قازاقستاننىڭ باس پروكۋرورى بەرىك اسىلوۆ ۇقك-ءنىڭ بۇرىنعى باسشىسى كارىم ءماسىموۆ 2022 جىلدىڭ 5 قاڭتارىندا ۇقك دەپارتامەنتتەرىنىڭ عيماراتتارىن بوساتۋعا بۇيرىق بەرگەنىن ايتتى, دەپ حابارلايدى Egemen.kz.
ول تارتىپسىزدىكتەر شىڭىندا الماتى قالاسىنىڭ, الماتى جانە قىزىلوردا وبلىستارىنىڭ ۇقك دەپارتامەنتتەرىنىڭ بارلىق جەكە قۇرامى ءوز عيماراتتارىن تاستاپ كەتكەنىن اتاپ ءوتتى.
«تەرگەۋ مالىمەتتەرى بويىنشا, 5 قاڭتاردا ۇقك توراعاسىنىڭ ورىنباسارى ءانۋار سادىقۇلوۆتىڭ جەكە قۇرامنىڭ عيماراتتى تاستاپ كەتۋگە دايىندىعى تۋرالى جازباشا نۇسقاۋى كەلىپ ءتۇستى. كارىم ءماسىموۆتىڭ نۇسقاۋى بويىنشا الماتى جانە قىزىلوردا وبلىسىنىڭ ۇقكد عيماراتتارى بوس قالدى. سونداي-اق باسشىلىقتىڭ نۇسقاۋى بويىنشا الماتى جانە جامبىل وبلىستارىنىڭ پوليتسيا دەپارتامەنتتەرىنىڭ عيماراتتارى دا بوساتىلدى. اشىعىن ايتساق, بۇل باسشىلار السىزدىك تانىتتى. ناتيجەسىندە تارتىپسىزدىكتەردىڭ جولىن كەسۋ بويىنشا ۋاقىتىلى شارالار قابىلدانعان جوق», دەدى باس پروكۋرور بەرىك اسىلوۆ.
ونىڭ ايتۋىنشا, الماتى مەن تالدىقورعان ەكى تاۋلىك بويى قارۋلى قىلمىسكەرلەردىڭ بيلىگىندە بولدى. ولاردىڭ قولىندا تۇتاس ارسەنال - 3 مىڭعا جۋىق اۆتومات, تاپانشا, مەرگەندىك مىلتىق جانە ونداعان مىڭ وق-ءدارى بولدى. قازىرگى ۋاقىتتا 2 مىڭعا جۋىق قارۋدىڭ ورنالاسقان جەرى ءالى دە بەلگىسىز.
«ارنايى پروكۋرورلاردىڭ بيلىكتى اسىرا پايدالانۋ فاكتىلەرى بويىنشا تەرگەۋ اياقتالدى. ۇقك ءۇش وڭىرلىك دەپارتامەنتىنىڭ, الماتى وبلىسى پوليتسيا دەپارتامەنتىنىڭ جانە باسقا دا ادامداردىڭ بۇرىنعى باسشىلارىنا قاتىستى قىلمىستىق ىستەر سوتتارعا جولداندى. ولاردىڭ كىنالىلىك دارەجەسى مەن جازالاۋ شاراسىن سوت انىقتايدى», دەپ قورىتىندىلادى ب. اسىلوۆ.