ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ماگيسترانتى كاميلا ەگىزبەك «عىلىم» اتالىمى بويىنشا «دارىن» مەملەكەتتىك جاستار سىيلىعىنىڭ لاۋرەاتى اتاندى. جاس عالىم بيومەديتسينا سالاسى جانە سۋ ورتاسىن تازارتۋ ءۇشىن نانوقۇرىلىمدى تەمىر بار ماتەريالداردى قولدانۋ تەحنولوگياسىن زەرتتەپ جاتىر. ول 15-تەن استام عىلىمي جاريالانىمنىڭ اۆتورى, ونىڭ ىشىندە 10 ماقالا يمپاكت فاكتورى جوعارى حالىقارالىق باسىلىمداردا جاريالانعان. Scopus بازاسى بويىنشا 23 جاستاعى عالىمنىڭ حيرش يندەكسى 4-كە تەڭ.
كاميلا فيزيكا-تەحنيكالىق فاكۋلتەتىندە يادرولىق فيزيكا ماماندىعى بويىنشا ماگيستراتۋرانىڭ ەكىنشى كۋرسىندا وقيدى. ول بۇعان دەيىن ەۇۋ باكالاۆريات دەڭگەيىن وسى ءبىلىم بەرۋ باعدارلاماسى بويىنشا تامامداعان.
جاس عالىم 2015 جىلدان بەرى نانوقۇرىلىمدى تەمىر بار ماتەريالداردى سۋ ورتاسىن تازارتۋ جانە بيومەديتسينادا كاتاليزاتورلاردىڭ نەگىزى رەتىندە قولدانۋدى زەرتتەۋمەن بەلسەندى اينالىسىپ كەلەدى.
زەرتتەۋدىڭ نەگىزگى باعىتى سۋ ورتاسىن ورگانيكالىق بوياعىشتاردان نەمەسە اۋىر مەتالداردان تازارتۋ ءۇشىن كاتاليزاتور رەتىندە پايدالانىلاتىن ماگنيتتىك نانوبولشەكتەردى الۋدىڭ تەحنولوگيالىق شەشىمدەرىنە باعىتتالعان. ولاردى زيانسىز كومپونەنتتەرگە ىدىراتۋ نەمەسە ءسىڭىرۋ جولدارى قاراستىرىلىپ وتىر.
كاميلا ەگىزبەك تازارتۋ سالاسىندا جوعارى تيىمدىلىگى بار شپينەل ءتارىزدى قۇرىلىمى بار تسەري مەن گادوليني قوسىلعان تەمىرى بار نانوبولشەكتەردى الۋ ءادىسىن ويلاپ تاپتى. سونداي-اق ماگيسترانت سينتەز جاعدايلارىنا بايلانىستى سينتەزدەلگەن نانوبولشەكتەردەگى قۇرىلىمدىق ەرەكشەلىكتەر مەن فازالىق وزگەرىستەرگە ىرگەلى زەرتتەۋلەر جۇرگىزەدى.
ەۇۋ ماگيسترانتى «بوبەك» جالپىۇلتتىق قوزعالىسى» زتب جانە بعم «مەملەكەت تاريحى ينستيتۋتى» مم ۇيىمداستىرعان «ۇزدىك جاس عالىم – 2020» جانە «ۇزدىك جاس عالىم – 2021» حالىقارالىق جوبالارىنىڭ ءۇش مارتە جەڭىمپازى اتانعان.
سونىمەن قاتار كاميلا 2021 جىلى ەلىمىزدىڭ عىلىمي ۋنيۆەرسيتەتتەرى اراسىندا ستۋدەنتتەردىڭ ۇزدىك عىلىمي-زەرتتەۋ جۇمىسى ءۇشىن I دارەجەلى ديپلوممەن ماراپاتتالعان.