يندۋستريا جانە ينفراقۇرىلىمدىق دامۋ مينيسترلىگىنىڭ «اشىق ساعات الاڭىندا» ەلىمىزدەگى تاس وڭدەۋ ونەركاسىبىنىڭ وزەكتى ماسەلەلەرى قارالدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
اتالعان كەڭەس يدم يندۋستريالىق دامۋ كوميتەتىنىڭ قۇرىلىس يندۋسترياسى جانە اعاش وڭدەۋ ونەركاسىبى باسقارماسىنىڭ باسشىسى مۇحامەد انداكوۆتىڭ توراعالىعىمەن ZOOM فورماتىندا ءوتتى.
قازىر قازاقستان نارىعىندا تاس ونىمدەرىن وندىرەتىن 15-تەن استام كاسىپورىن جۇمىس ىستەيدى. وسى جىلدىڭ 10 ايىندا ءوندىرىس كولەمى 658,4 مىڭ تونناعا جەتتى. وسى باعىتتا وندىرۋشىلەرمەن 2022 جىلدا اتقارىلعان جۇمىستاردىڭ ناتيجەسى تالقىلاندى. ۆەدومستۆو وكىلىنىڭ ايتۋىنشا, بيىل ەلىمىزدىڭ اۋماعىنا تەك سەرتيفيكاتتاۋدان وتكىزىلىپ, يمپورتتالعان تاس ونىمدەرىن (جيەكتەر, توسەنىشتەر, قابىرعا ماتەريالدارى جانە ت.ب.) اكەلۋ ماسەلەسى شەشىلدى.
سونداي-اق وتاندىق تاس ونىمدەرىن وندىرۋشىلەردى قولداۋ ماقساتىندا وسى جىلدىڭ 24-ءشى تامىزىنان باستاپ ۇكىمەتتىڭ №606 قاۋلىسى كۇشىنە ەنىپ, سوعان سايكەس تەك وتاندىق وندىرۋشىلەرگە عانا مەملەكەتتىك ساتىپ الۋلارعا قاتىسۋ مۇمكىندىگى بەرىلىپ وتىر.