قاراشانىڭ 3-ىندە قاراعاندىداعى لەنين اتىنداعى شاحتاداعى اپاتتى تەرگەگەن ۇكىمەتتىك كوميسسيا جۇمىسىن اياقتادى. كوميسسيا اپاتقا جۇمىس بەرۋشى, ياعني «ارسەلورميتتال تەمىرتاۋ» اق كىنالى دەپ انىقتادى. تراگەدياداعى جۇمىسشىلاردىڭ كىناسى – 0 پايىز. جۇمىس بەرۋشىنىڭ كىناسى – 100 پايىز. بۇل تۋرالى ۇكىمەتتىك كوميسسيانىڭ توراعاسى, توتەنشە جاعدايلار ءمينيسترى يۋري يلين مالىمدەدى.
شاحتاداعى اپاتقا جاۋاپتى 26 تۇلعا انىقتالدى. ولار «ارسەلورميتتال تەمىرتاۋ» اق باسشىلىعىنان باستاپ, لەنين اتىنداعى شاحتانىڭ ينجەنەرلىك-تەحنيكالىق قۇرامىنا دەيىنگى ماماندار. اراسىندا وزگە مەملەكەتتىڭ ازاماتتارى دا بار. اتاپ ايتساق, بيدجۋ ناير جانە دجەلسون باتيستا. ءمينيستردىڭ ايتۋىنشا, الداعى تەرگەۋ بارىسىندا كۋا نەمەسە كۇدىكتى رەتىندە وزگە دە قىزمەتكەرلەر, جاۋاپتى تۇلعالار بەلگىلى بولۋى مۇمكىن. اپاتتى تەرگەۋ قۇجاتتارى قاداعالاۋ جانە قۇقىق قورعاۋ ورگاندارىنا تاپسىرىلادى.
– قايعىلى جاعدايدىڭ ورىن الۋىنىڭ نەگىزى سەبەبى – وتە ۇلكەن كولەمدەگى مەتاننىڭ كومىر توزاڭىمەن بىرگە ءبولىنۋى. جارىلىس №79 پيكەت اۋدانىنداعى بۇرعىلاۋ ستانوگىنداعى بۇرعى شتانگاسىنىڭ مەتال تىرەۋگە ۇيكەلىسىنەن شىققان ۇشقىننان تۇتانعان. سونداي-اق لەنين اتىنداعى شاحتادا كومىر دەپارتامەنتىنىڭ, تىكەلەي لەنين اتىنداعى شاحتانىڭ ينجەنەرلىك-تەحنيكالىق قىزمەتكەرلەرى جۇمىسىن دۇرىس ۇيىمداستىرماۋى دا ءبىر سەبەپ, – دەدى مينيستر.
ۆەدومستۆو باسشىسىنىڭ ايتۋىنشا, اپاتقا مامانداردىڭ جەتىسپەۋشىلىگى دە ىقپال ەتكەن. ماسەلەن, كوميسسيا شاحتادا قاۋىپتى ۋچاسكەلەرگە بولجاۋ جاسايتىن قىزمەتتىڭ شتاتى تولىق ەمەستىگىن انىقتادى. تاۋ-كەن شەبەرلەرى از. زاڭ بويىنشا شاحتادا 25 تاۋ-كەن شەبەرى جۇمىس ىستەۋگە ءتيىس. بىراق بۇل جۇمىستى 13 ادام اتقارعان. ماماننىڭ كەمدىگى ۇڭعىمانى بۇرعىلاۋدا بولجاۋ قىزمەتىنىڭ ينجەنەرلىك باقىلاۋىن تولىق دەڭگەيدە جۇرگىزۋگە مۇمكىندىك بەرمەگەن. ماماننىڭ ازدىعى ساپا مەن پارامەترلەردى قاداعالاۋعا كەرى اسەر ەتكەن. بۇدان بولەك, شاحتادا جەراستى ەلەكترسلەسارى جەتپەيدى. شاحتادا مۇنداي 25 ماماننىڭ ورنىنا 16 ەلەكترسلەسار جۇمىس ىستەپ كەلىپتى. ال ەلەكترسلەساردىڭ مىندەتى – گاز قورعانىسى ەسەپتەگىشتەرىنىڭ قىزمەتىن باقىلاۋ.
– ۇڭعىمانى بۇرعىلاۋ شاڭدى باسپاي جۇزەگە اسىرىلعان. بۇل جىلدام تۇتاناتىن كومىر توزاڭىنىڭ كوپ جينالۋىنا الىپ كەلگەن. بۇرعى ستانوكتارىنىڭ ورنالاسۋى ەلەكترمەن جابدىقتاۋ جانە ۇڭعىمالاردى بۇرعىلاۋداعى اەروگازدى باقىلاۋ قۇجاتى سىزباسىنا سايكەس كەلمەگەن. سونىمەن كوميسسيا بۇل تراگەدياداعى جۇمىسشىلاردىڭ كىناسى – 0 پايىز, جۇمىس بەرۋشىنىڭ كىناسى 100 پايىز ەكەنىن انىقتادى, – دەدى يۋ.يلين.
اپاتقا جول بەرگەن تۇلعالاردى جوعارىدا اتاپ وتتىك. ال «ارسەلورميتتال تەمىرتاۋ» اق كاسىپورىندارىنداعى مامانداردىڭ جەتىسپەۋشىلىگى بۇگىن عانا تۋىنداعان پروبلەما ەمەس.
– بۇل پروبلەما كومىر باسسەينىنىڭ شاحتالارىنا دا ءتان. بۇعان دەيىنگى باسقا شاحتالاردا ورىن العان توتەنشە وقيعالار بويىنشا ءبىز تۇراقتى باقىلاۋ جۇمىستارىن جۇرگىزىپ كەلەمىز. بيىل جوسپارلىدان بولەك, جوسپاردان تىس تەكسەرىستەردى دە جۇرگىزدىك. بارلىق ۇسىنىستى بەردىك. ودان كەيىن ماتەريالداردى سوتقا جولدايمىز, سودان سوڭ سوت قۇرال-جابدىقتاردىڭ جۇمىسىن توقتاتۋ تۋرالى شەشىم شىعارادى. ءبىزدىڭ ۇسىنىستاردى شاحتا باسشىلىعى ورىنداۋعا مىندەتتى. دەگەنمەن كەيدە ۇزاق ۋاقىتتى تالاپ ەتەتىن فاكتىلەر بار. بۇل, بىرىنشىدەن, پەرسونالدى وقىتۋ, دايارلاۋ. الىنعان قۇرال-جابدىقتاردى ىسكە قوسۋ ءۇشىن دە ادامدار وقىتىلىپ, دايارلىقتان وتۋگە ءتيىس. مەن «ارسەلورميتتال تەمىرتاۋ» اق-نىڭ جۇمىسىن جوققا دا شىعارمايمىن, اسىرا دا باعالامايمىن. ءبىز جاعىمدى ديناميكانى كورىپ وتىرمىز. جاڭا قۇرال-جابدىقتى قارجىلاندىرىپ, ساتىپ الۋ ارتىپ كەلەدى. بىراق وكىنىشكە قاراي, الىنعان قۇرالداردىڭ ءبىراز بولىگى قولدانىلمايدى. باسشىلارىنىڭ ايتۋىنشا, ادامداردى وقىتىپ, قۇرال-جابدىقتاردى مونتاجداۋ ءۇشىن ۋاقىت كەرەك. سوندىقتان دا بۇل جۋىق ارادا ىسكە اسپاسا, شارالار قابىلدايمىز. ماتەريالداردى سوتقا جولداۋعا دەيىن بارامىز, – دەيدى يۋ.يلين.
قاراعاندى وبلىسى