ەل كولەمىندە قاراشا ايىنىڭ 28-30-ى كۇندەرى «مال ۇرلىعى» جەدەل الدىن الۋ ءىس-شاراسى وتكىزىلدى. ىشكى ىستەر مينيسترلىگىنىڭ ءبىرىنشى توقسانعا ارنالعان نۇسقاۋى اياسىندا قولعا الىنعان وپەراتسيا سىر وڭىرىندە دە ىسكە قوسىلدى.
مال ۇرلىعىنىڭ الدىن الىپ, جولىن كەسۋ, ۇرىلاردى انىقتاپ, قىلمىستىق جاۋاپكەرشىلىككە تارتۋدى ماقسات تۇتقان جەدەل ءىس-شاراعا وبلىستىق پوليتسيا دەپارتامەنتىنىڭ جەكە قۇرامى جۇمىلدىرىلدى.
دەپارتامەنتتىڭ بارلىق قىزمەت سالالارىمەن بىرلەسە بەكىتىلگەن جوسپارعا ساي جۇرگىزىلگەن جۇمىس ناتيجەسىندە پوليتسەيلەر ەكى كۇندە 14 دەرەكتى اشكەرەلەدى. ونىڭ ىشىندە وتكەن جىلدارى جاسالعان قىلمىستار دا بار. جەدەل جۇمىستاردىڭ ناتيجەسىندە «مالىم قولدى بولدى» دەپ ارىزدانعان كەي تۇرعىننىڭ جوعالتقانى جايىلىمنان تابىلىپ, 14 قىلمىستىق ءىس وندىرىستەن توقتاتىلدى.
ۇرلانعان جانە جوعالعان 20 باس مال تابىلىپ, يەلەرىنە قولحاتپەن قايتارىلدى. ارينە, ۇرلىقتى انىقتاۋ – پوليتسەيلەردىڭ مىندەتى. بىراق يەسى دە مالىنا قىراعى بولعانى ءجون-اق. ايتپەسە, «ايداي سالدان از ءولدى, كورە سالدان كوپ ءولدىنىڭ» جىرى جۋىردا تاۋسىلمايدى. ءبىز ءالى ۇقىپتىنى ۇرى المايتىنىنا ءمان بەرمەي كەلەمىز.
جەدەل ءىس-شارا كەزىندە بارلىق اۋداندار مەن وبلىس ورتالىعىندا مال جانە ەت ءونىمىن تاسىمالداۋ فاكتىلەرىن انىقتاپ, ەت ساتاتىن بازارلار مەن ورىنداردى تەكسەرەتىن موبيلدىك توپتار جۇمىس ىستەپ, مال جانە ەت تاسىمالداعان 410 اۆتوكولىك, ەت ونىمدەرىن ساتاتىن 166 ورىن, 100 فەرمەرلىك شارۋاشىلىق تەكسەرىلدى.
قىزىلوردا وبلىسى