قوستانايعا جۇمىس ساپارىمەن كەلگەن يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ قالا تۇرعىندارىمەن كەزدەسىپ, بيىل قىركۇيەكتىڭ باسىندا اۋليەكول اۋدانىندا بولعان الاپات ورتتەن زارداپ شەككەندەرگە ارنالىپ سالىنعان تۇرعىن ۇيلەردى تۇرعىزۋعا بەلسەنە اتسالىسقان قۇرىلىس ماماندارىنا مەملەكەتتىك ماراپاتتار تابىس ەتتى.
– قۇرمەتتى ارىپتەستەر, قۇرىلىسشىلار! سىزدەر قىسقا مەرزىم ىشىندە اۋقىمدى جۇمىس اتقارىپ, امانقاراعاي اۋىلىنىڭ تۇرعىندارىنا قيىن ۋاقىتتا ۇلكەن قولداۋ كورسەتتىڭىزدەر. مەملەكەت باسشىسىنىڭ تاپسىرماسىنا سايكەس ءورتتىڭ سالدارىن جويۋ ءۇشىن جەدەل شارالار قابىلدانىپ, تۇرعىن ۇيلەردىڭ قۇرىلىسى دەرەۋ باستالدى. وسى باعىتتا جۇمىلدىرىلعان وڭىرلىك مەردىگەر ۇيىمداردىڭ ۇيلەسىمدى جۇمىسى مەن ءتيىمدى جوسپارلاۋىنىڭ ناتيجەسىندە, 91 تۇرعىن ءۇيدى سالۋ جۇمىستارى مەرزىمىنەن بۇرىن اياقتالدى, – دەدى قايىربەك ايتباي ۇلى.
6 قىركۇيەكتە باستالعان اۋليەكولدىڭ ىرگەسىندەگى «بىرلىك» شاعىن اۋدانىنىڭ قۇرىلىسى اينالاسى ءبىر جارىم ايدىڭ ىشىندە تولىق اياقتالدى. قار تۇسپەي 45 كۇننىڭ ىشىندە بوي كوتەرگەن 91 ءۇيدى سالۋعا اتسالىسىپ, ازاماتتىق بەلسەندىلىك تانىتقانى ءۇشىن ءۇش بىردەي قۇرىلىس كومپانياسىنىڭ باسشىلارى «قۇرمەت» وردەنىمەن ماراپاتتالدى. ولاردىڭ قاتارىندا «ستروي ەليت دوم» جشس-نىڭ بايقاۋشىلار كەڭەسىنىڭ توراعاسى داۋلەت ىبىرايىموۆ, CK كBS كومپانياسىنىڭ ديرەكتورى باۋىرجان قاراماكين جانە «رۋدنىيسوكولوۆستروي» اق باس ديرەكتورى نۇرلان ورىمباەۆ بار.
ال «رۋدنىيسوكولوۆستروي» اق-عا قاراستى قۇرىلىس باسقارماسىنىڭ اعا پرورابى وكسانا ۆلاديميروۆا مەن «بك-ستروي» جشس-نىڭ تاس قالاۋشىسى ولجاباي جاقسىلىقوۆ III دارەجەلى «ەڭبەك داڭقى» وردەنىنە يە بولدى.
سونداي-اق مينيستر «ستروي ەليت دوم» جشس-نىڭ بريگاديرى ەربولات ارىققۇلوۆ, «اليۋمينستروي» جشس ديرەكتورىنىڭ ورىنباسارى دارحان ابدىكوۆ, «اليا-سەرۆيس» جشس فيليالىنىڭ ديرەكتورى تايىر بەكجانوۆ, «پاراسات ستروي پروەكت» جشس ديرەكتورى ءابدىراحمان بوراش جانە «بك-سترويپروم» جشس ديرەكتورى سەرگەي كيم سياقتى باسشى-ۇيىمداستىرۋشىلارعا «ەرەن ەڭبەگى ءۇشىن» مەدالىن تابىس ەتتى.
بۇدان وزگە دە تاعى بىرقاتار ازامات مەملەكەت باسشىسىنىڭ قۇرمەت گراموتاسىن الدى.
قوستاناي وبلىسى