قازاقستاندا العاش رەت جۇرەك ورتالىعىنىڭ ينتەرۆەنتسيالىق كارديولوگتەرى ميترالدى قاقپاقشاعا قىسقىش سالۋ بويىنشا بىرەگەي وپەراتسيا جاسادى. شەبەرلىك ساباعىنىڭ بارىسىندا دارىگەرلەر ميترالدى قاقپاقشا جەتكىلىكسىزدىگى بار ناۋقاستاردى ەمدەۋدىڭ جاڭا ءادىسىن مەڭگەردى. بۇل تەحنولوگيا قۇرامىندا قىسقىش بار كاتەتەردى فەمورالدى ۆەنا ارقىلى از ءينۆازيۆتى جولمەن ەنگىزۋگە, جابىلمايتىن جارمالاردى قوسۋ ارقىلى كلاپاننىڭ اقاۋىن جويۋعا جانە سول ارقىلى بۇكىل دەنەنىڭ قانمەن قامتاماسىز ەتىلۋىن جاقسارتۋعا مۇمكىندىك بەرەدى.
جۇرەك دۇرىس جۇمىس ىستەۋ كەزىندە ميترالدى قاقپاقشالار سول جاق قارىنشاعا قان جىبەرۋ ءۇشىن اشىلادى. ءارى قاراي سول جاق قارىنشانىڭ جيىرىلۋىمەن قان قولقاعا ەنىپ, بۇكىل دەنەنى وتتەگىمەن قامتاماسىز ەتەدى. ميترالدى قاقپاقشا جەتكىلىكسىز بولعان جاعدايدا ونىڭ جارمالارى تىعىز جابىلمايدى, بۇل قاننىڭ كەرى اعۋىنا اكەلەدى. وسىنىڭ سالدارىنان وتتەگىنىڭ جەتكىلىكسىزدىگىمەن ادام اعزاسى ەنتىگۋ مەن ءجيى شارشاۋدى سەزىنە باستايدى.
«جۇرەكتىڭ بۇل پاتولوگياسى 4% جاعدايدا كەزدەسەدى. بۇل نەگىزىنەن 50 جاستان اسقان پاتسيەنتتەر, ولار ءۇشىن جۇرەككە اشىق وپەراتسيا جاساۋ ۇلكەن جۇكتەمە جانە وپەراتسيادان كەيىنگى اسقىنۋلاردىڭ قاۋپىن تۋدىرادى. سوندىقتان قاقپاقشاعا قىسقىش سالۋ اشىق وپەراتسياعا جاقسى بالاما بولىپ تابىلادى», دەدى جۇرەك ورتالىعىنىڭ كاتەتەرلەۋ زەرتحاناسىنىڭ مەڭگەرۋشىسى ابدۋراشيد مۇساەۆ.
ەكى كۇندىك وقۋ بارىسىندا كلينيكا دارىگەرلەرى تۇركيادان كەلگەن ارىپتەستەرىمەن بىرگە 4 پاتسيەنتكە قىسقىش ورناتتى. ولاردا ميترالدى قاقپاقشانىڭ جەتكىلىكسىزدىگى بايقالدى, «اشىق» جۇرەككە وپەراتسيا جاساۋعا قارسى كورسەتىلىمدەر, سونداي-اق باسقا دا قاتار جۇرەتىن اۋرۋلار بولعان.
«مەن ينفاركتان كەيىن اۋىر جاعدايدا بولدىم, ءجيى ەنتىگۋدى باستان وتكەردىم. قازىر وپەراتسيادان كەيىن ءوزىمدى جاقسى سەزىنەمىن, وسى وپەراتسيانى جاساعان ورتالىق دارىگەرلەرىنە العىس ايتامىن», دەپ قۋانىشىن ءبولىستى كلينيكانىڭ پاتسيەنتى.
«بۇل وپەراتسيادان كەيىن قالپىنا كەلتىرۋ تەزىرەك جۇرەدى. ءبىزدىڭ پاتسيەنتتەر قازىردىڭ وزىندە كلينيكادان شىعۋعا دايىندالىپ جاتىر. بۇل ادىسپەن بارلىق پاتسيەنتتى ەمدەۋگە بولادى دەپ ايتۋعا بولمايدى. دەگەنمەن بۇل تەحنولوگيا قازىر دارىلىك تەراپيا جالعىز ەم بولىپ تابىلاتىن ادامداردىڭ ءومىر ءسۇرۋ ساپاسىن ەداۋىر جاقسارتا الادى», دەيدى جۇرەك ورتالىعىنىڭ ينتەرۆەنتسيالىق كارديولوگيا جانە راديولوگيا كاد ديرەكتورى مارات ءارىپوۆ.