بۇل تۋرالى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ حابارلايدى.
وقۋ-اعارتۋ مينيسترلىگى پىكىرسايىستى كەڭىنەن ناسيحاتتاۋ ماقساتىندا پىكىرسايىس تۋرنيرلەرىن وتكىزۋدىڭ تۇجىرىمداماسى مەن ەرەجەسىن ازىرلەدى. وقۋشىلار مەن ستۋدەنتتەردى وقىتۋ ءۇشىن 10-عا جۋىق جوبالىق كەڭسە مەن شتاب اشىلدى, وندا الەمدىك ارەنادا تانىمال پىكىرسايىسشىلاردىڭ قاتىسۋىمەن ءتۇرلى ترەنينگتەر مەن ۆەبينارلار ۇيىمداستىرىلادى.
ماسەلەن, بيىلعى وقۋ-جاتتىعۋدى الەم چەمپيوناتىنىڭ ءفيناليسى جانە پىكىرسايىس بويىنشا ازيا چەمپيونى دجوشۋا پارك وتكىزدى. 2021 جىلدان باستاپ تاجىريبە الماسۋ ءۇشىن Telegram ارناسى جانە WhatsApp-تا «پىكىرسايىس قوزعالىسى/دەباتنوە دۆيجەنيە» چاتى جۇمىس ىستەيدى. ول چاتتاردا بۇگىنگى كۇنى 5 مىڭعا جۋىق ادام بار.
«بۇگىندە وقۋشىلار مەن ستۋدەنتتەر اراسىندا كەڭ تاراعان جانە تانىمال ترەندتەردىڭ ءبىرى – ول دەبات. بۇل قوزعالىستىڭ دامۋى تۋرالى ەل پرەزيدەنتى قاسىم-جومارت توقاەۆ تا ايتقان ەدى. دەباتتار تانىمدىق داعدىلاردى دامىتادى. سىني تۇرعىدان ويلاۋ قابىلەتى – ءححى عاسىر ادامىنىڭ نەگىزگى داعدىلارىنىڭ ءبىرى, ويتكەنى كورىپ وتىرعانىمىزداي, جاڭا بۋىن جاستارى بەلسەندىلىگىمەن جانە ءارتۇرلى قىزىعۋشىلىقتارىمەن ەرەكشەلەنەدى. وسى داعدىلاردى دامىتۋ ءۇشىن دەبات كلۋبتارى جۇمىس ىستەيدى. ولاردىڭ قاتارى جىل سايىن ارتىپ كەلە جاتقانى قۋانتادى. بۇگىنگى تاڭدا پىكىرسايىسشىلاردى قولداۋ ماقساتىندا ءتۇرلى ۆەبينارلار وتكىزىلىپ, قارجىلاي قولداۋ كورسەتىلەدى, ال ءىرى تۋرنيرلەردىڭ جەڭىمپازدارىنا جەرگىلىكتى ۋنيۆەرسيتەتتەرگە گرانتتار بولىنەدى. بۇل قولداۋ شاراسىنىڭ بارلىعى دەبات قوزعالىسىن ودان ءارى تانىمال ەتە تۇسەدى, ال ونىڭ ناتيجەسى بالالارىمىزدىڭ ءبىلىم ساپاسىنا وڭ اسەر ەتەدى», دەدى رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ديرەكتورى رايسا شەر.