قۇرىلىس قارقىنى باسەڭسىمەيتىن باس قالادا تۇرعىندارعا بارىنشا قولايلى جاعداي جاساۋعا باسا ءمان بەرىلىپ كەلەدى. وسى باعىتتاعى جۇمىستاردىڭ قاتارىندا جاڭادان سالىناتىن ەكوپاركتى ەرەكشە اتاپ وتۋگە بولادى. بۇعان قوسا جاڭا سپورت نىساندارى مەن تاعى ءبىر وقۋشىلار سارايى بوي كوتەرمەك.
كەيىنگى جىلدارى ساياباق كلاستەرىنە باسىمدىق بەرىلىپ جاتقان استانادا جاڭا قۇرىلىس نىسانى قولعا الىنادى. بۇل – كىشى تالدىكول اۋماعىندا قۇرىلاتىن ەكوپارك. ەكوپاركتىڭ جالپى اۋماعى 70 گەكتاردان اسادى. ەكوپارك جوباسى كىشى تالدىكولدە سۋ بالانسىن ساقتاي وتىرىپ, قالا تۇرعىندارىنا ارنالعان تابيعي-رەكرەاتسيالىق ايماق قۇرۋدى كوزدەيدى.
قازىر جوبانىڭ ۆەدومستۆودان تىس ساراپتاماسىنىڭ وڭ قورىتىندىسى الىندى. قۇرىلىس-مونتاج جۇمىسىنا مەردىگەرلىك ۇيىمدى انىقتاۋ بويىنشا كونكۋرستىق راسىمدەر جۇرگىزىلۋدە. بۇل اۋماقتا ەكوپارك سالۋ قالا تۇرعىندارى مەن جاقىن ماڭداعى ۇيلەردىڭ تۇرعىندارىنا دەمالۋعا جانە تابيعات اياسىندا سەرۋەندەۋگە مۇمكىندىك بەرەدى. سول سياقتى جاسىل جەلەك بويىندا جاياۋ جۇرگىنشىلەرگە ارنالعان ينفراقۇرىلىم سالىنادى, وعان قۇم-قيىرشىق تاس قوسپاسىن پايدالانۋ جوسپارلانىپ وتىر. ساياباقتىڭ ديزاينى مەن ونىڭ ەلەمەنتتەرىنە ەرەكشە ءمان بەرىلەدى. قورشاعان ورتاعا زيانى تيمەيتىن تابيعي ماتەريالدار پايدالانىلادى, ال بۇل ەكوۋربانيزم سيپاتىنا ساي كەلەدى.
اباتتاندىرۋ بارىسىندا تابيعي جاعدايلارعا, ويىن الاڭدارىنا جانە تابيعي ماتەريالداردان جاسالعان شاعىن ساۋلەت نىساندارىنا كوڭىل بولىنەدى. 12 مىڭنان اسا ءىرى اعاش پەن جاسىل جەلەك وتىرعىزۋ جوسپارلانىپ وتىر.
بۇعان قوسا كىشى تالدىكولدىڭ ىرگەلەس اۋماعى يگەرىلەدى. وندا الەۋمەتتىك نىساندار – مەكتەپتەر, مەديتسينالىق ورتالىق, تۇرعىن ۇيلەر, بالاباقشا ورنالاسادى.
ال تالدىكولدە ەكولوگيالىق ينفراقۇرىلىم ماسەلەسىنە نازار اۋدارىلادى. ۇلكەن تالدىكول جانىندا قورىق جانە ورمان-ساياباق ايماعى بار ەلدەگى العاشقى تابيعي پارك اشىلادى.
سونىمەن قاتار استانا قالاسىنىڭ اكىمى التاي كولگىنوۆ سپورت نىساندارىنىڭ قۇرىلىسى مەن سول جاعالاۋدا سالىناتىن تاعى ءبىر وقۋشىلار سارايى تۋرالى حاباردار ەتتى.
«ەلوردادا بالالار مەن قالا تۇرعىندارىنا ارنالعان بىرقاتار سپورت جانە دەمالىس ورتالىعىن سالىپ جاتىرمىز. مىسالى, الماتى اۋدانىندا («قازاقستان» سپورت سارايى جانىندا) جەكە ينۆەستيتسيالار ەسەبىنەن كوپفۋنكتسيونالدى بالالار مەن جاسوسپىرىمدەرگە ارنالعان سپورت ورتالىعىنىڭ قۇرىلىسى ءجۇرىپ جاتىر. سپورت ورتالىعىنىڭ بازاسىندا فۋتبول الاڭدارى, سول سياقتى ۇستەل تەننيسىنە, دزيۋدوعا, پارادزيۋدوعا, حورەوگرافياعا ارنالعان زالدار بولادى. سونداي-اق اتالعان كوپفۋنكتسيونالدى سپورت ورتالىعىنىڭ بازاسىندا سپورتشىلاردى وڭالتۋعا ارنالعان دارىگەرلىك-دەنە شىنىقتىرۋ ديسپانسەرى بولادى. ال جەكە ينۆەستيتسيالار سوماسى 5,5 ملرد تەڭگە. سپورت ورتالىعىن 2023 جىلى اشۋ جوسپارلانىپ وتىر. بۇعان قوسا جەكە ينۆەستيتسيالار ەسەبىنەن ۇستەل تەننيسى ورتالىعىن («الاۋ» مۇز سارايىنىڭ جانىندا) اشامىز», دەدى اكىم.
ال جاڭا وقۋشىلار سارايى ەسىل اۋدانىنداعى تۇران داڭعىلىنان ورىن تەبەدى. بۇنىڭ قۇرىلىسى دا جەكە ينۆەستيتسيالار ەسەبىنەن ءجۇرىپ جاتىر. وقۋشىلار سارايىنىڭ جالپى اۋدانى شامامەن 6,5 مىڭ شارشى مەتردى قۇرايدى. ونىڭ بازاسىندا باسسەين, گيمناستيكا, سپورتتىق-بال بيلەرى زالدارىن, شاحمات, روبوتتەحنيكا جانە IT-باعدارلامالاۋ كابينەتتەرىن اشۋ جوسپارلانىپ وتىر.
«وڭ جاعالاۋدا وقۋشىلار سارايى بار. قالا تۇرعىندارىنىڭ ءوتىنىشى بويىنشا سول جاعالاۋدا وقۋشىلار سارايىنا ارنالعان ورىن ءبولىندى. 2023 جىلى وقۋشىلار سارايىن اشۋدى جوسپارلاپ وتىرمىز. سول سياقتى بوكس, جەكپە-جەك ونەرى ورتالىقتارى, جەكپە-جەك زالى, سپورتشىلارعا ارنالعان مەديتسينالىق ورتالىق (ا-82 كوشەسىندەگى «نۇرلى جول» تەمىرجول ۆوكزالىنىڭ جانىندا) اشىلدى. جاستار سارايىندا, «تولقىن» سك جانە ت.ب. جوندەۋ جۇمىسى جۇرگىزىلدى. «قازاقستان» سپورت كەشەنىندە قايتا قۇرۋ جانە جاڭعىرتۋ جۇمىسى ءجۇرىپ جاتىر. ء«وندىرىس» جانە «كوكتال-2» ەلدى مەكەندەرىندە دەنە شىنىقتىرۋ-ساۋىقتىرۋ كەشەندەرى اشىلدى. ولاردا سپورتتىڭ 10 ءتۇرى بويىنشا 1 مىڭعا جۋىق بالا جاتتىعادى. تاعى ەكى ەلدى مەكەندە دەنە شىنىقتىرۋ-ساۋىقتىرۋ كەشەندەرىنىڭ قۇرىلىسى جۇرگىزىلۋدە. قالا تۇرعىندارىنىڭ سپورتپەن شۇعىلدانىپ, بوس ۋاقىتىن پايدالى وتكىزە الۋى ءۇشىن سپورت جانە دەمالىس ورتالىقتارىنىڭ جەلىسىن ءارى قاراي دا كەڭەيتەمىز. سپورت ورتالىقتارى بۇقارالىق سپورتتى دامىتۋعا جانە بالالار مەن جاسوسپىرىمدەر سپورتىنا قولداۋ كورسەتۋگە مۇمكىندىك بەرەدى», دەدى ا.كولگىنوۆ.