كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ باستاعان قازاقستاندىق دەلەگاتسيا مينسك قالاسىندا وتكەن تمد ۇكىمەت باسشىلارى كەڭەسىنىڭ وتىرىسىنا قاتىستى. وسى باسقوسۋدىڭ الدىندا عانا تمد ەلدەرىنىڭ دەلەگاتسيا باسشىلارى بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەسىپ, وتىرىستىڭ كۇن ءتارتىبىن تالقىلاپ, دوستاستىق اياسىنداعى ىنتىماقتاستىقتى تەرەڭدەتۋ جانە حالىقارالىق تاقىرىپتاعى وزەكتى ماسەلەلەر بويىنشا پىكىرلەر الماسقان بولاتىن, دەپ حابارلادى قر پرەمەر-ءمينيسترىنىڭ ءباسپاسوز قىزمەتى.
وتىرىستىڭ كۇن تارتىبىندە دوستاستىق ەلدەرىنىڭ ءوزارا ارەكەتتەستىگىن تەرەڭدەتۋگە باعىتتالعان 20-عا جۋىق ەكونوميكالىق, گۋمانيتارلىق جانە ۇيىمدىق ماسەلەلەر قارالدى. اتاپ ايتقاندا, تمد ەلدەرىنىڭ 2020 جىلعا دەيىنگى يننوۆاتسيالىق ىنتىماقتاستىعى جونىندەگى مەملەكەتارالىق باعدارلامانىڭ 2013 جىلعى ورىندالۋ بارىسىنا تالداۋ جاسالىندى.
وتىرىستا ب.ساعىنتاەۆتىڭ ءوز ءسوزىندە اتاپ كورسەتكەنىندەي ەكونوميكا سالاسىندا يننوۆاتسيالىق ىنتىماقتاستىقتى نىعايتۋ, سونداي-اق, ورتاق اۋىل شارۋاشىلىعى رىنوگىن دامىتىپ, تمد ەلدەرىنىڭ ازىق-ت ۇلىك قاۋىپسىزدىگىن قامتاماسىز ەتۋ اسا ماڭىزدى ماسەلەلەردىڭ ءبىرى بولىپ تابىلادى.
وتىرىس بارىسىندا, عىلىمي-تەحنيكالىق اقپاراتتار مەن مەملەكەتارالىق الماسۋ سالاسىنداعى ىنتىماقتاستىقتى رەتكە كەلتىرۋ تۋرالى كەلىسىمگە قول قويىلدى. سونداي-اق, راديوناۆيگاتسيا مەن گيدرومەترولوگيا سالالارىندا ءوزارا ارەكەتتەستىكتى دامىتۋ جونىندە شارالار بەلگىلەنىپ, تاۋارلاردىڭ شىعۋ تەگى بويىنشا ەلدەردى انىقتاۋ ەرەجەسىنە وزگەرىستەر ەنگىزىلدى.
گۋمانيتارلىق سالاداعى ىنتىماقتاستىق ماسەلەلەرى تالقىلانىپ, تمد-داعى ۇلتتىق سپورت تۇرلەرىن دامىتۋ, مالداردىڭ اۋسىل اۋرۋىنىڭ تارالۋ قاۋپىمەن كۇرەس ماسەلەلەرى جونىندە شارالار ءازىرلەندى.
وتىرىستا, باسقا دا بىرقاتار ماسەلەلەر قارالدى. كەلەسى باسقوسۋ 21 قاراشادا اشعاباد قالاسىندا وتەدى دەپ بەلگىلەندى.
سۇڭعات ءالىپباي,
«ەگەمەن قازاقستان».