پرەزيدەنتكە اقمولا وبلىسىنىڭ 2022 جىلعى الەۋمەتتىك-ەكونوميكالىق دامۋ قورىتىندىلارى تۋرالى ەسەپ بەرىلدى, دەپ حابارلايدى Egemen.kz.
ەرمەك مارجىقپاەۆتىڭ ايتۋىنشا, ءوڭىر ەكونوميكاسىنىڭ بىرقاتار سالاسىندا ءوسىم قارقىنى بايقالادى. اتاپ ايتقاندا, مەملەكەتتىك قولداۋ شارالارىنىڭ ناتيجەسىندە اۋىل شارۋاشىلىعى سالاسىنداعى جالپى ءونىم كولەمى العاش رەت 1 تريلليون تەنگەدەن اسادى. ونەركاسىپ ءونىمىن ءوندىرۋ كولەمى شامامەن 1,4 تريلليون تەنگەنى قۇرادى. نەگىزگى كاپيتالعا قۇيىلاتىن ينۆەستيتسيا ءوسىمى ساقتالىپ وتىر. ەكونوميكانىڭ بارلىق سالاسىندا 22 مىڭنان استام جاڭا جۇمىس ورنى, سونىڭ ىشىندە 16 مىڭ تۇراقتى جۇمىس ورنى اشىلدى.
سونىمەن قاتار پرەزيدەنتكە جىلىتۋ ماۋسىمىنىڭ بارىسى, كوكشەتاۋ قالاسىنداعى جىلۋ ەلەكتر ورتالىعىنىڭ قۇرىلىسى, بىرقاتار ينفراقۇرىلىمدىق جوبانىڭ جۇزەگە اسىرىلۋى, ەلوردا ماڭىنداعى ايماقتاردىڭ دامۋى, سونداي-اق تۋريزم سالاسىن ىلگەرىلەتۋ جۇمىستارى تۋرالى باياندالدى.
كەزدەسۋ سوڭىندا مەملەكەت باسشىسى وبلىستىڭ الەۋمەتتىك-ەكونوميكالىق كورسەتكىشتەرىن ودان ءارى جاقسارتۋ جانە ءوڭىر تۇرعىندارىنىڭ ءال-اۋقاتىن ارتتىرۋ جونىندە بىرقاتار تاپسىرما بەردى.