ەلىمىزدە «رەسپۋبليكا» پارتياسى رەسمي تۇردە تىركەلدى. بۇل تۋرالى ءماجىلىس وتىرىسىندا ادىلەت ءمينيسترى قانات مۋسين ايتتى, دەپ حابارلايدى Egemen.kz.
ءمينيستردىڭ ايتۋىنشا, بۇل بارلىق قۇقىقتارى بار پارتيا.
«بۇگىنگى كۇنى «بايتاق» جانە «رەسپۋبليكا» پارتيالارى تىركەلدى. بۇل تولىقتاي تىركەلگەن پارتيالار, ولاردىڭ بارلىق قۇقىقتارى بار. باسقا پارتيالارمەن جۇمىس جالعاسۋدا, ولار ءالى ءبىرىنشى كەزەڭنەن وتكەن جوق. سەبەپتەرى ءبىر - قۇجاتتارى ءتيىستى تالاپتارعا سايكەس كەلمەيدى», دەدى ادىلەت ءمينيسترى قانات مۋسين.
پارتيانىڭ قۇرىلتايشىلارى مەن جەتەكشىلەرى قازاقستاندىق بەلگىلى كاسىپكەرلەر مەن قوعام قايراتكەرلەرى.
«رەسپۋبليكا» پارتياسىنىڭ توراعاسى بولىپ ايداربەك حودجانازاروۆ, تەڭ توراعا بولىپ سىرىمبەك تاۋ, رۋسلان بەردەنوۆ, ماكسيم بارىشەۆ, دينارا شۇكىجانوۆا, قۋانىش شونباي, بەيبىت الىبەكوۆ جانە نۇرلان قويانباەۆ سايلاندى.
پارتيانىڭ «قايتا باستاۋ» دەپ اتالاتىن باعدارلاماسى مەملەكەتتىڭ بارلىق سالاسىن جانە قازاقستاندىقتاردىڭ ءومىرىن قايتا باستاۋعا باعىتتالعان. پارتيانىڭ اتاۋى لاتىننىڭ «رەسپۋبليكا» سوزىنەن اۋدارعاندا «ورتاق ءىس» دەگەندى بىلدىرەدى.
30 قاراشادا قازاقستاندا جاڭا «بايتاق» پارتياسى تىركەلگەنى بەلگىلى بولدى. پارتيانىڭ باستى مىندەتى – ەلىمىزدىڭ ەكولوگيالىق ماسەلەلەرىن شەشۋ.