ەلوردالىق اۋە ايلاعى ءوزىنىڭ تاريحىندا تۇڭعىش رەت ءبىر جىلدىڭ ىشىندە التى ميلليون جولاۋشىعا قىزمەت كورسەتتى. بۇل – رەكوردتىق كورسەتكىش, دەپ حابارلايدى Egemen.kz.
بۇگىن نۇرسۇلتان نازارباەۆ حالىقارالىق اۋەجايىنا اقتاۋ قالاسىنان كەزەكتى رەيس ۇشىپ كەلدى. اتالعان رەيستىڭ جولاۋشىلارىن اەروپورت وكىلدەرى سالتاناتتى تۇردە قارسى الىپ, لوتوترون كومەگىمەن جەڭىمپازدى انىقتادى. جولاۋشىنىڭ ەسىمى تانزيليا جولدىباەۆا, اقتاۋ قالاسىنىڭ تۇرعىنى. التى ميلليونىنشى جولاۋشىعا Air Astana كومپانياسى اۋەجاي اكىمشىلىگىمەن بىرلەسىپ ەلوردا اۋەجايىنان كەز كەلگەن حالىقارالىق باعىت بويىنشا ەكى بيلەت تابىس ەتتى. ءىس-شاراعا «نۇرسۇلتان نازارباەۆ حالىقارالىق اۋەجايى» اق باسقارما توراعاسى داۋلەت حامزين, يدم ازاماتتىق اۆياتسيا كوميتەتىنىڭ توراعاسى تالعات لاستاەۆ جانە «قازاقستاننىڭ اۆياتسيالىق اكىمشىلىگى» اق باس ديرەكتورىنىڭ ورىنباسارى سالتانات تومپيەۆا قاتىستى.
ايتا كەتەرلىگى, بيىل جەلتوقسان ايىندا ەلوردالىق اۋە ايلاعى 550 مىڭعا جۋىق جولاۋشىعا قىزمەت كورسەتكەن. بۇل وتكەن جىلدىڭ سايكەس كەزەڭىمەن سالىستىرعاندا 23%-عا ارتىق. ەلوردا اۋەجايى ءباسپاسوز قىزمەتىنىڭ مالىمەتىنشە, وسى جىلى بىرقاتار كورسەتكىش بويىنشا وڭ ديناميكا بايقالادى.
اۋەجاي وكىلدەرى سونداي-اق قاراشا ايىندا تانىستىرىلعان باس جوسپار تۋرالى دا ايتىپ بەردى. ول جەر ۋچاسكەلەرىن كەزەڭ-كەزەڭمەن جوسپارلاۋ جانە پايدالانۋدى, جاڭا ينفراقۇرىلىم وبەكتىلەرىنىڭ قۇرىلىسىن قامتيدى. جالپى اۋەجاي جۇمىسىنىڭ باسىم باعىتتارىنىڭ ءبىرى – جۇك ينفراقۇرىلىمىن دامىتۋ جانە تەرمينالدار جەلىسىن كەڭەيتۋ.
«جىل سوڭىنداعى وڭ كورسەتكىشتەر جۇمىستى ودان ءارى جاقسارتۋعا سەرپىن بەرەدى. ماسەلەن, جولاۋشىلار اعىنىنىڭ ۇلعايۋى ءوز كەزەگىندە تەرمينالداردى كەڭەيتۋدى تالاپ ەتەدى. ال بۇل شارالار باس جوسپاردى ىسكە اسىرۋ شەڭبەرىندە كوزدەلگەنىن ايتا كەتكەن ءجون. سونداي-اق بيىل Fast track قىزمەتى ەنگىزىلدى, ول تىركەۋ جانە تەكسەرۋ ۇردىستەرىنەن جىلدام وتۋگە مۇمكىندىك بەرەتىن جاڭا قىزمەت ءتۇرى», دەدى «نۇرسۇلتان نازارباەۆ حالىقارالىق اۋەجايى» اق باسقارما توراعاسى.
اۋە تاسىمالى قارقىندىلىعىنىڭ ارتۋىنا جانە ەلوردا اۋەجايىن دامىتۋ جونىندەگى جوسپارلارىنا بايلانىستى كاسىپورىن مەنەدجمەنتى اۋەايلاق ۋچاسكەسىن قايتا قۇرۋ قاجەتتىلىگى تۋرالى ايتادى. وسى رەتتە استانا اۋەجايى ەكىنشى ۇشۋ-قونۋ جولاعىن سالۋدى جوسپارلاپ وتىر.
«پاندەميا كەزىندەگى ورىن العان قيىندىقتار استانا اۋەجايىن جاڭا تابىس كوزدەرىن ىزدەۋگە جانە دامىتۋعا يتەرمەلەدى. اتاپ ايتقاندا, اۋە ايلاعىن مۋلتيمودالدى جۇك تاسىمالداۋ جانە ە-commerce قىزمەت كورسەتۋ ورتالىقتارى مەن اۆياپەرسونالدى دايارلاۋ جونىندەگى وقۋ ورتالىعى بار كوپفۋنكتسيونالدى كاسىپورىنعا اينالدىرۋدى كوزدەيتىن دامىتۋ تۇجىرىمداماسى ازىرلەندى», دەپ اتاپ ءوتتى اۋەجاي باسشىسى د.حامزين.
بۇگىنگى تاڭدا ىشكى جانە حالىقارالىق رەيستەر قالپىنا كەلتىرىلگەن. سونداي-اق يندۋستريا جانە ينفراقۇرىلىمدىق دامۋ مينيسترلىگى مەن ازاماتتىق اۆياتسيا كوميتەتىنىڭ قولداۋىمەن جاڭا باعىتتاردى اشۋ بويىنشا جۇمىستار جالعاسىپ جاتىر. اۋەجاي كىرىسى 5 جىلدىڭ ىشىندە العاش رەت وڭ ناتيجەلەردى كورسەتىپ وتىر. اتاپ ايتقاندا, قىزمەتكەرلەردىڭ جالاقىلارى ءوسىپ, توقساندىق سىيلىقاقىلار تولەنىپ كەلەدى. سونىمەن قاتار بيىل جولاۋشىلار اعىنى, جۇك تاسىمالداۋ كولەمى ەداۋىر ارتىپ, حالىقارالىق جانە ىشكى باعىتتار بويىنشا رەيستەر سانى ۇلعايا ءتۇستى.
ەستەرىڭىزگە سالا كەتەيىك, نۇرسۇلتان نازارباەۆ حالىقارالىق اۋەجايى World Airport Awards-تا ورتالىق ازياداعى/تمد-داعى ۇزدىك وڭىرلىك اۋەجاي بولىپ تانىلدى. ماراپات 2022 جىلعى 16 ماۋسىمدا پاريجدەگى ەكسپو جولاۋشىلار تەرمينالىندا تابىستالعان بولاتىن.