بۇگىندە مۇناي ونىمدەرىن ساقتاۋ مەن ساتۋعا رۇقسات بەرۋ ءتارتىبىن جەتكىلىكسىز جانە ۋاقىتىنان كەش قۇقىقتىق رەتتەۋ سالدارىنان جانارماي قۇيۋ بەكەتتەرىنە يەلىك ەتەتىن كاسىپكەرلەردىڭ قىزمەتىنە قۇقىق قورعاۋ ورگاندارىنىڭ نەگىزسىز ارالاساتىندىعى بارشاعا ءمالىم بولىپ وتىر. وسى ورايدا تەكسەرىس جۇرگىزگەن پروكۋراتۋرا ءبىراز ءجايتتىڭ سىرىن اشتى.
“ليتسەنزيالاۋ تۋرالى” جاڭا زاڭدا بۇرىن زاڭدى تۇردە جانار-جاعارماي ماتەريالدارىن ساتۋمەن جانە جانارماي قۇيۋ بەكەتتەرىن پايدالانۋمەن اينالىسقان تۇلعالاردى ليتسەنزيانى العانعا دەيىن ءوز قىزمەتىن توقتاتا تۇرۋ مىندەتتەلمەگەن بولاتىن. بىراق بۇعان قاراماستان, قۇقىق قورعاۋ ورگاندارى جانارماي قۇيۋ بەكەتتەرىندە ونى ساتۋمەن اينالىسقان كاسىپكەرلەرگە قاتىستى 2007 جىلدىڭ تامىزىنان ليتسەنزياسىز قىزمەت جاساعانى ءۇشىن بىرقاتار قىلمىستىق ىستەر قوزعاعان. وسىعان بايلانىستى باس پروكۋراتۋرانىڭ رەسمي وكىلى بۇرىننان زاڭدى نەگىزىندە جانارماي قۇيۋ بەكەتتەرىنە يەلىك ەتەتىن جانە بارلىق قۇقىقتىق تەتىكتەر ورناتىلعاننان كەيىن مۇناي ونىمدەرىن ساقتاۋ مەن ساتۋ سالاسىندا قىزمەت ەتۋگە ليتسەنزيا العان تۇلعالاردىڭ ارەكەتىندە زاڭسىز كاسىپكەرلىكپەن اينالىسۋ, ياعني قىلمىستىق كودەكستىڭ 190-بابىندا كورسەتىلگەن قىلمىستىڭ قۇرامى جوق دەپ ەسەپتەيمىز, دەيدى.
سونداي-اق, باس پروكۋراتۋرا تەحنيكالىق رەتتەۋ جانە مەترولوگيا جونىندەگى كوميتەتتە جۇرگىزگەن تەكسەرۋ كەزىندە ۆەدومستۆونىڭ اۋماقتىق بولىمشەلەرى تاۋاردىڭ قايدان شىققانى تۋرالى سەرتيفيكات بەرۋدە ەكونوميكالىق دامۋ جانە ساۋدا مينيسترلىگىنىڭ زاڭعا قايشى بۇيرىعىنا سۇيەنە وتىرىپ, كاسىپكەرلەردەن تەحنيكالىق رەتتەۋ سالاسىنداعى ۋاكىلەتتى ورگانمەن ىنتىماقتاستىق تۋرالى كەلىسىمدى نەگىزسىز تالاپ ەتكەنىن انىقتادى. سونىڭ ارقاسىندا بيزنەسمەندەردىڭ قۇقىعىنا نۇقسان كەلتىرەتىن اتالعان زاڭسىز بۇيرىقتىڭ كۇشى جويىلدى.
الەكساندر تاسبولاتوۆ.