جول ەرەجەسىن بۇزعاندارعا سالىناتىن ايىپپۇل مولشەرى ءوستى

جىلدامدىقتى ارتتىرۋ

ماسەلەن, بيىل اۆتوكولىك قوزعالىسىنىڭ جىلدامدىعىن 10-20 كيلومەترگە ارتتىرعانى ءۇشىن ايىپپۇل 5 اەك - 17 250 تەڭگەنى قۇرايدى. 2022 جىلى ول 15 315 تەڭگەنى قۇراعان.

جىلدامدىقتى 20-40 كيلومەترگە ارتتىرعانى ءۇشىن 10 اەك - 34 500 تەڭگە مولشەرىندە ايىپپۇل قاراستىرىلعان. 2022 جىلى 30 630 تەڭگە بولعان.

جىلدامدىقتى ساعاتىنا 40 كيلومەتردەن اسىرعانى ءۇشىن 20 اەك - 69 مىڭ تەڭگە ايىپپۇل سالىنادى. 2022 جىلى 61 260 تەڭگە بولدى.

اكىمشىلىك جازا قولدانىلعاننان كەيىن ءبىر جىل ىشىندە جىلدامدىقتى قايتا اسىرعانى ءۇشىن 30 اەك - 103 500 تەڭگە ايىپپۇل قاراستىرىلعان. بىلتىر بۇل ايىپپۇل مولشەرى 91 890 تەڭگەنى قۇراعان ەدى. 

جۇرگىزۋشى كۋالىگىنسىز كولىك باسقارۋ 

جۇرگىزۋشى كۋالىگىنسىز اۆتوكولىكتى باسقارعانى ءۇشىن 20 اەك - 69 مىڭ تەڭگە ايىپپۇل سالىنادى.

ەگەر جۇرگىزۋشى كۋالىگىنەن ايىرىلعان جۇرگىزۋشى كولىك تىزگىندەسە, وندا وعان 50 اەك - 172 500 تەڭگە ايىپپۇل سالىنادى نەمەسە 20 تاۋلىككە قاماۋعا الىنادى.

ەلىمىزدە ەڭ كوپ تارالعان بۇزۋشىلىق ءتۇرى - جول بەلگىلەرىن ەلەمەۋ. جول بەلگىلەرىنىڭ تالاپتارىن ساقتاماعان جۇرگىزۋشى 3 اەك - 10 350 تەڭگە كولەمىندە ايىپپۇل تولەيدى.

باعدارشامنىڭ قىزىل تۇسىنە نەمەسە رەتتەۋشىنىڭ تىيىم سالۋ قيمىلىنا جۇرگەن جۇرگىزۋشىگە 10 اەك - 34 500 تەڭگە ايىپپۇل سالىنادى. قۇقىق بۇزۋشىلىق قايتالانعان جاعدايدا جۇرگىزۋشى 15 اەك - 51 750 تەڭگە تولەيدى.

جاياۋ جۇرگىنشىلەردىڭ جولدارىنا شىعىپ كەتۋ, جول جيەكتەرىمەن نەمەسە تروتۋارلارمەن ءجۇرۋ ءۇشىن ايىپپۇل 45 945 تەڭگەدەن 51 750 تەڭگەگە (15 اەك) دەيىن ۇلعايدى.

تۇراق ەرەجەلەرى

تۇراق ەرەجەلەرىن بۇزعانى ءۇشىن ايىپپۇل 5 اەك - 17 250 تەڭگە بولىپ بەلگىلەندى.

تروتۋاردا, گۇلزارلاردا, بالالار جانە سپورت الاڭدارىندا تۇراقتاعان كولىك يەلەرى 10 اەك - 34 500 تەڭگە كولەمىندە ايىپپۇل تولەيدى.

اقىلى تۇراقتىڭ قۇنىن تولەۋدەن جالتارعان جۇرگىزۋشىگە 3 اەك - 10 350 تەڭگە ايىپپۇل سالىنادى.

ايتا كەتسەك, جولاۋشىلار مەن جۇكتەردى تاسىمالداۋ ەرەجەلەرىن بۇزعان, قاۋىپسىزدىك بەلبەۋىن بەكىتپەگەن جانە كولىك تىزگىنىندە ۇيالى تەلەفون پايدالانعان جۇرگىزۋشىلەرگە 5 اەك - 17 250 تەڭگە ايىپپۇل سالۋ كوزدەلگەن.

پوليتسيا قىزمەتكەرىنىڭ تالاپتارىن ورىنداماۋ

قىزمەتكەردىڭ كولىكتى توقتاتۋ تۋرالى تالابىن ورىنداماعانى ءۇشىن 40 اەك - 138 مىڭ تەڭگە ايىپپۇل سالىنادى. ءبىر جىل ىشىندە بۇزۋشىلىق تاعى قايتالانسا, جۇرگىزۋشى 5 تاۋلىككە دەيىنگى مەرزىمگە قاماۋعا الىنىپ, كولىك جۇرگىزۋ قۇقىعىنان ايىرىلادى.

جاياۋ جۇرگىنشىلەر

جول قوزعالىسى ەرەجەلەرىنىڭ تالاپتارىن ساقتاماعان جاياۋ جۇرگىنشىلەر دە جاۋاپكەرشىلىككە تارتىلادى.  مۇنداي قۇقىق بۇزۋشىلارعا 2 اەك - 6 900 تەڭگە كولەمىندە ايىپپۇل سالىنادى.

ءبىر جىل ىشىندە بۇزۋشىلىق قايتالانعان جاعدايدا ايىپپۇل 10 اەك - 34 500 تەڭگە دەيىن وسەدى.

قوعام

سونداي-اق قوعامدىق جەرلەردە تۇكىرگەن, بەلگىلەنبەگەن جەرلەرگە قوقىس شىعارعان ازاماتتارعا دا سالىناتىن ايىپپۇل مولشەرى ءوستى. مۇنداي بۇزۋشىلىق ءۇشىن 5 اەك - 17 250 تەڭگە ايىپپۇل تولەۋگە تۋرا كەلەدى.