بۇگىن ەلورداداعى تاۋەلسىزدىك سارايىندا قاسىم-جومارت توقاەۆتى قازاقستان پرەزيدەنتى رەتىندە سالتاناتتى ۇلىقتاۋ ءراسىمى وتەدى, دەپ حابارلايدى Egemen.kz.
قازاقستان پرەزيدەنتىن ۇلىقتاۋ ءراسىمى 26 قاراشاعا بەكىتىلدى. بۇل ەل تاريحىنداعى جەتىنشى يناۋگۋراتسيا بولماق. ءراسىم كەزىندە ورتالىق سايلاۋ كوميسسياسى جاڭا سايلانعان پرەزيدەنتكە قازاقستان رەسپۋبليكاسى پرەزيدەنتىنىڭ كۋالىگىن تاپسىرادى. بۇدان سوڭ, مەملەكەت باسشىسى قازاقستان حالقىنا انت بەرەدى. سول ساتتەن باستاپ قايتا سايلانعان پرەزيدەنت رەسمي قىزمەتiنە كiرiسكەن بولىپ ەسەپتەلەدى.
توقاەۆتى سالتاناتتى ۇلىقتاۋ ءراسىمىنىڭ ترانسلياتسياسى رەسپۋبليكالىق تەلەارنالاردان, ينتەرنەت-رەسۋرستاردان, سونداي-اق «اقوردانىڭ» الەۋمەتتىك جەلىلەردەگى رەسمي اككاۋنتتارىنان تىكەلەي ەفيردە كورسەتىلەدى. كورسەتىلىم استانا ۋاقىتى بويىنشا ساعات 10:50-دە باستالادى.
ەسكە سالا كەتسەك, وسك توراعاسى نۇرلان ءابدىروۆ 22 قاراشادا وتكەن ۆەدومستۆو وتىرىسىندا قازاقستاندا وتكەن كەزەكتەن تىس پرەزيدەنت سايلاۋىنىڭ سوڭعى قورىتىندىسىن جاريالادى. سايلاۋ ناتيجەسى بويىنشا, قاسىم-جومارت توقاەۆ 81,31 پايىز داۋىس جيناپ, جەڭىسكە جەتتى.