پرەمەر-ءمينيستردىڭ ورىنباسارى التاي كولگىنوۆتىڭ توراعالىعىمەن وتكەن كەڭەستە اۋىلدىق ەلدى مەكەندەردى مەديتسينالىق وبەكتىلەرمەن قامتاماسىز ەتۋ ماسەلەلەرى تالقىلاندى.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2023-2025 جىلدار ارالىعىندا ەلىمىزدىڭ وڭىرلەرى مەن شالعاي اۋىلداردا 655 العاشقى مەديتسينالىق-سانيتارلىق كومەك نىسانى سالىنادى. ولاردىڭ ىشىندە 253 مەديتسينالىق پۋنكت, 160 دارىگەرلىك امبۋلاتوريا, 242 فەلدشەرلىك-اكۋشەرلىك پۋنكت بار. مىسالى, قاراعاندى وبلىسىندا 92 العاشقى مەديتسينالىق-سانيتارلىق كومەك نىسانىن, اباي وبلىسىندا 65 نىسان, جەتىسۋ وبلىسىندا 59 نىسان, اقمولا جانە الماتى وبلىستارىندا 38 نىساننان جانە ت.ب. سالۋ جوسپارلانىپ وتىر.
«اۋىلدار مەن شالعاي اۋدانداردىڭ تۇرعىندارى وبلىس ورتالىقتارى مەن قالالارعا بارىپ, مەديتسينالىق كومەك الۋ ءۇشىن شاقىرىمداپ جول جۇرۋگە ءماجبۇر. بۇل جەردە ۋاقتىلى مەديتسينالىق كومەك كورسەتۋ ماسەلەسى جايىنا قالىپ وتىر. اۋىلدار مەن شالعاي اۋداندار تۇرعىندارىنىڭ ساپالى مەديتسينالىق كومەك الۋىن, ونىڭ ىشىندە «التىن ساعات» ىشىندە كومەك كورسەتىلۋىن قامتاماسىز ەتۋ قاجەت. وسىعان بايلانىستى مەملەكەت باسشىسىنىڭ تاپسىرماسى بويىنشا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى ازىرلەندى. جوسپارلانعان 655 جاڭا نىساننىڭ 20-سى مەديتسينالىق نىسانى مۇلدەم جوق اۋىلداردا سالىنباق. وسى ۋاقىتقا دەيىن مەديتسينالىق نىساندارعا ارنالعان ارنايى عيماراتتارى بولماعان اۋىلداردا جانە شالعاي اۋدانداردا تاعى 208 مەديتسينالىق نىسان سالىنادى. قازىردىڭ وزىندە اپاتتى جاعدايدا تۇرعان قولدانىستاعى نىسانداردىڭ ورنىنا 420-عا جۋىق نىسان تۇرعىزىلماق», دەدى ا.كولگىنوۆ.
ۇلتتىق جوبانى ىسكە اسىرۋ ناتيجەسىندە شامامەن 1 ملن اۋىل تۇرعىنىن العاشقى مەديتسينالىق-سانيتارلىق كومەكپەن قوسىمشا قامتۋ كوزدەلىپ وتىر. سونداي-اق شۇعىل جانە مامانداندىرىلعان مەديتسينالىق كومەك ۋاقتىلى كورسەتىلمەك.
وڭىرلەردىڭ اكىمدىكتەرىنە جانە دەنساۋلىق ساقتاۋ مينيسترلىگىنە جەر ۋچاسكەلەرىن ءبولۋ, ولارعا ينجەنەرلىك-كوممۋنيكاتسيالىق ينفراقۇرىلىمدى جۇرگىزۋ, 2023 جىلدان باستاپ وبەكتىلەردىڭ قۇرىلىسىن باستاۋ تاپسىرىلدى.