زاماننىڭ ءوزى جاڭا ءوندىرىس پەن ءونىمنىڭ ومىرگە كەلۋىن تالاپ ەتەدى. بۇگىنگى ۋاقىت – ءدال سونداي ۋاقىت. وزگە ەلدەردىڭ باسقالاردان ءبىر قادام الدا ءجۇرۋىنىڭ سەبەبى دە وسىندا. ولار تۇتىنۋشى تالابىنا دەر كەزىندە ءۇن قاتىپ كەلەدى. ەلدە ينفراقۇرىلىم مەن قۇرىلىستىڭ قارقىن الۋى دا نارىقتان سونى سۇرايدى. قاجەتتىلىكتەردى الىستان اربالاعاننان گورى جاقىننان دوربالاعان ابزال ەكەنىن اڭعارتادى.
كەيىنگى جىلدارى قۇرىلىس ماتەريالدارىن شىعارۋدا قازاقستاننىڭ ءباسى ءبىرشاما جوعارىلادى. اۋەلى شاقتاپ باستاپ, سودان سوڭ قاناتىن كەڭگە جايعان قۇرىلىسقا قاجەتتى ءونىم وندىرگەن ءوندىرىس كەشەندەرى كوبەيگەنى وتىرىك ەمەس. ونداي ونەركاسىپ جوبالارى قاراعاندى ايماعىندا دا بار. ماسەلەن, قاراعاندىداعى «Lifeyshik» جشس كومپانياسى جاقىندا جۇمىسىن باستايدى. ول گوفرلەنگەن پوليپروپيلەندى (پلاستيك) قۇبىر شىعارۋدى كوزدەيدى. ياعني بۇل – كارىزگە, درەناجدىق جەلىلەرگە, سۋ بۇرۋ جانە سۋ جىبەرۋگە ارنالعان قۇبىرلار.
بۇل كۇنى زاماناۋي قۇرىلىستى سۋسىز ءارى جىلۋسىز ەلەستەتۋ مۇمكىن ەمەس. وسى ورايدا عيمارات ىشىندەگى جانە سىرتىنداعى ينجەنەرلىك كوممۋنيكاتسيالاردا پوليپروپيلەندى قۇبىرلار وزگە ماتەريالدان جاسالعان قۇبىرلاردى ىعىستىرىپ شىعارىپ كەلەدى. حيميا ونەركاسىبى كەز كەلگەن سۇرانىستى جابا الاتىن ءتۇرلى ونىمگە مۇمكىندىك بەرگەنىن مويىنداۋ كەرەك.
گوفرلەنگەن پوليپروپيلەندى قۇبىر شىعاراتىن كومپانيا باسشىسى الەكساندر يۆانوۆ جوباعا ءوز قاراجاتى ەسەبىنەن قازىرگى تاڭدا 500 ملن تەڭگە ينۆەستيتسيا قۇيىلعانىن ايتادى. بىراق مۇنىمەن شەكتەلمەك ەمەس. قوماقتى ينۆەستيتسيا ءالى دە سالىنادى.
– بۇل قاراجات – وزىمىزدىكى. مۇندا ەشبىر شەتەلدىك قارجى, بولماسا باسقا سەرىكتەستەر تارتىلعان جوق. جوبا تولىق ىسكە اسقانعا دەيىن 1,7 ملرد تەڭگە ينۆەستيتسيا سالىنادى. وعان كاسىپورىنعا قاجەتتى قۇرال-جابدىقتار الىنادى. ءبىز «دامۋ» قورىنا پايىزدىق ستاۆكانى سۋبسيديالاۋعا جانە جوباعا كەپىلدىك بەرۋگە ءوتىنىش جولدادىق, ءوتىنىشىمىز قولداۋ تاپتى, – دەيدى كومپانيا باسشىسى.
جوبا نەگىزىندە 50-70 ادام جۇمىسپەن قامتىلادى. الايدا بۇل كەزەڭ-كەزەڭىمەن ىسكە اسپاقشى. ايتالىق, ەڭ الدىمەن, قۇرال-جابدىقتاردى ورناتۋ كەزىندە 10-15 ادام جۇمىسقا الىنادى. سودان سوڭ جوبا ىسكە كىرىسكەندە 50-70 قاراعاندىلىق تۇراقتى جۇمىسقا ورنالاسا الادى.
كاسىپورىننىڭ جوبالىق قۋاتى جىلىنا – 8-9 مىڭ توننا قۇبىر. بۇل ونىمدەر ەكى وندىرىستىك جەلىگە بولىنەدى. ونىڭ ءبىرى جىلىنا – 2,5 مىڭ توننا, ەكىنشىسى 6,5 مىڭ توننا ءونىم شىعارادى.
– كاسىپورىننىڭ ءونىمى – گوفرلەنگەن پوليپروپيلەندى قۇبىرلار. ءونىم تۇپكىلىكتى شيكىزاتتان, تۇيىرشىكتەلگەن پوليپروپيلەننەن جاسالادى. شيكىزات كورەيا, ءباا جانە ەۋروپا ەلدەرىنىڭ الدىڭعى قاتارلى وندىرۋشىلەرىنەن جەتكىزىلەدى. ساپاسى اسا جوعارى. بارلىق قاجەتتى تالاپتارعا تولىق جاۋاپ بەرەدى. ءبىز شىعاراتىن قۇبىرلاردىڭ ديامەترى 100-دەن, 1 200 ديامەترگە دەيىنگى ولشەمدى قامتيدى, – دەيدى كومپانيا باسشىسى.
كومپانيانىڭ ماقساتى زور. بۇل – وسى قۇبىرعا دەگەن سۇرانىستى تولىق دەرلىك جابۋ. دالىرەك ايتقاندا, قازاقستان نارىعىنىڭ 90 پايىزىن قامتۋ مەجەلەنىپ وتىر. سونىمەن قاتار ەكسپورتقا شىعۋ دا – مۇرات. قاراعاندى قۇبىرلارىن كەلەشەكتە رەسەي, قىرعىزستان, وزبەكستان, تاجىكستان ەلدەرىنە ەكسپورتتاۋ جوسپاردا. كومپانيا وسى كۇنى اتالعان ەلدەرمەن كەلىسسوزدەر جۇرگىزىپ جاتىر.
– قازىرگى تاڭدا BI-Group, Bazis construction سەكىلدى تۇتىنۋشى كومپانيالارمەن, ەلىمىزدىڭ ءار وڭىرىندەگى سۋعا جاۋاپتى ۇيىمدارمەن, ءىرى قۇرىلىس كومپانيالارمەن كەلىسىم بار, – دەيدى ا.يۆانوۆ.
كومپانيا باسشىلىعى قۇبىردىڭ نەگىزىن قالايتىن شەتەلدەن كەلەتىن شيكىزاتتا شيكىلىك جوقتىعىنا سەنىمدى. بۇل جوعارى ساپالى ءارى ءبىزدىڭ كليمات قاجەت ەتەتىن تەحنيكالىق سيپاتتامالارعا ساي. ءونىم مەملەكەتتىك ستاندارتقا تولىق جاۋاپ بەرەدى.
كاسىپورىن ءونىمىن تەك ءىرى قۇرىلىس كومپانيالارى عانا تۇتىنبايدى. ونى قاراپايىم جەكە تۇلعالار دا ارنايى كەلىپ الۋىنا مۇمكىندىك بار.
پوليپروپيلەندى بۇيىمداردىڭ سۋمەن جابدىقتاۋدا الدىڭعى قاتارلى قۇرىلىس ماتەريالىنا اينالۋىنا بىردەن-ءبىر سەبەپ – ونىڭ وسى حيميالىق ينەرتتىلىگى دەسەدى عالىمدار. ارتىقشىلىعى, ونىڭ قورشاعان ورتامەن حيميالىق رەاكتسياعا تۇسپەيتىندىگىندە, كەز كەلگەن تەمپە- راتۋرادا مەحانيكالىق بەرىكتىگىن جوعالتپاۋىندا. اتالعان قۇبىرلار ءوندىرىسى تولىق اۆتوماتتاندىرىلعان تەحنولوگيامەن جۇزەگە اسادى. سونىڭ ناتيجەسىندە ونىڭ وزىندىك قۇنى دا وزگەلەرگە قاراعاندا الدەقايدا ارزانىراق تۇسەدى.
مۇنداي قۇبىرلاردىڭ توزىمدىلىگى كۇشتى. مامانداردىڭ ايتۋىنشا, 50 جىلعا توتەپ بەرەدى. وعان قوسا, قۇبىر بويىنداعى سۋدىڭ قۇرامىن وزگەرتپەيدى, سۋعا زياندى اسەرى جوق. سەبەبى مۇنداي حيميالىق بۇيىم سۋمەن رەاكتسياعا تۇسپەيدى ەكەن.
قاراعاندى وبلىسى