ەلوردادا جەر سالاسىنداعى زاڭدىلىقتى ساقتاۋ, سونداي-اق مەديتسينالىق بۇيىمداردى ساتىپ الۋ ماسەلەلەرى جونىندە القا وتىرىسى ءوتتى. باس پروكۋرور بەرىك اسىلوۆتىڭ توراعالىعىمەن وتكەن القا جۇمىسىنا ءماجىلىس دەپۋتاتتارى, اۋىل شارۋاشىلىعى, ەكولوگيا, گەولوگيا جانە تابيعي رەسۋرستار مينيسترلىكتەرىنىڭ باسشىلارى جانە باسقا دا مۇددەلى ماماندار قاتىستى.
ب.اسىلوۆ جيىن بارىسىندا بيىل پروكۋرورلاردىڭ مۇرىندىق بولۋىمەن مەملەكەتكە قولدانىلماعان 1,5 ملن گا جەر قايتارىلعانىن اتاپ ءوتتى. اۋىل شارۋاشىلىعى مينيسترلىگىمەن بىرلەسىپ قولعا الىنعان ءىس-شارالاردىڭ ارقاسىندا قوعامدىق جايىلىمداردىڭ تاپشىلىعى 29 ملن گەكتاردان 8 ملن گەكتارعا دەيىن قىسقارتىلعان. سولتۇستىك قازاقستان, اقمولا جانە الماتى وبلىستارىندا 11 مىڭ ۇلەسكەرگە 500 مىڭ گا استام جەر قايتارىلدى.
تەكسەرۋلەر كەزىندە وليگوپوليالاردىڭ قولدانۋىنداعى ەڭ جاقسى جانە قۇنارلى اۋىلشارۋاشىلىق جەرلەرىن, جايىلىمدار مەن كوممەرتسيالىق ۋچاسكەلەر انىقتالىپ, ولاردان مەملەكەت پايداسىنا 145 مىڭ گەكتار جەر تاركىلەنگەن.
تەكسەرۋ قورىتىندىسى بويىنشا 56 قىلمىستىق ءىس قوزعالىپ, 9 كىنالى ادام سوتتالدى. سونداي-اق شىمكەنت, اقمولا, اتىراۋ, الماتى جانە تۇركىستان وبلىستارى اكىمدىكتەرىنىڭ جەر قاتىناستارى جانە اۋىل شارۋاشىلىعى بويىنشا باسقارمالارىنىڭ لاۋازىمدى تۇلعالارىنا, سونداي-اق شىعىس قازاقستان, باتىس قازاقستان, سولتۇستىك قازاقستان, ماڭعىستاۋ جانە قىزىلوردا وبلىستارىنىڭ جەكە جەر پايدالانۋشىلارىنا قاتىستى 56 قىلمىستىق ءىس قوزعالدى.
بۇگىنگى كۇنى قىلمىس جاساعان 9 ادام سوتتالدى. مىسالى, سولتۇستىك قازاقستان وبلىسىندا 800 ۇلەسكەرلەردىڭ جەر تەلىمدەرىن اسىرا پايدالانىپ, الاياقتىق جاساعان كاسىپورىن باسشىسى 6 جىلعا باس بوستاندىعىنان ايىرىلدى.
القا وتىرىسىندا بەرىك اسىلوۆ ۋاكىلەتتى ورگانداردىڭ جايىلىم جەرلەرىن وڭ باسقارۋدىڭ, ءىرى جەر تەلىمدەردىڭ ءبىر قولعا شوعىرلانۋىنا جول بەرمەۋ جانە ۇلەستىك جەرلەرگە باقىلاۋدى كۇشەيتۋدىڭ, ونىڭ ىشىندە كەز كەلگەن زاڭسىز سحەمالاردى بولدىرماۋ جۇمىسىنىڭ ماڭىزدىلىعىنا نازار اۋدارىپ, اۋىل شارۋاشىلىعى مينيسترلىگىنە ناقتى ءىس-شارالار جوسپارىن دايىنداۋ ارقىلى زاڭ بۇزۋشىلىقتاردى جويۋ تۋرالى تالاپتار قويىلدى.
جيىندا تالقىلانعان ەكىنشى ماسەلە بويىنشا «دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ» قىزمەتى تەكسەرىسىنىڭ ناتيجەلەرى تالقىلاندى.
پروكۋرورلىق تەكسەرىس كەزىندە بيۋدجەت قاراجاتىن جىمقىرۋ جانە جوعارى باعامەن ساپاسىز مەديتسينالىق تەحنيكانى ساتىپ الۋ فاكتىلەرى انىقتالعان. ماسەلەن, اقتوبە وبلىسىنداعى مەديتسينالىق ورتالىق جىلجىمالى شۇعىل مەديتسينالىق كومەك كەشەنىن (جەدەل جاردەم) كەدەندىك قۇنىنان 4 ەسە ارتىق باعامەن ساتىپ العان. نارىقتىق باعاسى 16,6 ملن تەڭگە بولسا, ورتالىققا 72,9 ملن تەڭگە جۇمسالعان.
وسىعان ۇقساس زاڭسىزدىقتار الماتى قالاسىندا, اقمولا, اتىراۋ, قاراعاندى, قوستاناي, شقو, بقو, جامبىل جانە پاۆلودار وبلىستارىندا دا انىقتالىپ وتىر. تەكسەرىس ناتيجەلەرى بويىنشا پروكۋراتۋرا زاڭ بۇزۋشىلىقتارىن جويۋ تۋرالى 208 ۇسىنىم ەنگىزىپ, 405 ادام تارتىپتىك جانە اكىمشىلىك جاۋاپتىلىققا تارتىلدى, 15 سوتقا دەيىنگى تەرگەپ-تەكسەرۋ باستالدى.
قاداعالاۋ ۆەدومستۆوسىنىڭ باسشىسى مەديتسينالىق بۇيىمدارعا باعانى قالىپتاستىرۋدىڭ اشىقتىعىن قامتاماسىز ەتۋ, سىبايلاس جەمقورلىق فاكتورلارىن بولدىرماۋ قاجەتتىگىن اتاپ ءوتتى.
جيىنعا قاتىسۋشىلار كاسىپكەرلەردىڭ وتىنىمدەرىن قابىلداۋ پروتسەسىن اۆتوماتتاندىرۋ, مەديتسينالىق بۇيىمداردى ساراپتاۋ تەتىگىن قايتا قاراۋ, مەديتسينالىق جابدىقتاردى قاداعالاۋ جۇيەسىن ەنگىزۋدى ۇسىندى.
القا جۇمىسىنىڭ قورىتىندىسى بويىنشا باس پروكۋرور وبلىس پروكۋرورلارىنا مەملەكەتكە كەلتىرىلگەن زالالدى وتەۋگە قول جەتكىزۋدى, سونداي-اق جىمقىرۋ مەن بيلىكتى اسىرا پايدالانعان ادامدار ءۇشىن قىلمىستىق جازانىڭ بۇلتارتپاستىعى قاعيداتىن قامتاماسىز ەتۋدى تاپسىردى.