قوستانايدا 11-دەن 16 جاسقا دەيىنگى مەكتەپ وقۋشىلارىنىڭ «Shans Winter Cup» رەسپۋبليكالىق ءتۋرنيرى مارەگە جەتتى. ءۇش سپورت عيماراتىندا ءۇش كۇن بويى وتكەن ۇزىنتۇرالاردىڭ دوپ دوداسىنا استانا, الماتى, اقتوبە, قوستاناي قالالارىنداعى 5 جەكەمەنشىك مەكتەپتەن 17 كوماندا قاتىستى.
وبلىستىق سپورت باسقارماسى ماماندارىنىڭ ايتۋىنشا, ءتۋرنيردىڭ قالالىق كەزەڭى باستالعان ءۇش ايدىڭ ىشىندە شاكىرتتەردىڭ شەبەرلىك دەڭگەيىنىڭ ەداۋىر وسكەنى بايقالادى, كوماندالاردىڭ ويىن ورنەگى دە ايشىقتالا تۇسكەن. بۇل ورايدا ماماندار دەنە شىنىقتىرۋ مۇعالىمدەرىنىڭ ەڭبەگى وراسان زور دەيدى.
تۋرنير بارىسىندا بالالاردىڭ ويىن تەحنيكاسىن جاقسى مەڭگەرگەنى ايقىن اڭعارىلىپ تۇردى. شالت قيمىلداپ, شاپشاڭ شابۋىلداپ, تاكتيكالىق ويىننىڭ وزىق ۇلگىسىن كورسەتە بىلگەن كوماندالار دا بارشىلىق. كوماندالار ءۇش كۇننىڭ ىشىندە 50 ويىن وتكىزدى.
ناتيجەسىندە, 2007-2008 جىلى تۋعان ءجاسوسپىرىم وقۋشىلار اراسىندا ءبىرىنشى ورىندى «Aqtobe Junior» كومانداسى, ەكىنشى ورىندى «سپارتا», ءۇشىنشى ورىندى «Vista» كومانداسى جەڭىپ الدى. سونداي-اق 2009-2010 جىلى تۋعان بالالاردىڭ جارىسىندا ناتيجەلى ويىن ورنەگىن كورسەتە بىلگەن «ADK», «Vista» جانە «لەگيون» كوماندالارى الدىڭعى ۇشتىكتەن كورىنە ءبىلدى.
10-11 جاستاعى بالعىندار اراسىندا وتكەن ويىنداردا استانالىق «Vista» كومانداسى جەڭىمپاز اتاندى. ال يسحان ساماەۆ, گەورگي رەزنيكوۆ, گەورگي مارچەنكو, الەكساندر يونوۆ سىندى بالاقايلار ءتۋرنيردىڭ ەڭ ۇزدىك ويىنشىسى دەگەن ماراپاتقا يە بولدى.
قوستاناي