ەل استاناسىندا «التىن توبىلعى» رەسپۋبليكالىق ادەبي بايقاۋى قورىتىندىلاندى. وعان ءتۇرلى جانردا قالام تەربەپ جۇرگەن 18 بەن 35 جاس ارالىعىنداعى قالامگەرلەر قاتىستى.
تۇڭعىش پرەزيدەنت – ەلباسىنىڭ قورى جاس ادەبيەتشىلەردىڭ ەڭبەگىنە وسىمەن سەگىزىنشى رەت قولداۋ كورسەتتى. قازىرگى كوركەم ادەبيەتتى قولداۋعا, دامىتۋعا, ناسيحاتتاۋعا, جاس قالامگەرلەردى كوتەرمەلەۋگە باعىتتالعان بايقاۋعا دەگەن قىزىعۋشىلىق جىلدان-جىلعا ارتىپ كەلەدى.
بيىلعى بايگەگە ەلدىڭ تۇكپىر-تۇكپىرىنەن 120 اۆتور قاتىسقان. جەڭىمپازدار «جىلدىڭ ۇزدىك پروزاسى», «جىلدىڭ ۇزدىك پوەزياسى», «جىلدىڭ بالالارعا ارنالعان ۇزدىك شىعارماسى», «فانتاستيكا جانرىنداعى ۇزدىك شىعارما», «جىلدىڭ ۇزدىك كينوستسەناريى» ءداستۇرلى اتالىمدار بويىنشا بەلگىلەندى. ءار نوميناتسيا بويىنشا سىياقى قورى 2 ميلليون تەڭگەنى قۇرايدى.
«التىن توبىلعى» بايقاۋىن سەگىزىنشى رەت وتكىزىپ وتىرمىز. جىل سايىن جاس قالامگەرلەردىڭ جوعارى بەلسەندىلىك تانىتاتىنى قۋانتادى. سەگىز جىل ىشىندە بايقاۋعا 1 100 قاتىسۋشىدان 1 500-گە جۋىق شىعارما كەلىپ ءتۇستى. بيىلدىڭ وزىندە 120 اۆتور قاتىستى», دەدى ماراپاتتاۋ راسىمىندە نۇرسۇلتان نازارباەۆ قورىنىڭ اتقارۋشى ديرەكتورىنىڭ ورىنباسارى الكەي مارعۇلان ۇلى.
سونداي-اق ول بايقاۋ جاس تالانتتاردىڭ جۇلدىزىن جاعىپ, ادەبيەتكە دەگەن قىزىعۋشىلىعىن ارتتىرۋعا, ۇلتتىق قۇندىلىقتاردى, ادامگەرشىلىكتى نىعايتۋعا ىقپال ەتەتىنىن, ءتول تاريحتى كوبىرەك بىلۋگە جول اشاتىنىن اتاپ ءوتتى.
ايتا كەتەيىك, دوداعا قاتىسۋشىلاردىڭ تۋىندىلارى مادەنيەتكە, ونەگەلى ءومىر تاريحىنا, ادامنىڭ رۋحاني قاسيەتتەرىنە جانە ت.ب. تاقىرىپتارعا ارنالعان.
سونىمەن, قازىلاردىڭ شەشىمىمەن بيىلعى «التىن توبىلعى» ادەبي سىيلىعىن «جىلدىڭ ۇزدىك پروزاسى» اتالىمى بويىنشا – «Egemen Qazaqstan» گازەتىنىڭ ءتىلشىسى اباي ايماعامبەتتىڭ «بەس كۇندى كۇتۋ», «فانتاستيكا جانرىنداعى ۇزدىك شىعارما» – اسەت سىزدىقوۆتىڭ «سامىي بىسترىي تۋرايبول», «جىلدىڭ ۇزدىك كينوستسەناريى» – مىرزا بەيبىت ۇلىنىڭ «ايعاسار», «جىلدىڭ ۇزدىك پوەزياسى» – نۇرجان ءبايتوستىڭ «اۋىل سۋرەتتەرى» ولەڭدەر جيناعى, «جىلدىڭ بالالارعا ارنالعان ۇزدىك شىعارماسى» – نۇربەك كەڭەسبايدىڭ «سارى ەمشىنىڭ بالاسى» اڭگىمەسى يەلەندى. ال «ەل مۇراتى – تاۋەلسىزدىك» تاقىرىبىنا ارنالعان ۇزدىك شىعارما» ارنايى نوميناتسياسىن عىلىمنۇر قادىربايدىڭ «تىنىس» پوۆەسى جەڭىپ الدى. اۆتورعا 3 ميلليون تەڭگەنىڭ سەرتيفيكاتى تابىستالدى.
بۇدان بولەك ىنتالاندىرۋ جۇلدەسىمەن ەكى شىعارمانىڭ اۆتورى 1 ميلليون تەڭگە سىيلىقپەن ماراپاتتالدى. اتاپ ايتساق, جىبەك زينەلوۆا – «مۇز قالاشىق» («جىلدىڭ ۇزدىك بالالار تۋىندىسى» نوميناتسياسى) جانە ورازاي جەڭىس – «بالاعان قۇلاگەرگە...» («جىلدىڭ ۇزدىك پوەزياسى»).
اتالعان شىعارماشىلىق بايقاۋدىڭ ەرەجەسىنە سايكەس ۇمىتكەرلەردىڭ قازاق-ورىس تىلدەرىندەگى شىعارمالارى باق سىنادى. اۆتور ەكى نوميناتسياعا دا قاتىسۋعا قۇقىلى. ەسكە سالساق, شىعارمالار ءساۋىر ايىنان باستاپ قازانعا دەيىن قابىلدانعان ەدى.