الاكولدىڭ انتاليادان نەسى كەم؟

بيىل قۇرىلعان «الاكول تازالىق» مەكەمەسى جاعالاۋدى اباتتاندىرىپ كەلەدى

بارقىتبەل مەن بارلىق جوتالارىنىڭ اراسىن الىپ جاتقان ءۇرجار اۋدانىنىڭ ماقتانىشى – ايگىلى الاكول. تەڭىز قۇرامىمەن بىردەي شيپالى سۋى بار كولدىڭ تۋريستىك تارتىمدىلىعى جىل وتكەن سايىن ۇلعايىپ كەلەدى. تۋريستىك كلاستەردى دامىتۋ جونىندەگى ماڭىزدى جوبالاردىڭ بىرىنە سانالاتىن الاكول دەمالىس ايماعىن دامىتۋ سوڭعى جىلدارى ءوڭىر باسشىلىعىنىڭ ءجىتى قاداعالاۋىمەن قارقىندى جۇرگىزىلە باستادى. الاكولدىڭ مىڭ قۇبىلعان مارجان سۋىنان القا تاققان اۋدانعا جولىڭىز تۇسسە, كولگە سوقپاي كەتۋ كۇنا سياقتى اسەر قالدىراتىنى بار. اۋداندى ايتپاعاندا, شىعىس وڭىرىنە اتباسىن بۇرعان ادام الدىمەن التاي مەن الاكولگە سالەم بەرەدى, ۇلى زاڭعار مەن تەڭىزگە ءتاۋ ەتەدى. وسى ساپارىمىزدا بايقادىق, الاكول جاعالاۋى اسەمدەنىپ, اباتتانىپ كەلەدى ەكەن. الدىمىزدان جارق ەتىپ كورىنگەن ايدىننىڭ جاعاسىندا ءبىزدى كۇنگە توتىققان جىگىت اعاسى كۇتىپ الدى. نىسپىسى – ەرلان ادىلعازين. كول كول بولىپ جاراتىلعالى جاعالاۋىندا العاش رەت قۇرىلعان «الاكول تازالىق» جشس-ءنىڭ جەتەكشىسى وسى ازامات ەكەن. ءۇرجاردا اۋدان اكىمى سەرىك زاينۋلدين الاكولدىڭ جاعاسى ادامداردىڭ دەمالۋىنا بۇرىندارى قولايسىزداۋ بولىپ كەلگەنى, بيىلدان باستاپ ءوڭىر باسشىسى بەردىبەك ساپارباەۆتىڭ تىكەلەي تاپسىرماسىمەن ۇلكەن وزگەرىستەر ءجۇرىپ جاتقانى جونىندە اڭگىمە وربىتكەن. اعىمداعى جىلى «الاكول تازالىق» جاۋاپكەرشىلىگى شەكتەۋلى سەرىكتەستىگىنىڭ قۇرىلعانىن جەتكىزگەن. اۋدان باسشىسىنىڭ ايتۋىنشا, ەلىمىزدەگى ءىرى تۋريستىك ايماققا ەنەتىن الاكول جاعالاۋىندا قۇرىلعان جاڭا سەرىكتەستىككە متز-82 تراكتورى جانە بەس شاعىن تراكتور, قوقىس جيناۋشى ەكى كولىك الىنىپتى. جۇمىستىڭ ناتيجەسىن قابانباي اۋى­لىن قاق جارىپ, كول جاعالاۋىنا بەت الاتىن جولدان-اق اڭعاردىق. بۇرىن قالىڭ جيدە ۇيىسىپ تۇراتىن جولدىڭ شەتى جارىقتاندىرىلىپ, قوسالقى اسفالت جولدىڭ قۇرىلىسى جۇرگىزىلىپ جاتىر ەكەن. «الاكول» جشس ديرەكتورى ەرلان ادىلعازين كول جاعاسىندا جاسالىپ جاتقان جۇمىستارمەن تانىستىردى. – ءبىزدىڭ مەكەمەمىز بيىل قاڭتار ايىندا الاكولدىڭ جاعالاۋىن قالپىنا كەلتىرۋ, سانيتارلىق تازالىقتى ساقتاۋ, ءتۋريزمدى دامىتۋ ماقساتىندا قۇرىلدى. سەرىكتەستىك قۇرىلعان ساتتەن باستاپ جۇمىسقا كىرىسىپ كەتتىك. مەكەمەگە وبلىستىق بيۋدجەتتەن 50 ميلليون, اۋداندىق بيۋدجەتتەن 15 ميلليون تەڭگە ءبولىندى. سونىڭ ناتيجەسىندە 32 ادام جۇمىسپەن قامتىلىپ وتىر. بارلىعى – جەرگىلىكتى تۇرعىندار. ولار ايىنا ورتا ەسەپپەن 40 مىڭ تەڭگە كولەمىندە ەڭبەكاقى الادى, – دەيدى مەكەمە باسشىسى. ىلكىدە كول جاعاسىندا تىنىعۋ­شى­لاردان قالاتىن قاۋىن-قاربىزدىڭ شاپاقتارى, سۋسىنداردان بوساعان شولمەكتەر, كونسەرۆى قالبىرلارى, ءتىپتى, گيگيەنالىق زاتتارعا دەيىن شاشى­لىپ جاتاتىنىن تالاي كوزىمىز كوردى. بيىل «الاكول تازالىق» جشس قىزمەتكەرلەرى قار ەرىگەننىڭ سوڭىن الا ىسكە كىرىسىپ, 31 ناۋرىز بەن 1 مامىر ارالىعىندا جاعالاۋدى تولىق تازالاپ شىعىپتى. مەكەمە جۇمىسشىلارىنىڭ ايتۋىنشا, بولىنگەن تەحنيكالاردىڭ كومەگى ۇلكەن بولىپ تۇر. ۇزاق جىلدار بويى جينالىپ قالعان قوقىستان ارىلۋ وڭاي ەمەس. وسى ۋاقىتتا كۇنىنە 30 تىركەمەدەن قوقىس شىعارىلعان. – ءبىر تىركەمەگە 1 تونناعا جۋىق قوقىس تيەلسە, كولدىڭ تىنىسى قانشالىقتى اشىلعانىن ەسەپتەي بەرىڭىز. مۇقىم جاعالاۋدا جىلدار بويى ءۇيىلىپ قالعان قوقىستىڭ بارلىعى قابانباي اۋىلدىق وكرۋگىنىڭ ارنايى قوقىس پوليگونىنا تاسىمالداندى. ەكى گەكتار اۋماقتى الىپ جاتقان پوليگونعا مەكەمەنىڭ ءبىر بۋلدوزەرى بولىنگەن. بۋلدوزەر قوقىستى دەر ۋاقىتىندا يتەرىپ, ورتەپ, كومىپ وتىرۋعا مىندەتتەلدى. سەبەبى, وسى اۋماقتا سوعاتىن ايگىلى ەبى جەلى قوقىستى شاشىپ تاستايدى. مەن كولدىڭ جاعاسىنداعى قابانباي اۋىلىنىڭ تۋماسىمىن. وسىعان دەيىن جاعاداعى بىلىعىپ جاتاتىن قوقىستى كورىپ جۇردىك. مىڭمەن الىسار دارمەن جوق. دەمالىس ايماعىنداعى بەرەكەسىزدىكتەن جۇرەگىمىز اۋىراتىن. ەندى وسى مەكەمەنىڭ كۇشىمەن كۇندەلىكتى ءبىر قۇمىرا جاتسا دا جيىپ-تەرىپ, تازالاپ وتىرامىز. جاز بويى جاعالاۋداعى تازالىقتى ساقتاۋ – مىندەتىمىز, – دەيدى ە.ادىلعازين. سونىمەن بىرگە كول جاعالاۋى اباتتاندىرىلىپ جاتقانىن باي­قادىق. دەمالۋشىلارعا ارنالعان ورىن­دىقتار مەن ساكىلەر, قوقىس كون­تەينەرلەرى مەن جاشىكتەر ورناتىلعان ەكەن. كولىكتەردى جاعالاۋعا جىبەرمەۋ ءۇشىن ارنايى تاسجيەكتەر قويىلۋدا. كيىم اۋىستىراتىن ورىندار جا­سال­عانىن كوزىمىز شالدى. كول جاعاسىندا بارلىق سانيتارلىق تالاپتارعا ساي جابىق دارەتحانا سالىنعان. سپورت الاڭىنىڭ قۇرىلىسى جۇرگىزىلۋدە. جاعالاۋى جارلاۋىت بولىپ كە­لە­تىن­دىكتەن دەمالۋشىلاردىڭ ءتۇسىپ, شىعۋىنا قولايلى بولۋى ءۇشىن باس­پالداقتار جاسالعان. ەكى شاقى­رىمنان استام اۋماققا سوزىلىپ جات­قان دەمالىس اۋماعى ەندى ءبىر اپتادان سوڭ قالىڭ ءنوپىر حالىققا تولادى. – 10 ماۋسىمنان باستاپ العاشقى تۋ­ريستەر كەلە باستايدى. وسى ۋا­قىت­قا دەيىن بارلىق جۇمىستاردى شەگىنە جەتكىزەمىز, – دەدى «الاكول تازالىق» جشس جەتەكشىسى. قازىرگى كەزدە دەمالىس ايما­عى­نا كىرە-بەرىستە «الاكولگە قوش كەلدىڭىزدەر!» جانە «ءسات ساپار!» دەگەن جازۋ بەدەرلەنگەن اركا, الاكولدىڭ پاسپورتى جانە مەم­­لە­كەتتىك سىيلىقتىڭ لاۋرەاتى نە­سىپبەك ايت ۇلى مەن جەرگىلىكتى اقىن جابايىل بەيسەنوۆتىڭ الاكول تۋرالى جىرلارى جازىلعان بيلبوردتار ورناتۋ جۇمىستارى جۇرگىزىلۋدە. سونىمەن قاتار, تۋريستىك بازالار مەن دەمالىس ۇيلەرىنەن قالدىقتاردى شىعارۋ جونىندەگى كەلىسىمشارتتاردى بەكىتۋ قولعا الىندى. بۇگىنگە دەيىن مەكەمە 12 دەمالىس ۇيىمەن كەلىسىم­شارتقا وتىرعان ەكەن. بۇل ورايدا تۋريستەرگە قىزمەت كورسەتۋ ورتا­لىق­تارىنان سۇيىق جانە قاتتى قالدىق­تاردى تاسىمالداۋعا ارنالعان ارنايى تەحنيكالارمەن جاراقتاندىرۋ جوسپارلانعان. – ءبىزدىڭ ماقساتىمىز – حالىقتى دەمالىس مادەنيەتىنە ۇيرەتۋ. وسى ورايدا قوقىستى جاعالاۋعا لاق­تىرىپ تاستاماي, ارنايى جاشىككە تاس­تاۋعا ۇندەيتىن جارنامالىق تاقتاي­شالار ورناتتىق. وندا «تابي­عاتتى ايالايىق» دەگەن جازۋلار جا­زىلدى. قوقىس تاستاۋشىلارعا ايىپ­پۇل سالۋ ءبىزدىڭ قۇزىرىمىزدا ەمەس. سوندىقتان ارنايى مەكەمەلەر­مەن بىرگە جۇمىس ىستەۋدەمىز. جا­عا­لاۋداعى ءتارتىپتى باقىلاۋ ورگاندارى قاداعالايدى, – دەدى ە.ادىلعازين. قۇرىلعانىنا جارتى جىلعا جۋىق قانا ۋاقىت بولعان «الاكول تازالىق» مەكەمەسىنىڭ اتقارعان جۇمىستارىنىڭ ءبىر پاراسى وسىنداي. كول جاعاسىندا الداعى ۋاقىتتا وركەنيەتتى ەلدەردەگى دەمالىس ۇلگىسىمەن دەمالۋشىلاردى كۇننەن كولەگەيلەيتىن شاتىرلار مەن جاعالاۋدا جاتىپ تىنىعۋعا ارنالعان ورىندار ورناتۋ جوسپارلانعانىن دا ەستىدىك. البەتتە, بارىمىزدى باعالاي بىلسەك, الاكولدىڭ سۋى انتاليادان ارتىق بولماسا كەم ەمەس. جىلىنا 200 مىڭعا جۋىق تۋريست كەلەتىن الاكولدىڭ الەۋەتى ارتار كۇن الدا سياقتى. دۋمان اناش, «ەگەمەن قازاقستان». شىعىس قازاقستان وبلىسى, ءۇرجار اۋدانى. سۋرەتتەردى تۇسىرگەن سامات قۇسايىنوۆ.