتى», دەيدى دەپارتامەنتتىڭ ءباسپاسوز حاتشىسى ۋ.دوسانوۆ.
ايازدى كۇندەرى وبلىستا جۇك كولىكتەرى مەن جولاۋشىلار اۆتوبۋسى سياقتى ديزەل وتىنمەن قوزعالاتىن اۆتوكولىكتەردىڭ بارىنە جولعا شىعۋعا تىيىم سالىندى.
قۇبىرلار سىر بەرىپ جاتىر
10 قاڭتاردىڭ قاقاعان كەشىندە قوستاناي اۋدانىنا قاراستى زارەچنىي اۋىلىنداعى ءبىرتالاي ءۇي جىلۋسىز قالدى. اۋدان اكىمدىگىنىڭ وكىلدەرى مۇنى اۋا رايىنىڭ قولايسىزدىعىمەن بايلانىستىرىپ, «ايازدىڭ اسەرىنەن گاز قۇبىرىنداعى قىسىم كۇرت تومەندەپ كەتكەن» دەپ ءتۇسىندىردى. ابىروي بولعاندا, 2-3 ساعاتتىڭ ىشىندە قۇبىردىڭ اقاۋى جوندەلىپ, تۇرعىن ۇيلەر جىلۋ جۇيەسىنە قوسىلدى.
اۋا رايىنىڭ اسەرى مە, ايتەۋىر اياز كۇشەيگەن سايىن, قوستاناي قالاسىندا دا سۋ, جىلۋ قۇبىرىنىڭ جارىلۋى جيىلەپ كەتتى. قالا اكىمدىگىنىڭ مالىمەتىنشە, قىس تۇسكەلى «iKomek» قىزمەتىنە تۇرعىنداردان 699 قوڭىراۋ كەلىپ تۇسكەن. تۇرعىنداردىڭ 427-ءسى جىلۋدىڭ مۇلدە جوقتىعىن, 225 ادام جىلۋدىڭ ءالسىز ەكەنىن ايتىپ شاعىمدانعان. ال 40 شاقتى تۇرعىن قۇبىردىڭ اقاۋىن جوندەپ بەرۋدى وتىنگەن.
قالانىڭ ەسكى شاعىن اۋداندارىن ايتپاعاندا, جاڭا بوي كوتەرگەن «اەروپورت» شاعىن اۋدانىنداعى قۇبىرلاردىڭ ءجيى جارىلۋى ۇيرەنشىكتى كورىنىسكە اينالعان. جاۋاپتى مەكەمە وكىلدەرىنىڭ ايتۋىنا قاراعاندا, بۇل شاعىن اۋداندا قۇبىر توسەۋ جۇمىستارى دۇرىس جۇرگىزىلمەگەن, ناتيجەسىندە توسەلگەنىنە كوپ بولا قويماسا دا, قۇبىر جۇيەسى ءشىري باستاعان.
قىستىڭ ورتاسىندا قالانىڭ كەيبىر كوشەلەرىن سۋ باسىپ جاتقانىن دا ايتپاي كەتۋگە بولمايدى. مىسالى, 11 قاڭتاردا ءتۇن جارىمدا قوستانايداعى شاياحمەتوۆ كوشەسىندە ورنالاسقان №166 تۇرعىن ءۇيدىڭ جانىنداعى سۋىق سۋ قۇبىرى جارىلىپ, ناتيجەسىندە سول ماڭايداعى بىرنەشە جەكە ءۇيدىڭ اۋلاسىن سۋ باسىپ قالدى.
– اپات ورنىندا ءتۇنى بويى 16 تەحنيكا, 25 ادام جۇمىس ىستەدى. اپات ورنىنا قالا اكىمى بارىپ, تۇرعىندارمەن كەزدەستى. ءبىر ءۇيدىڭ تۇرعىندارى ۋاقىتشا باسپاناعا كوشىرىلەدى. قالعان تۇرعىندار ءبىز ۇسىنعان پاتەردەن باس تارتتى, – دەدى قالا اكىمىنىڭ ورىنباسارى المات يسماعۇلوۆ.
مامانداردىڭ ايتۋىنشا, 1970 جىلى توسەلگەن ەسكى شويىن قۇبىر قاتتى ايازعا شىداماي جارىلىپ كەتكەن. اكىمدىكتەگىلەر تاياۋ ارادا تۇرعىندارعا كەلگەن زالالدى وتەۋ بويىنشا تولەمدەر جۇرگىزىلەدى دەگەن ۋادە بەرىپ وتىر.
قوستاناي وبلىسى