ەلدەگى جەو-لاردا ساپالى جوندەۋ جۇرگىزىلمەگەن- ۇكىمەت باسشىسى

ء«بىز قىركۇيەك ايىندا وسى ماسەلەگە قاتىستى ارنايى ۇكىمەت وتىرىسىن وتكىزگەنبىز. سول كەزدە اكىمدىكتەر جىلۋ بەرۋ ماۋسىمىنا ساقاداي سايمىز, دايىنبىز دەدى. اكىمدەر ەشقانداي پروبلەما جوق دەپ باياندادى. الايدا جالاڭ ەسەپ پەن جالعان اقپاراتتىڭ سوڭى تاريحتا بولماعان سوراقى جاعدايعا الىپ كەلدى. ەكى ايدىڭ ىشىندە ەكى بىردەي ءىرى اپات بولدى. ريددەر مەن ەكىباستۇزدا. سونىمەن بىرگە وسكەمەن, رۋدنىي, تەمىرتاۋ, سەمەي, اقتاۋ جانە پاۆلودار قالالارىنىڭ جىلۋ بەرۋ جۇيەسىندە دە قاۋىپتى جاعدايلار ورىن الدى», دەدى ءا.سمايىلوۆ.

پرەمەر-مينيستر جىلۋ بەرۋ جۇيەلەرى مەن ينجەنەرلىك جەلىلەردىڭ تۇراقتى جۇمىسىن قامتاماسىز ەتۋ ءۇشىن جاعدايدى قاتاڭ باقىلاۋدا ۇستاۋدى تاپسىردى.

«شۇعىل شارالاردى قابىلداۋ قاجەت. ولاردى كەيىنگە شەگەرۋگە بولمايدى. تەكسەرۋلەر باستالدى. وڭىرلەردەگى ناقتى جاعداي بۇعان دەيىن بەرىلگەن اقپاراتتان دا ناشار بولىپ شىقتى. پروبلەمالار جاسىرىلىپ كەلدى. بولىنگەن قارجى جەتكىلىكسىز بولعاندىقتان, جاڭعىرتۋ مەن ساپالى جوندەۋ جۇرگىزىلمەگەن. ستانتسيالار مەن جەلى يەلەرى جەتكىلىكتى ينۆەستيتسيا سالماعان. قاراۋسىز جاتقان جەلىلەردىڭ ماسەلەسى دە شەشىمىن تاپقان جوق. بىزدە قىس ايلارى وتە قاتال. ياعني, اپاتتار بۇعان دەيىن دە بولىپ تۇردى. بىراق ولار سانى جاعىنان دا, اۋقىمى جاعىنان دا مۇنداي بولعان ەمەس. ءباسپاسوز بەن الەۋمەتتىك جەلىدەگى شاعىمدارعا قاراڭىزدار. بارلىق وڭىردەن مىڭداعان شاعىم بار. بۇل ءبىر كۇننىڭ عانا پروبلەماسى ەمەس. جىلدار بويى قوردالانىپ كەلدى». جەلىلەردىڭ تەحنيكالىق جاعدايىن تەكسەرۋدى جالعاستىرۋ كەرەك», دەپ اتاپ ءوتتى ۇكىمەت باسشىسى.

ءاليحان سمايىلوۆ ەنەرگەتيكا مينيسترلىگىنە ەلەكتر ستانتسيالارىن تەكسەرۋدى 2023 جىلدىڭ ءى توقسانىندا اياقتاۋدى تاپسىردى.

بۇل سالادا قالىپتاسقان ناقتى جاعدايدى ءبىلۋ ءۇشىن تەكسەرۋ جۇمىستارى ساپالى ءارى ەشقانداي بۇرمالاۋسىز, شىنايى ءجۇرۋى ءتيىس. كەلەسى جىلدان باستاپ جىلۋ جەلىلەرىن جوندەۋ بويىنشا اۋقىمدى باعدارلاما باستالادى. ءبىرىنشى كەزەكتە توزۋ دەڭگەيى 70%-تەن اسىپ كەتكەن جىلۋ جەلىلەرى اۋىستىرىلادى. مۇنداي جەلىلەر 1600 كم. ەكىنشى كەزەڭدە 4 مىڭ كيلومەترگە جۋىق جەلى جاڭارتىلادى.