سەنات دەپۋتاتتارى قارجى جانە بيۋدجەت كوميتەتىنىڭ كەڭەيتىلگەن وتىرىسىندا ازاماتتاردىڭ تولەم قابىلەتتىلىگىن قالپىنا كەلتىرۋ جانە بانكروتتىق تۋرالى زاڭ جوباسىن تالقىلادى, دەپ حابارلايدى Egemen.kz.
قۇجاتتا بورىشكەردىڭ سوتتان تىس بانكروتتىق راسىمدەرى ارقىلى تولەم قابىلەتتىلىگىن قالپىنا كەلتىرۋ مۇمكىندىگى كورسەتىلگەن. بۇل ءۇشىن سوتتان تىس بانكروتتىق راسىمىنەن ءوتۋدىڭ كىرىس ولشەمدەرىن, راسىمدەر قولدانىلعاننان كەيىن بورىشكەر مەن نەسيە بەرۋشى تاپ بولاتىن جاعدايلاردى, بورىشكەردىڭ مۇلكىن قالىپتاستىرۋ جانە ونى ءبولۋ تارتىپتەرىن بەلگىلەۋ ۇسىنىلادى.
وتىرىس بارىسىندا زاڭ جوباسىنداعى بورىشكەردىڭ سوتتان تىس بانكروتتىق راسىمنەن ءوتۋ كەزىندە شەتەلگە شىعۋىنا شەكتەۋگە قويۋعا, قاجەت بولعان جاعدايدا ەمدەلۋىنە, جاقىن تۋىسىن ەمدەلۋگە الىپ جۇرۋىنە, جاقىن تۋىسىن جەرلەۋگە تىيىم سالۋعا قاتىستى شارالاردى الىپ تاستاۋ ۇسىنىلدى.
كوميتەت دەپۋتاتتارى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپەلى زاڭ جوبالارىن دا قارادى.