ءداستۇرلى ونەردى دارىپتەگەن

قىدىربەك قيىسحان موڭعوليانىڭ باي-ولكە ايماعىندا دۇنيەگە كەلگەن. 1991 جىلى اتا-اناسىنا ىلەسىپ قامىستى اۋدانىنىڭ قاراباتىر اۋىلىنا كوشىپ كەلگەن شىناشاقتاي بالا بۇگىندە – وڭىرگە بەلگىلى ونەرپاز. مەكتەپ قابىرعاسىندا ءجۇرىپ وبلىستىق «جاس تۇلپار» وقۋشىلار ايتىسىنىڭ 3 دۇركىن جەڭىمپازى اتاندى, حالىقارالىق «مەن قازاقپىن» مەگاجوباسىنىڭ وبلىستىق ىرىكتەۋ سا­يىسىن­دا دارا شىعىپ, نۇرجان ناۋشاباي ۇلىنىڭ تاريح تاساسىندا قالىپ, ۇمىتىلىپ بارا جاتقان «كوكەن-اي» ءانىن تۇڭعىش رەت كوگىلدىر ەكران ارقىلى رەسپۋبليكا جۇرتشىلىعىنا تانىتتى.

شىعارماشىلىق كەش بارىسىندا ونەرپاز ارقانىڭ ءداستۇرلى اندەرى مەن «جورعاتاي» سىندى سازىندا سالقار ساعىنىش جاتقان التايدىڭ اندەرىن شىرقادى.

قىدىربەك – توبىل-تورعاي وڭىرىندە قوبىزبەن جىر ورىنداپ جۇرگەن جالعىز ونەرپاز. كەش قوناق­تارى ءانشىنىڭ ورىنداۋىندا تاتىقارا جىراۋ­دىڭ تولعاۋلارىن تۇڭعىش رەت تىڭدادى. كوپشىلىك كورەر­مەن الدىندا ونەر كورسەتكەن «اقجەلەڭ» فول­كلور­لىق-ەتنوگرافيالىق ءانسامبلى, وبلىستىق فيلار­مو­نيانىڭ انشىلەرى مەن تەاتر ارتىستەرى دە شى­عارماشىلىق كەشتىڭ مازمۇندى وتۋىنە اتسالىستى.

كەش سوڭىندا ءوڭىر زيالىلارى مەن مادەنيەت سالاسىنىڭ باسشىسى ونەرپازعا جىلى لەبىزدەرىن ءبىلدىردى.

– وسىدان وتىز جىل بۇرىن اتامەكەنگە ورالىپ, ەلمەن ەتەنە ارالاسىپ, وسى توبىل ءوڭىرىنىڭ بەل بالاسى بولىپ كەتكەن قىدىربەكتەي ازاماتىمىزدى سىزدەر بۇگىن تاعى دا سان قىرىنان تانىپ, ونەرىنە ءتانتى بولدىڭىزدار. ءالى تالاي قاپتىڭ تۇبىندە جاتقان حالىق قازىناسىن جارىققا شىعارىپ, كوپ­شىلىككە جارقىراتىپ كورسەتەتىنىنە كامىل سەنە­مىز. مىسالى, وسى وڭىردە كىندىك قانى تامعان, ءسوزى تۇگىلى, ءوزىن ۇمىتىلىپ بارا جاتقان تاتىقارا جىراۋدىڭ تول­عاۋلارىن زامانعا يكەمدەپ, دارىپتەپ ءجۇر. سون­داي-اق ىبىراي اتامىزدىڭ زامانداسى, قازاق­تىڭ تاق-تاق اقىنى نۇرجان ناۋشاباي ۇلىنىڭ دا نازىمدارى مەن اندەرىن ورىنداپ, ناسيحاتتاپ ءجۇر, – دەدى وبلىستىق مادەنيەت باسقارماسىنىڭ باسشىسى ەرلان قالماقوۆ.