2022 جىلدىڭ 10 ايىندا قازاقستان مەن وزبەكستان اراسىنداعى ءوزارا ساۋدا قاتىناسى 4,1 ملرد دوللاردى قۇراپ, 35%-عا ءوستى. بۇل تۋرالى قازاقستان پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين تاشكەنتتە وتكەن 4-ءشى وڭىرارالىق وزبەك-قازاق بيزنەس-فورۋمى بارىسىندا حابارلادى.
فورۋم پلەنارلىق وتىرىسپەن اشىلدى. وعان قازاقستان پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين مەن وزبەكستان پرەمەر-ءمينيسترىنىڭ ورىنباسارى – ينۆەستيتسيالار جانە سىرتقى ساۋدا ءمينيسترى جامشيد حودجاەۆ قاتىستى.
«وزبەكستان – ورتالىق ازياداعى باستى جانە ۇزاقمەرزىمدى سەرىكتەس. ءبىزدىڭ دوستىق قارىم-قاتىناسىمىزدىڭ لوكوموتيۆى – ەلدەر اراسىنداعى ءوزارا دامىپ كەلە جاتقان ساۋدا. قازاقستان ورتالىق ازيا ترەگىندە بىرلەسكەن قىزمەتتى دامىتۋعا اسا ءمان بەرەدى. فورۋمدى وتكىزۋ – وڭىرلىك كووپەراتسيانى دامىتۋدىڭ جانە الەمدىك نارىقتا ورتالىق ازيا برەندىن قالىپتاستىرۋدىڭ ماڭىزدىلىعىنىڭ تاعى ءبىر دالەلى», دەدى س.جۇمانعارين.
ءوز كەزەگىندە ج.حودجاەۆ حالىقارالىق نارىققا بىرلەسىپ شىعۋعا قوسىلعان قۇنى جوعارى ءونىمدى شىعارۋ ءۇشىن ونەركاسىپتىك كووپەراتسيانى دامىتۋ, باسىمدىقتار نەگىزىندە جوعارى تەحنولوگيالىق وندىرىستەر قۇرۋ جونىندەگى كۇش-جىگەردى بىرىكتىرۋ اسا ماڭىزدى ەكەنىن اتاپ ءوتتى.
«بىرلەسكەن ءوزارا ءتيىمدى جوبالاردى ودان ءارى ۇلعايتۋدىڭ الەۋەتى مول. بۇل ءۇشىن قاجەتتى رەسۋرستاردىڭ ءبارى بار – وندىرىستىك, تەحنولوگيالىق, كادرلىق جانە تابيعي رەسۋرستار. ۇيىمداسقان, بىرلەسكەن جۇمىس ارقىلى ءبىز وزبەك-قازاق سەرىكتەستىگىن ساپالى جاڭا دەڭگەيگە شىعارا الاتىنىمىزعا سەنىمدىمىن», دەدى وزبەكستاننىڭ ۆيتسە-پرەمەرى.
قازىرگى ۋاقىتتا وزبەكستان پرەزيدەنتى شاۆكات ميرزيەەۆتىڭ 2021 جىلعى جەلتوقسانداعى قازاقستانعا مەملەكەتتىك ساپارىنىڭ قورىتىندىسى بويىنشا ەكى ەل ۇكىمەتتەرىنىڭ الدىندا ساۋدا كولەمىن 10 ملرد دوللارعا دەيىن جەتكىزۋ مىندەتى تۇر. «ورتالىق ازيا» حالىقارالىق ونەركاسىپتىك كووپەراتسيا ورتالىعىن قۇرۋ جوباسى اتالعان كورسەتكىشكە قول جەتكىزۋ جونىندەگى پراكتيكالىق ءىس-قيمىل جوسپارىنىڭ نەگىزگى ەلەمەنتى. ونىڭ ماقساتى – ءۇشىنشى ەلدەردىڭ نارىقتارىنا ەكسپورتتاۋعا ارنالعان بىرلەسكەن ءونىم جاساۋ ءۇشىن «سولتۇستىك-وڭتۇستىك» ورتالىق ازيا ەكونوميكالىق ءدالىزىنىڭ نەگىزگى الاڭىنا اينالۋ.
ەكى ەل اراسىنداعى ونەركاسىپتىك كووپەراتسيا شەڭبەرىندە جالپى سوماسى 2,2 ملرد دوللارعا 38-دەن استام جوبا جوسپارلانعان, 11 مىڭعا جۋىق جۇمىس ورنى اشىلادى. سونىڭ ىشىندە 10 بىرلەسكەن جوبا ىسكە اسىرىلدى, ونىڭ جارتىسى قازاقستان اۋماعىندا. قالعانى بويىنشا بەلسەندى جۇمىس جۇرگىزىلۋدە.
فورۋمدا ءسوز سويلەگەن س.جۇمانعارين ەكى ەلدىڭ ەكونوميكاسىنا تارتىلاتىن شەتەلدىك ينۆەستيتسيالاردىڭ ەرەكشە ءرولىن اتاپ ءوتتى. 2005 جىلدان باستاپ 2022 جىلدىڭ ەكىنشى توقسانىنا دەيىن وزبەكستاننان قازاقستانعا تىكەلەي شەتەلدىك ينۆەستيتسيالاردىڭ جالپى اعىنى 22,7 ملن دوللاردى قۇرادى, بۇل رەتتە وزبەكستان ەكونوميكاسىنا قۇيىلعان قازاقستاندىق ينۆەستيتسيا كولەمى وسى كەزەڭدە 560 ملن دوللاردى قۇرادى.
ء«ار ەل ەكونوميكاسىنىڭ شاعىن كولەمىن جەكە ەسكەرە وتىرىپ, ورتالىق ازيا ءوڭىرى حالىقارالىق كاپيتالدى تارتۋ ماسەلەلەرىندە ءبىرتۇتاس ايماق بولۋعا ءتيىس دەپ سانايمىن. ول ءۇشىن قازاقستاندا «استانا» حالىقارالىق قارجى ورتالىعىنىڭ الاڭى, ينۆەستيتسيالىق پرەفەرەنتسيالاردى قامتيتىن بارلىق قاجەتتى ينفراقۇرىلىم قۇرىلدى. ءبىز ينۆەستورلار ءۇشىن قاقپا بولۋعا دايىنبىز», دەدى قازاقستان پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى بيزنەس-فورۋمعا قاتىسۋشىلارعا.
سونداي-اق ول قازاقستان قولايلى ينۆەستيتسيالىق احۋالدى قالىپتاستىرۋ جونىندەگى جۇمىستى جالعاستىراتىنىن اتاپ ءوتىپ, وزبەك كومپانيالارىن بىرلەسكەن جوبالاردى ىسكە اسىرۋعا قاتىسۋعا شاقىردى.
بيزنەس-فورۋمنىڭ قورىتىندىسى بويىنشا س.جۇمانعارين مەن ج.حودجاەۆ ەكى ەلدىڭ ۋاكىلەتتى ورگاندارى باسشىلارىنىڭ قاتىسۋىمەن ەكىجاقتى كەزدەسۋ وتكىزدى, وندا ەكونوميكانىڭ ءتۇرلى سەكتورلارىنداعى ىنتىماقتاستىقتىڭ جەكەلەگەن ماسەلەلەرى ەگجەي-تەگجەي پىسىقتالدى.