قر كونستيتۋتسيالىق سوتىنىڭ 2023 جىلعى 5 قاڭتارداعى نورماتيۆتىك قاۋلىسىمەن كونستيتۋتسيالىق سوتتىڭ رەگلامەنتى بەكىتىلدى, دەپ حابارلايدى Egemen.kz.
قۇجات كونستيتۋتسيالىق سوتتىڭ ىشكى قىزمەتىن ۇيىمداستىرۋ جانە ونىڭ ءتارتىبى ماسەلەلەرىن رەتتەيدى.
ماسەلەن, كونستيتۋتسيالىق سوتقا وتىنىشتەر جازباشا نەمەسە ەلەكتروندىق نىساندا ەكى تىلدە (قازاق جانە ورىس) بەرىلەدى.
وكىلدىڭ وكىلەتتىگى زاڭعا سايكەس بەرىلگەن جانە رەسىمدەلگەن سەنىمحاتتا نەمەسە زاڭ كونسۋلتانتى جاساسقان زاڭ كومەگىن كورسەتۋ تۋرالى شارتتا نە ءتيىستى مەملەكەتتىك ورگانداردىڭ, لاۋازىمدى جانە وزگە دە ادامداردىڭ تاپسىرماسىن كۋالاندىراتىن وزگە دە قۇجاتتا كورسەتىلۋگە ءتيىس.
ازاماتتىڭ كەلىسىمى نوتاريالدى كۋالاندىرىلعان سەنىمحاتتا ءبىلدىرىلۋى مۇمكىن.
ادۆوكاتتىڭ ناقتى ءىستى جۇرگىزۋگە وكىلەتتىگى «ادۆوكاتتىق قىزمەت جانە زاڭ كومەگى تۋرالى» زاڭدا كوزدەلگەن ادۆوكات كۋالىگىمەن جانە قورعاۋ تۋرالى جازباشا حابارلامامەن راستالادى.
زاڭ كەڭەسشىلەرى زاڭ كەڭەسشىلەر پالاتاسىنا مۇشەلىگىن راستايتىن قۇجاتتى ۇسىنادى.
زاڭدى وكىلدەر وزدەرىنىڭ وكىلەتتىكتەرىن كۋالاندىراتىن قۇجاتتاردى ۇسىنادى.
كونستيتۋتسيالىق سوتتىڭ وتىرىسىنا بۇقارالىق اقپارات قۇرالدارىنىڭ وكىلدەرى مەن وزگە دە ادامدار شاقىرىلۋى كوزدەلەدى.
بۇل رەتتە وتىرىس زالىندا ءفوتوتۇسىرىلىم, بەينەجازبا, تىكەلەي راديو جانە تەلەترانسلياتسيا, عالامتوردىڭ اقپاراتتىق-كوممۋنيكاتسيالىق جەلىسىندە بەينەترانسلياتسياعا توراعالىق ەتۋشىنىڭ رۇقساتىمەن جول بەرىلەدى, بۇل تۋرالى وتىرىس حاتتاماسىندا كورسەتىلەدى.
بۇل ارەكەتتەر وتىرىستىڭ قالىپتى وتۋىنە كەدەرگى كەلتىرمەۋى ءتيىس جانە كونستيتۋتسيالىق ءىس جۇرگىزۋدىڭ ۋاقىتى مەن كەزەڭدەرىمەن شەكتەلۋى مۇمكىن.
جابىق وتىرىستاردى وتكىزۋ جانە تاراتىلۋى شەكتەلگەن قىزمەتتىك اقپاراتتى نەمەسە مەملەكەتتىك قۇپيالاردى قامتيتىن ماسەلەلەردى تالقىلاۋ قۇپيالىلىق رەجيمىنىڭ تالاپتارىن ساقتاي وتىرىپ جانە وتىرىستارعا جىبەرۋدى شەكتەي وتىرىپ جۇزەگە اسىرىلادى.
كونستيتۋتسيالىق سوت وتىرىسىنىڭ بارىسىنا ارالاسۋعا جول بەرىلمەيدى.
كونستيتۋتسيالىق سوتتىڭ وتىرىستارى بەينەكونفەرەنتسبايلانىس جانە وزگە دە قولجەتىمدى ونلاين-سەرۆيستەر ارقىلى, بەتپە-بەت نەمەسە ارالاس فورماتتا وتكىزىلۋى, سونداي-اق ينتەرنەت-رەسۋرستا ونلاين رەجيمىندە تاراتىلۋى مۇمكىن دەلىنگەن.
«قازاقستان رەسپۋبليكاسىنىڭ كونستيتۋتسيالىق سوتى تۋرالى» كونستيتۋتسيالىق زاڭ 2022 جىلعى 5 قاراشادا قابىلدانىپ, 2023 جىلعى قاڭتاردان باستاپ كۇشىنە ەندى. كونستيتۋتسيالىق سوت كونستيتۋتسيالىق كەڭەستى الماستىرادى.