تاۋەلسىزدىك كۇنى قارساڭىندا «Amanat» پارتياسىنىڭ «جاستار رۋحى» جاستار قاناتىنىڭ بەلسەندىلەرى ەلورداداعى «قالامگەرلەر» اللەياسىندا «الاش» قوزعالىسىنىڭ كوشباسشىلارىنا ارنالعان ەسكەرتكىشكە گۇل شوقتارىن قويدى.
«Amanat» پارتياسىنىڭ «جاستار رۋحى» جاستار قاناتىنىڭ بەلسەندىلەرى ءاليحان بوكەيحان, احمەت بايتۇرسىن ۇلى جانە مىرجاقىپ دۋلات ۇلى ەسكەرتكىشىنە گۇل شوقتارىن قويىپ, ولاردى ءبىر مينۋت ۇنسىزدىكپەن ەسكە الدى. ۇيىمداستىرۋشىلاردىڭ ايتۋىنشا, «تاۋەلسىزدىك – ۇلت رۋحىنىڭ دىڭگەگى» اكتسياسى – ازاتتىق جولىندا قۇربان بولعان «الاش» قوزعالىسىنىڭ ۇلى قايراتكەرلەرىنە كورسەتىلگەن قۇرمەت.
«جاستار رۋحىنىڭ» توراعاسى نۇرجان جەتپىسباەۆتىڭ ايتۋىنشا, تاۋەلسىزدىك حالقىمىزدىڭ قاستەرلى قۇندىلىعى ەكەنىن جاستار قاۋىمى جاقسى ءتۇسىنۋى ءتيىس.
«تاۋەلسىزدىك – ەلىمىزدىڭ ءاربىر ازاماتى ءۇشىن قاسيەتتى ۇعىم. سونىڭ ارقاسىندا قازاقستان جەمىستى جەتىستىكتەرگە قول جەتكىزدى. بوستاندىق ۇلتتىق رۋحىمىزدىڭ وزەگى ەكەنىن جاستار قاۋىمى تەرەڭ تۇسىنسە دەيمىز. مەملەكەت باسشىسى قاسىم-جومارت توقاەۆ اتاپ وتكەندەي, الاش قايراتكەرلەرىنىڭ دەربەس مەملەكەت بولىپ, جەر جۇزىمەن تەرەزەسى تەڭ قاتىناس ورناتۋ جونىندەگى ارمان-ماقساتى جۇزەگە استى. تاۋەلسىزدىكتى نىعايتۋ جانە مەملەكەتتىلىكتى قورعاۋ تارلان تاريح پەن بولاشاق ۇرپاق الدىنداعى پارىزىمىز ەكەنىنە سەنىمدىمىز», دەدى نۇرجان جەتپىسباەۆ.
وسىنداي ءىس-شارالار ەلىمىزدىڭ بارلىق وڭىرىندە ءوتتى.