كەشە «Amanat» پارتياسى « ۇلى دالا» رەسپۋبليكالىق شىعارماشىلىق بايقاۋىن قورىتىندىلادى. ۇلت ۇستازى احمەت بايتۇرسىن ۇلىنىڭ 150 جىلدىعىنا جانە جازۋشى مۇحتار اۋەزوۆتىڭ 125 جىلدىعىنا ارنالعان ادەبي بايقاۋدىڭ «پوەزيا» اتالىمىندا «Egemen Qazaqstan» قىزمەتكەرى جانىبەك ءاليمان ۇزدىك شىقتى. سونىمەن قاتار تاعى ءبىر ارىپتەسىمىز اباي ايماعامبەت ارنايى سىيلىققا يە بولدى.
ءىس-شارانى اشقان «Amanat» پارتياسىنىڭ توراعاسى ەرلان قوشانوۆ الداعى ۋاقىتتا بۇل جوبانىڭ اياسىن كەڭەيتىپ, اۋداندىق, وبلىستىق, سودان كەيىن رەسپۋبليكالىق دەڭگەيدە وتكىزۋدى ۇسىندى.
«نەبىر تۋما تالانتتار اۋىلداردا ءجۇر. « ۇلى دالا» بايقاۋى سول تالانتتاردىڭ تۇلەپ ۇشار ۇياسىنا اينالۋعا ءتيىس. قازاق ادەبيەتىنىڭ كەلەشەگى تەك شىعارماشىلىق قاۋىمدى عانا ەمەس, بارشامىزدى الاڭداتادى. ادەبيەتتىڭ بولاشاعى – ۇلتتىڭ بولاشاعى. سوندىقتان جاڭا داۋىردە جاڭا ەسىمدەر كەرەك. تەك ولاردى ىزدەپ-تاۋىپ, قامقورلىق كورسەتۋ قاجەت. جاستاردى ىنتالاندىرىپ, جولىن اشۋ ءۇشىن «Amanat» پارتياسى وسى بايقاۋدى ۇيىمداستىرىپ وتىر», دەدى ەرلان قوشانوۆ.
ايتا كەتەيىك, 26 تامىز بەن 10 قاراشا ارالىعىندا بايقاۋعا باس-اياعى 152 شىعارما كەلىپ ءتۇستى. ونىڭ بارلىعى aikyn.kz سايتىندا ارنايى اشىلعان « ۇلى دالا بايقاۋى» ايدارىندا بۇركەنشىك ەسىممەن جاريالانىپ وتىردى.
«تولقىندى تولقىن قۋادى. كەشەگى اعا بۋىننىڭ, بۇگىنگى ورتا بۋىننىڭ ءىزىن جالعايتىن تالانتتارىمىز ادەبيەت ايدىنىندا از ەمەس. سول سەبەپتى دارىندى جاستاردىڭ سۋىرىلىپ العا شىعۋى – زاڭدىلىق. بايقاۋدىڭ باستى ماقساتى – جاس قالامگەرلەردى ىنتالاندىرۋ, قاناتتاندىرۋ. سوندىقتان بۇل بايقاۋ الداعى ۋاقىتتا دا جالعاسىن تابادى», دەدى ءماجىلىس دەپۋتاتى, قازىلار القاسىنىڭ توراعاسى امانجول ءالتاي.
سونىمەن, «پوەزيا» اتالىمى بويىنشا ءبىرىنشى ورىندى جانىبەك ءاليمان, ەكىنشى ورىندى شاپاعات ءابدىر ۇلى, ءۇشىنشى ورىندى تاڭساۋلە اگەنقىزى يەلەندى.
«پروزا» اتالىمىندا ءبىرىنشى ورىنعا ءاليحان جاقسىلىق, ەكىنشى ورىنعا ءادىل اۋەزحانوۆ, ءۇشىنشى ورىنعا ايزات راقىشەۆا لايىقتى دەپ تانىلدى.
«بالالارعا ارنالعان شىعارما» اتالىمى بويىنشا ءبىرىنشى ورىندى الپىسباي ءابدىل ۇلى, ەكىنشى ورىندى قۇرالاي وماروۆا, ءۇشىنشى ورىندى ايسۇلۋ ءالماش قانجىعالادى.
«دراماتۋرگيا» اتالىمىندا ءبىرىنشى ورىندى ىقىلاس شالعىنباي, ەكىنشى ورىندى اقليما ساپاروۆا, ءۇشىنشى ورىندى توقتارالى تاڭجارىق جەڭىپ الدى.
سونىمەن قاتار بيىل تۇڭعىش رەت تاعايىندالعان «الاش اماناتى» ارنايى سىيلىعىن الاشتانۋشى-زەرتتەۋشى, بالالار جازۋشىسى ەلدوس توقتارباي, «احمەت بايتۇرسىن ۇلىنىڭ 150 جىلدىعىنا ارنالعان» ارنايى سىيلىقتى اقىن, جازۋشى, كينوستسەناريست ۇلاربەك نۇرعالىم ۇلى يەلەندى. ال «مۇحتار اۋەزوۆتىڭ 125 جىلدىعىنا ارنالعان» ارنايى سىيلىقتى جازۋشى اباي ايماعامبەت جەڭىپ الدى.
«كەز كەلگەن بايقاۋ جارق ەتىپ جاريالانعاندا ەمەس, داستۇرگە اينالعان كەزدە وعان اۆتورلار دايىندىقپەن كەلىپ, ءوز جەمىسىن بەرە باستايدى. بيىل بۇل شىعارماشىلىق بايگە احمەت بايتۇرسىن ۇلىنىڭ 150 جىلدىعىنا ارنالعاننان كەيىن اۆتورلارعا ونىڭ جاۋاپكەرشىلىك جۇگى جەڭىل بولماعانى انىق. ادەبيەت – تۇتاس قوعاممەن ۇشتاسىپ جاتقان دۇنيە. سوندىقتان ادەبيەتتى قولداۋ – تەك رۋحانياتتى قولداۋ ەمەس, جالپى قوعامنىڭ وڭ بەتبۇرىسىنا اسەر ەتۋ دەگەن ءسوز», دەدى ۇلاربەك نۇرعالىم ۇلى.
سونداي-اق پارتيانىڭ ورتالىق اپپاراتىندا وتكەن ءىس-شارادا قوستاناي وبلىسىنىڭ تورعاي اۋىلىنداعى «ا.بايتۇرسىن ۇلى مەن م.دۋلات ۇلىنىڭ ادەبي مۋزەيىنىڭ» قىزمەتكەرلەرى كورمە ۇيىمداستىردى. وندا ۇلت ۇستازى تۇتىنعان زاتتار, قۇندى جادىگەرلەر, قايراتكەر شىعارمالارىنىڭ تۇپنۇسقاسى جانە ت.ب زاتتار قويىلدى.