زاڭسىز اڭ اۋلاعان پەتروپاۆل قالاسىنىڭ ەكى تۇرعىنى ۇستالدى, دەپ حابارلايدى Egemen.kz Polisia.kz سايتىنا سىلتەمە جاساپ.
3 قاڭتار كۇنى كەشكىسىن رەيد بارىسىندا قىزىلجار اۋدانىندا سوكولوۆكا پوسەلكەلىك پوليتسيا بولىمشەسىنىڭ قىزمەتكەرلەرى تەكسەرۋ ءۇشىن Mitsubishi Montero جول تالعامايتىن كولىگىن توقتاتقان. كولىك سالونىندا پەتروپاۆل قالاسىنىڭ 41 جانە 38 جاستاعى تۇرعىندارى بولعان. پوليتسيا قىزمەتكەرلەرى ارتقى ەسىككە جۇققان قاندى بايقاپ قالادى.
سالوننان ارنايى قاپشىققا سالىنعان 12-ءشى كاليبرلى «اتا-ARMS» تەگىس ۇڭعىلى قارۋ مەن جانۋارلاردىڭ ەتى سالىنعان سومكە تابىلدى. قۇجاتتاردى تەكسەرۋ كەزىندە ەر ادامدار اڭ اۋلاۋعا شىققانى, ولاردا ءبىر قوياندى اتۋعا عانا ارنالعان رۇقسات قاعازى بارى بەلگىلى بولدى.
– شاقىرۋ بويىنشا كەلگەن جەدەل-تەرگەۋ توبى 3 ءسىبىر ەلىگىنىڭ زاڭسىز اتىلعان جەرىن انىقتادى. اتالعان فاكتى قر قىلمىستىق كودەكسىنىڭ 337-بابى (زاڭسىز اڭشىلىق) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىندە تىركەلدى. قارۋ, وق-ءدارى, جانۋارلاردىڭ ەتى تاركىلەندى, – دەدى اۋداندىق پوليتسيا ءبولىمىنىڭ باستىعى ءاليحان بايقاداموۆ.
وبلىستا وتكەن جىلى زاڭسىز اڭشىلىقتىڭ جالپى 19 فاكتىسى تىركەلدى.