قازاقستاننىڭ باس پروكۋرورى بەرىك اسىلوۆ ەلىمىزدىڭ بۇرىنعى قورعانىس ءمينيسترى مۇرات بەكتانوۆ قاڭتار ايىنداعى وقيعالار كەزىندە زاڭسىز بۇيرىقتار بەرگەنىن مالىمدەدى, دەپ حابارلايدى Egemen.kz.
ءماجىلىستىڭ جالپى وتىرىسىندا باس پروكۋرور اسكەري سوتتا ەكس-ءمينيستردىڭ ءىسى بويىنشا تىڭداۋلار جالعاسىپ جاتقانىن حابارلادى.
«تەرگەۋ توتەنشە جاعداي كەزىندە ول زاڭسىز بۇيرىقتار بەرىپ, اسكەري ستراتەگيالىق نىسانداردى قورعاۋسىز قالدىردى دەپ سانايدى. بۇرىنعى قورعانىس ءمينيسترى ەلدە كونستيتۋتسيالىق ءتارتىپ ورناتۋ بويىنشا شارالار قابىلداعان جوق», دەدى باس پروكۋرور بەرىك اسىلوۆ.
ونىڭ ايتۋىنشا, ەلىمىزدىڭ باسقا قالالارىنا قاراعاندا شابۋىلشىلاردىڭ باسىم بولىگى الماتىدا شوعىرلاندى. ولار قورشاۋدى بۇزىپ, پوليتسيا مەن ۇلتتىق گۆارديا كۇشتەرىن باسىپ, حالىقتى قورقىتقان.
«سوندىقتان مۇرات بەكتانوۆقا بيلىكتى اسىرا پايدالاندى دەگەن ايىپ تاعىلدى (قر قك 451-بابى 3-بولىگى). ەندى ونىڭ تۇپكىلىكتى جازاسىن سوت انىقتايدى», دەپ قوستى بەرىك اسىلوۆ.