ماڭدايعا باسقان زيالىلارىمىزدىڭ جالعاسى, تاۋەلسىزدىك جىلدارداعى ۇلت جوقشىسى امانگەلدى ايتالى باقيعا وزدى.
تۋعان ەلىنىڭ ءساتتى قادامىنا ءسۇيىنىپ, جازا باسقان جولىنا كۇيىنىپ, وسىنى تالداپ-تارازىلاي ءبىلۋ – ازاماتتىڭ ازاماتى كوتەرەتىن اۋىر دا جاۋاپتى جۇك بولسا, 90-جىلداردىڭ سوڭىنان باستاپ وسى تاعدىر ابەكەڭە بۇيىرىپتى.
ازات ەلىمىزدىڭ تاريحىندا امانگەلدى ءابدىراحمان ۇلى قاسيەتى حالىقتىڭ «پارلامەنت دەپۋتاتى قانداي بولۋ كەرەك؟» سۇراعىنا جاۋاپ سەكىلدى كورىنەدى. ونىڭ ءار كەزەڭدە ەلدىك مىنبەر مەن باسپاسوزدەن سويلەگەن ءسوزى ۇلتىمىزدىڭ بەس ساۋساقتاي بىرىگىپ, جۇدىرىقتاي جۇمىلعان قۋاتتى بولۋىنا باعىتتالدى. بايىپتى ويى, پاراساتتى تۇجىرىمى, دالەلدى ۇسىنىسى ناعىز عالىم ەكەنىن ايقىنداپ تۇراتىن.
حالىق «ايتارى بار ايتالى» دەپ شىنايى جاقسى كوردى. جۇرتتىڭ مۇڭىن مۇڭداپ, جوعىن جوقتاعان رياسىز تۇلعانى ەل دە جازباي تانيدى عوي. ازاماتتىق قوعامنىڭ باستاۋىندا تۇرعان امانگەلدى ايتالى ەڭبەگىنە ساياساتتانۋشى قاۋىم بۇگىن دە, كەيىن دە ءادىل باعا بەرەدى دەپ ويلايمىز. ەڭ باستىسى, ول حالىق مۇددەسىمەن ءومىر ءسۇردى...
ابەكەڭ «Egemen Qazaqstan» گازەتىمەن تىعىز بايلانىس ورناتىپ, قوعامنىڭ كۇردەلى ماسەلەلەرىنىڭ استارىنا بويلاپ, ساناعا ساۋلە تۇسىرەتىن ماقالا جولداپ وتىراتىن. كەشەگى «قاڭتار قاسىرەتى» كەزىندە دە ازاماتتىق ويىن وقىرمانعا العاۋسىز جەتكىزدى. الەمدى دۇربەلەڭگە سالعان قىرعي قاباق كيكىلجىڭنىڭ سەبەپ-سالدارى مەن ساباعىن تالداعان ماقالاسىن وسىدان ءبىر اپتا عانا بۇرىن جاريالاعان ەدىك. بۇل باق-تا باسىلعان عالىمنىڭ سوڭعى وسيەتىندەي ەكەن-اۋ... اللا-تاعالا تۇلعانىڭ ەڭ اقىرعى ءسوزىنىڭ دە – ەل اماندىعى بولۋىن جازعان ەكەن.
ۇلت جولىندا اقتىق دەمى ۇزىلگەنشە ادال قىزمەت ەتكەن امانگەلدى ايتالى ەسىمى ەلىمەن بىرگە جاساي بەرەدى. ەندى ول ەلشىل, بىلىكتى قايراتكەرلىك قاسيەتتىڭ بالاماسىنا اينالادى. قازاقتىڭ بايتاق دالاسى مارقۇمدى جوقتاي وتىرىپ, ەلگە قىزمەت ەتۋدەگى امانگەلدى ايتالى ونەگەسىن ۇرپاققا – جاڭا بۋىنعا اماناتتايدى.
باقۇل بولىڭىز, بار قازاقتىڭ جوقشىسى!
«Egemen Qazaqstan» قالامگەرلەرى