ماۋلەن اشىمباەۆ اقش ەلشىسىمەن كەزدەستى

سەنات سپيكەرى ەلشى دەنيەل روزەنبليۋمدى قازاقستانداعى جۇمىسىنىڭ باستالۋىمەن قۇتتىقتادى. سونداي-اق ول ەلىمىزدىڭ اقش-پەن ىنتىماقتاستىعى ءبىزدىڭ مەملەكەتتىڭ سىرتقى ساياساتتاعى, ونىڭ ىشىندە پارلامەنتارالىق بايلانىس بويىنشا اسا ماڭىزدى باعىتتارىنىڭ ءبىرى ەكەنىن ايتتى.

ء«بىز پارلامەنتارالىق ديالوگتى ەلدەرىمىز اراسىنداعى ستراتەگيالىق سەرىكتەستىكتىڭ اجىراماس بولىگى رەتىندە قاراستىرامىز. پارلامەنتشىلەرىمىزدىڭ ساپارلارى ءوزارا ىنتىماقتاستىعىمىزعا وڭ سەرپىن بەرەدى», دەدى ماۋلەن اشىمباەۆ.

كەزدەسۋدە تاراپتار پارلامەنتارالىق قارىم-قاتىناستى جانداندىرۋ ماسەلەسىنە نازار اۋداردى. سەنات توراعاسىنىڭ ايتۋىنشا, امەريكاندىق كونگرەسسمەندەردىڭ قازاقستانعا ساپارى ولارعا ءبىزدىڭ ەلدە جانە وڭىردە بولىپ جاتقان وقيعالارمەن تىكەلەي تانىسۋعا, سونداي-اق, ەكىجاقتى ءوزارا ءىس-قيمىلدى ارتتىراتىن ناقتى قادامداردى ايقىنداۋعا مۇمكىندىك بەرەدى.

سونىمەن قاتار ماۋلەن اشىمباەۆ قازاقستان پرەزيدەنتى قاسىم-جومارت توقاەۆتىڭ باستاماسىمەن ەلىمىزدە جۇرگىزىلىپ جاتقان اۋقىمدى ساياسي جاڭعىرتۋلاردىڭ ناتيجەلەرىنە توقتالدى.

«قازىرگى تاڭدا پارلامەنت جانە بيلىكتىڭ جەرگىلىكتى وكىلدى ورگاندارى كۇشەيتىلىپ جاتىر. ءبىز ءتيىمدى, تاۋەلسىز جانە جۇمىس ىستەيتىن وكىلدى ورگاندارسىز تەڭگەرىمدى دەموكراتيالىق ساياسي جۇيە قۇرۋ مۇمكىن ەمەس دەگەن قاعيداعا تابان تىرەيمىز. بۇگىندە سەنات جۇمىسىنداعى نەگىزگى باسىمدىق – پرەزيدەنتىمىز جۇرگىزىپ وتىرعان ساياسي جانە ەكونوميكالىق رەفورمالاردى زاڭنامالىق تۇرعىدان قامتاماسىز ەتۋ», دەدى ماۋلەن اشىمباەۆ.

ءوز كەزەگىندە ەلشى قازاقستاندا جۇرگىزىلىپ جاتقان قوعامدىق-ساياسي جاڭعىرۋلاردى جوعارى باعالاپ, امەريكاندىق كومپانيالار بىرقاتار باعىت بويىنشا بىرلەسكەن جوبالاردى ىسكە اسىرۋعا مۇددەلى ەكەنىن جەتكىزدى.

كەزدەسۋ سوڭىندا پالاتا توراعاسى ماۋلەن اشىمباەۆ پارلامەنت سەناتى قازاقستان مەن اقش اراسىنداعى قارىم-قاتىناستى ودان ءارى نىعايتۋ ءۇشىن قاجەتتى جۇمىستى ءارى قاراي جالعاستىرا بەرەتىنىن ايتتى.