«باي-قۋاتتى بولايىق» دەپ حالقىنىڭ جۇرەگىنە جول سالعان جامپوز جۋرناليست نۇرتىلەۋ يمانعالي ۇلىن بىلمەيتىن قازاق جوق شىعار! اقپارات سالاسىنىڭ قارا نارىنا اينالعان بىرەگەي تۇلعا كوزى تىرىسىندە ەل رۋحانياتىنا سۇبەلى ۇلەس قوسىپ, ۇلت تەلەجۋرناليستيكاسىنىڭ قالىپتاسۋىنا بار قاجىر-قايراتىن جۇمسادى.
تەلەديداردىڭ الدىندا يمانعالي ۇلىن كورۋگە جيىلاتىن جۇرت. سونىڭ ءبارى كەشە عانا سياقتى ەدى. تەرسىڭدى ەڭبەك, تەلەگەي تەر شۇمەكتەتىپ ەڭبەك ەتكەن ول مۇحيت باۋىرىنان مارجان سۇزگەندەي مىڭجىلدىقتاردان بەرگى قۇندىلىقتاردى جۋرناليستىك قارىمى مەن دارىنىنا ۇشتاستىرىپ, ۇلت پەرزەنتىنە اينالدى. عاسىر قالىپتاستىرعان, جىلدار سومداعان تۇعىرلى تۇلعالار ساپىنان وسىلايشا ويىپ ورىن, تەۋىپ تۇعىر سايلاعان نۇرتىلەۋ يمانعالي ۇلىنىڭ تۋعانىنا 70 جىل تولۋىنا وراي «باي-قۋاتتى بولايىق!» كورمەسى ۇيىمداستىرىلدى.
ارقا توسىندەگى اجارلى استانامىزدان باستاۋ العان يگىلىكتى ءىس-شارانىڭ جالعاسى سەمەي, شىمكەنت, اتىراۋ, اقتاۋدا وتكەن بولاتىن. تالدىقورعان قالاسىنداعى م.تىنىشپاەۆ اتىنداعى تاريحي-ولكەتانۋ مۋزەيىندە جىل بويى وتكەن كورمەنىڭ قورىتىندىسى رەتىندە ۇيىمداستىرىلعان ءىس-شارا شىمىلدىعىن جەتىسۋ وبلىسىنىڭ اكىمى بەيبىت يساباەۆ قۇتتىقتاۋ سوزبەن اشتى.
«نۇرتىلەۋ اعامىز جۋرناليستيكا سالاسىندا لايىقتى ورنى بار, وزىندىك سۇرلەۋ-سوقپاعىن قالىپتاستىرعان كانىگى مامان بولاتىن. ونىڭ ەسىمى ەل اراسىندا ايتىلسا بولدى, قالىڭ جۇرتشىلىق نۇرتىلەۋ يمانعالي ۇلىنىڭ ءوزى جۇرگىزگەن تەلەۆيزيالىق تۋىندىلارىن «باي-قۋاتتى بولايىق!» دەپ اياقتايتىنىن بىردەن ەسكە الىپ جاتادى. وعان دا نەگىز بار. سەبەبى بولمىس-ءبىتىمى وسى ۇعىممەن ابدەن استاسىپ تۇراتىنداي ەدى. «بەتپە-بەت», «قولتاڭبا», «دىڭگەك», «كورشىلەر», «زاڭ سويلەسىن», «Nur-Tiley» سەكىلدى اۆتورلىق حابارلارى كورەرمەننىڭ ۇزبەي كورەتىن باعدارلامالارىنا اينالدى. سول ارقىلى حالىقتىڭ سۇيىسپەنشىلىگىنە بولەنىپ, العىسىن ارقالادى. ءومىرىنىڭ سوڭىنا دەيىن قازاق تەلەۆيزياسىنىڭ تۇتاس ءبىر بۋىنىن تاربيەلەپ, جۋرناليستيكانىڭ دامۋىنا ولشەۋسىز ۇلەس قوستى دەسەم, ارتىق ايتقاندىق ەمەس», دەگەن ءوڭىر باسشىسى ءوز كەزەگىندە ارىپتەس بولىپ قىزمەت ەتكەن جىلدارداعى ەستەلىكتەرىمەن ءبولىستى.
جامپوز ءجۋرناليستىڭ ادامگەرشىلىك قاسيەتىن, پاراساتى مەن بيىك ۇستانىمىن اڭگىمەگە ارقاۋ ەتتى. سونىمەن قاتار نۇرتىلەۋ يمانعالي ۇلىنىڭ زايىبى قارلىعاش سوۆەتبەكقىزى مەن كورمەنى ۇيىمداستىرۋعا اتسالىسقان قازاقستاننىڭ ەڭبەك سىڭىرگەن قايراتكەرى امانتاي بەرعاليەۆكە العىسحات تابىس ەتىپ, يىعىنا زەرلى شاپان جاپتى.
جەتىسۋ وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ قولداۋىمەن جانە م.تىنىشپاەۆ اتىنداعى تاريحي-ولكەتانۋ مۇراجايىنىڭ باستاماسىمەن وتكەن بۇل كوشپەلى كورمەگە بارلىعى 200 ەكسپونات قويىلعان. نۇرتىلەۋ يمانعالي ۇلىنىڭ كوزى تىرىسىندە پايدالانعان جەكە زاتتارى, جۇمىس قۇرالدارى, سپورتتا جەتكەن جەتىستىكتەرى, قىزمەتتىك كۋالىكتەرى, كىتاپ, ساعاتتارى سىندى جەكە زاتتارى كورەرمەن نازارىنا ۇسىنىلدى.
جيىندا اتىراۋ وبلىسىنىڭ قۇرمەتتى ازاماتى امانتاي بەرعاليەۆ, تۇلعانىڭ زايىبى قارلىعاش سوۆەتبەكقىزى, «جەتىسۋ» تەلەارناسىنىڭ ديرەكتورى سەرىك سارىباەۆ, مەملەكەت جانە قوعام قايراتكەرى, «قابانباي باتىر» قورىنىڭ توراعاسى كامال ابدراحمانوۆ ءسوز سويلەپ, بىرەگەي تۇلعانىڭ عيبراتتى عۇمىرىنان سىر شەرتتى. ال جەتىسۋلىق اقىن زيراگۇل نۇردانبەكقىزى كەمەل ويلى جۋرناليستكە ارناعان ولەڭىن وقىدى.
ايتا كەتسەك, اتالعان كورمەنى قالا تۇرعىندارى مەن قوناقتارى 30 جەلتوقسانعا دەيىن تاماشالاي الادى. سونىمەن قاتار تۇلعانىڭ ەسىمىن تۋعان جەرىندە ماڭگىلىك قالدىرۋ ماقساتىندا كەلەسى جىلدان باستاپ يگىلىكتى ىستەر قولعا الىنباق. الدىمەن مايتالمان ءجۋرناليستىڭ ءومىرى مەن شىعارماشىلىعى تۋرالى تولىمدى كىتاپ جوسپاردا تۇر.
جەتىسۋ وبلىسى