سەناتور امانگەلدى تولاميسوۆ ەلىمىزدىڭ پرەمەر-ءمينيسترىنىڭ اتىنا جولداعان دەپۋتاتتىق ساۋالىندا بۋكمەكەرلىك كەڭسەلەر جارناماسىنىڭ كوبەيىپ كەتكەنىن ايتتى, دەپ حابارلايدى Egemen.kz.
دەپۋتات بۇل ماسەلە پارلامەنت قابىرعاسىندا بىرنەشە رەت كوتەرىلگەنىنە نازار اۋداردى. «ويىن بيزنەسى تۋرالى» زاڭدا ەلەكتروندى كازينولار مەن ينتەرنەت-كازينو قىزمەتتەرىنە تىيىم سالىنعان, ال «جارناما تۋرالى» زاڭدا مۇنداي كازينولار مەن ولاردىڭ قىزمەتتەرىنە جارناما جاساۋعا تىيىم سالىنعان. بىراق, دەپۋتاتتىڭ ايتۋىنشا, قازىر زاڭناماعا وسىنداي جارناما ءۇشىن جاۋاپكەرشىلىكتى كۇشەيتەتىن نورمالاردى ەنگىزۋ ماڭىزدى.
«ويىن بيزنەسى ۇلكەن قارجىنىڭ كوزى بولعاندىقتان با, الدە ءتيىستى دارەجەدەگى باقىلاۋ مەن قاداعالاۋدىڭ جوقتىعىنان با وعان ءىس جۇزىندە تىيىم سالۋ ءالى كۇنگە دەيىن مۇمكىن بولماي تۇر. ويىن اۆتوماتتارى كەز كەلگەن جەرگە قويىلعان, ستاۆكا قابىلداۋ پۋنكتەرى ەركىن جۇمىس ىستەيدى. جارنامالىق سەرىكتەستەرى دە كوبىنە بۋكمەكەرلىك كومپانيالاردى جارنامالاپ كۇن كورىپ وتىرعاندىقتان ودان باس تارتپاسى انىق. بىراق بەلگىلى ءبىر دەڭگەيدە توقتاۋ سالماسا, قوعامداعى جاعداي ۋشىعىپ بارادى», دەپ اتاپ ءوتتى سەناتور.
سەناتور ايتقان دەرەكتەر بويىنشا قازىر ەلىمىزدە ويىن بيزنەسى سالاسىندا جۇمىس ىستەۋگە ليتسەنزياسى بار 50 ۇيىم بار, ونىڭ ىشىندە 26 بۋكمەكەرلىك كەڭسە, 6 كازينو, ويىن اۆتوماتى قويىلعان 10 زال, 2500-گە جۋىق ءباس تىگۋ پۋنكتتەرى جانە 8 توتاليزاتور جۇمىس ىستەيدى.