سەيشەل ارالدارىنىڭ ۇلتتىق اۋە كومپانياسى «Air Seychelles» قازاقستانعا رەيس اشادى, دەپ حابارلايدى Egemen.kz ازاماتتىق اۆياتسيا كوميتەتىنىڭ ءباسپاسوز قىزمەتىنە سىلتەمە جاساپ.
بۇرىن حابارلاعانداي, حالىقارالىق ازاماتتىق اۆياتسيا ۇيىمى اسسامبلەياسىنىڭ 41-سەسسياسى اياسىندا قازاقستاندىق دەلەگاتسيا سەيشەل ارالدارىنىڭ اۆياتسيالىق بيلىك ورگاندارىمەن كەلىسسوزدەر جۇرگىزىپ, ءوزارا تۇسىنىستىك تۋرالى مەموراندۋمعا قول قويىلدى.
«وسى جۇمىستاردىڭ ناتيجەسىندە Air Seychelles 26 جەلتوقساننان باستاپ الماتى – ماحە باعىتى بويىنشا (ابۋ-دابيگە تەحنيكالىق قونۋمەن) اپتاسىنا 2 رەيس جيىلىگىمەن بەيسەنبى جانە جەكسەنبى كۇندەرى A 320 Neo اۋە كەمەلەرىندە تۇراقتى جولاۋشىلار رەيسىن ورىنداۋدى جوسپارلاپ وتىر», دەلىنگەن حابارلامادا.
Air Seychelles — شتاب-پاتەرى سەيشەل ارالدارىنىڭ حالىقارالىق اۋەجايىندا (ماحە) ورنالاسقان سەيشەل ارالدارىنىڭ اۆياكومپانياسى. اۋە كومپانياسى 1977 جىلى ىشكى رەيستەر ءۇشىن قۇرىلعان. Air Seychelles 1983 جىلدان بەرى حالىقارالىق رەيستەردى ورىندايدى. اۋە كومپانياسىنىڭ پاركى 7 A 320 Neo, DHC-6 ۇشاعىنان تۇرادى. Air Seychelles اۋە كومپانياسى تەل-اۆيۆكە (يزرايل), يوحاننەسبۋرگكە (وڭتۇستىك افريكا), Plain Magnien (ماۆريكي), مالە (مالديۆ ارالدارى) جانە بومبەيگە باعىتتالعان ء(ۇندىستان) رەيستەردى ورىندايدى.